我唔覺意穿越咗時空 遇到個神秘女仔？！

考慮而家出文

Chapter 56: 大展所長

『得我先有？』我有啲唔明...

Jennifer拉返我入房... 佢拎起咗我袋FYP嘅物資...

原來佢果日除咗拖住我之外... 仲有幫我拎埋呢袋嘢上嚟...

我啲工具同埋物料喺晒入邊...

「係呢個。」Jennifer拎起一盒正方形嘅紙盒...

係我嘅SunPower C80柔性太陽能板！

係出咗學校budget嘅太陽能板吖喂... 不過而家... 唉。

「如果你有機會返到去嘅話... 就要麻煩你再買過啦。」Jennifer好似有啲唔好意思咁講...

『好啦，但係你想攞嚟做咩先...』我記得架無人機好似係用汽油引擎架喎，如果咪支Stinger點樣lock-on佢個熱影呢？

「如果成功嘅話... 架無人機可以改做電動嘅... 」Jennifer專心咁研究緊iPad上面嘅安裝圖...

只見佢指示我哋喺長翼上面介開個坑... 將啲太陽能板嵌入隻機翼入邊，仲要用膠水固定...

「你仲未明白點解架機要用碳纖維...？用下你嘅軍事常識...」Jennifer指一指佢腦袋，示意我認真諗諗...

點解呢... 除咗Specific Strength之外... 但係加上改用電動...

真係除咗物資短缺之外我諗唔明...

「首先，雷達只係可以detect到多金屬嘅物件。你認真望下，呢度有冇金屬嘢吖？」Jennifer慢慢引導我...

係喎！呢度全部都係碳纖維物料... 甚至連隻機翼都係！唔怪得係黑色架啦！

如果無金屬，根本就唔會比雷達見到咁滯！加上改用電動嘅螺旋漿，唔用引擎嘅話就可以避免發出大量熱力，都可以大幅減低噪音，冇咁易俾人發現！

咁樣嘅話無論係熱追蹤防空導彈定係還是雷達追蹤防空導彈都無辦法鎖定呢隻無人機！絕吖！

我將我嘅結論解釋比Jennifer聽... 而家搞到好似佢係我老師咁教返我...

「差唔多啦~」Jennifer滿意咁點點頭~

「仲有，如果你有細心留意，呢隻機翼長過原本果隻機翼好多... 一架飛機嘅aspect ratio*越高，佢嘅efficiency就會越高。」Jennifer繼續解釋...

「如果佢嘅計算無搞錯嘅話... 呢架飛機改裝完之後可以由日出一直飛到日落。」Jennifer好肯定咁講...

嘩！會唔會癲咗少少吖... 唔通真係太陽能飛機？！

等等先... 點解同我個FYP咁似嘅？！不如當喺度做FYP囉~

『咁我哋而家要做啲乜嘢先？』

「你就先幫我焊起啲太陽能板... 每隻機翼12塊，In-Series。」Jennifer指示我...

我純熟咁拆開太陽能板嘅紙盒包裝，拎咗一疊出嚟排好佢... 然後攞我支辣雞出嚟...

咦？大鑊。

『Er... Jennifer... 你呢度會唔會有220V交流電？』我搵勻間房都唔見三腳插...

「我哋呢度用直流電架喎，不過你辣雞呢啲resistive load應該唔會有問題。」Jennifer比咗個轉插我，跟住揭開咗地下一個插頭...

我插... 咦？又真係用到喎... 又無爆炸喎...

跟住我就純熟咁喺度焊埋啲太陽能板...

『搞掂！Jennifer你睇你睇？』我就好似個細路仔咁，做完勞作攞比老師睇下個成果咁~

「你啲焊工唔差喎... 松香無用太多，焊錫都啱啱夠... good.」Jennifer讚一讚我！

『哼~ 話晒我之前都有做好多project架嘛~』我非常自信咁講~

「咁不如你以後就留喺度同我一齊幫佢哋囉？呢度又有你中意做嘅嘢... 又有我照顧你~」Jennifer誠懇咁望住我講...

我真係心動咗... 我聽到佢咁講...

我真係有一刻動搖想留喺未來呢度...

我自問其實喺之前果個世界，自己所做嘅嘢都唔會俾人承認...

身邊嘅同學吃喝玩樂拍拖上莊，我就自己埋頭苦幹研究project...

始終落手做呢啲project先係我自己個人嘅興趣...

跟住只會俾人當係怪人，當係毒撚咁睇，就係因為你同其他嘅普通人唔同！

但係喺呢個世界... 我做嘅嘢會受到佢哋嘅肯定... 會受到Jennifer肯定...

我而家喺呢度，有Jennifer佢陪我... 我過得好開心。

但係我依然仲想返去... 我開始掛住我嘅屋企人... 我始終都係掛住我原本嘅屋企。

我仲想見返Jenny... 就算當我係兵仔都好...

另外亦都唔好忘記，呢度仲係打緊仗... 隨時某國發起神經上嚟話要玉石俱焚，核平香港島點算...

唉...

「恆，做咩吖？」Jennifer見到我呆晒... 佢關心我...

唉Jennifer... 我真係對你唔住... 我都仲係好想返去。

『唉... 無嘢。』我繼續焊埋另外果組太陽能板... 跟住同Jennifer一齊夾手夾腳裝上隻翼度...

跟住我哋再連咗啲電線，仲有啲太陽能MPPT controller...

仲有幾舊大嘅電池...

跟住最後就係個摩打同埋個V字尾翼...

仲有機身要包埋帆布... 都一次過做埋啦...

「如無意外，搞掂啦。」Jennifer同我都鬆一口氣...

『試下佢？』我都開始有啲興奮... 究竟飛唔飛到呢？！

Jennifer拎起我部laptop裝咗啲software，跟住插咗支USB天線...

「幫手睇下機翼上面嘅control surface.」Jennifer撳咗幾個制...

我見到機翼嘅Ailerons反起，跟住係V字尾嘅Ruddervators...

『Aileron同埋Ruddervators全部正常...』

「我試螺旋漿啦喎...」Jennifer撳另外一個制...

「嗚嗚嗚... 呼呼呼！」螺旋漿嘅風大到吹到我同Jennifer啲頭髮都亂晒！

但係我哋唔記得咗綁住隻機嚟試，只見隻無人機直衝去懸崖邊！

『喂喂喂喂！隻機飛走架啦！熄咗佢吖！』我緊張咁叫住Jennifer！

只見螺旋漿停咗落嚟... 大鑊。

Jennifer唔係太高興咁望住我...

*滑翔機嘅aspect ratio有啲係1:50，所以滑翔機嘅efficiency係高到可以淨係依靠空氣嘅熱流上升嚟飛，完全唔使引擎動力。普通民航機嘅aspect ratio頂多得1:8，以波音747-8為例，佢嘅aspect ratio都係得1:8.4。Aspect ratio越大就係意味著機翼越長。機翼長就會導致風阻大，所以滑翔機會飛得慢過架民航機好多... 如果大家有留意新聞，之前有一架太陽能飛機環繞地球一圈，果架都係一架高aspect ratio嘅飛機。

咁夜你都喺度
睇埋文好瞓啦～

更新到Chapter 56
我好想同咁多話讀者傾計
但係都要諗辦法唔好阻到大家睇文...

咁多位讀者

*位位位位位位

原來aspect ratio高嘅飛機可以咁屈機

https://en.wikipedia.org/wiki/Solar_Impulse#Solar_Impulse_1_(HB-SIA)
文中所講架太陽能飛機就係呢架
Aspect ratio 1:19.7
幾乎滑翔機同埋普通飛機之間

勁到