「醒啦... 恆...」Jennifer喺我耳邊叫我？
「喂吖點解你可以咁爛訓架... 六點半啦！」Jennifer又喺度搖我！
「咕！咕！」係雀聲？
我擘大眼一望... 又係果隻斑鳩...
Jennifer頭先喺度餵緊蟲比佢食...
『點解每朝起身，都會見到你喺度餵斑鳩嘅？』我好奇點解佢哋會用飛鴿傳書... 明明都有Starlink...
Jennifer拎起一個紅色圈，放喺枱面度嘟咗下...
電腦畫面出現咗一張設計圖...
係黑色V字尾無人機嘅原圖！
「你覺得如果有人知道Professor佢send啲咁嘅資料出去，佢嘅後果係咩吖嗱？」Jennifer一語道破！
『你啱... 不過咁早叫醒我做咩...』我捽捽眼...
「今日砌模型吖~」Jennifer講到好似有新玩具咁...
「咕咕！」隻斑鳩見到我行近Jennifer，掰開對翼作勢想凶我咁！
『喂！你隻野好啦吓！我又唔係搞鳩你！』我指住隻斑鳩鬧佢！
「咕...」隻斑鳩縮... 佢啲反應又真係幾抵死。
「做咩咁睇唔開鬧動物吖...」Jennifer忍唔住笑我...
『佢好似淨係中意你咁... 我一行埋嚟佢就凶我..』
「下次你早啲起身餵佢，同佢friend咗佢咪唔凶你囉~」Jennifer餵埋最後一條蟲，跟住打開隻窗放返佢出去飛...
雀仔就可以展翅自由飛翔姐... 咁我哋呢？
我諗起2022年嘅香港... 不禁嘆一口氣。
「係啦，飲埋佢就出去做嘢啦...」Jennifer比咗隻杯我... 跟住自己拎住第二隻杯...
「『咕嚕咕嚕...』」
Jennifer帶我行咗出去大本營出面懸空嘅空地...
只見懸崖對出望住對面就係鯉魚門... 呢個位置可以飽覽海景...
加上微微吹住海風，真係好舒服~
Jennifer佢哋原來已經搬咗隻無人機嘅殘骸上嚟...
隻飛機比我想像中細，機身長大概一架私家車左右...
但係似乎對翼都幾長下，只係碎咗所以而家唔係太覺...
但係架機都斷開咗幾截... 你想點先...
「嗱，如果我無記錯，Peter Sir都有講過阿恆你嘅hands-on表現都唔錯...」Jennifer想我做嘢？
「而家其實最主要係啲支架斷晒，我哋只要按設計圖重新整返個支架出嚟，其他嘢就可以併返上去。」Jennifer手上拎住一部類似iPad Pro嘅物體，上面有個AR嘅畫面show住架機原本未爛果陣個形態...
跟住Jennifer指示我去攞啲碳纖維棒，去做返個框架出嚟...
跟住Jennifer去咗攞啲嘢... 跟住佢帶著個防毒面具返嚟！
『Jennifer搞乜鬼嘢吖你！』我嚇一嚇！
跟住Jennifer都遞咗個類似豬嘴嘅面具比我...
唉 一見到呢件嘢我就諗起... 唉，唔講了。
只見係P100級別嘅濾芯... 呢個係乾淨掛？
隔著個豬嘴透氣仲焗過戴N95口罩...
「你用手撳住個架，我要開啲膠水...」Jennifer隔著個防毒面罩講嘢就好似隻鴨仔聲咁...
『Ok！』我用手hold住個架同埋上面啲扣...
咦？個扣嘅紋好特別... 係3D Print出嚟嘅？
Jennifer抆咗pat好似鬼口水嘅嘢落去個扣同埋啲支架度固定佢...
嘩！隻膠水好臭，唔怪得要出防毒面罩... 我就算隔著個豬嘴都仲聞到啲...
跟住只見pat鬼口水唔夠5分鐘就硬化咗，我仲好似feel到個架有啲熱...？
「搞掂！」Jennifer興奮咁講~
佢仲係帶著個防毒面具...
我試下輕輕一掹... 嘩！個支架就好似焊死咗咁...
真係幾犀利！
跟住Jennifer繼續同我夾手夾腳整埋其餘嘅部分...
我偷偷望到佢張設計圖明明係寫要用鋁條架喎...
『Jennifer你張圖話要用鋁條同埋電焊架喎... 我哋而家咁樣用碳纖維棒同埋膠水... 會唔會太兒戲吖？』我有啲擔心咁問...
話晒呢架嘢砌完要飛架喎... 一陣半空解體咪大鑊？
「咁都比你望到... 不過無辦法吖，非常時期非常手段。更何況Composite嘅Specific Material Strength係高過鋁嘅。」
*Specific Material Strength, 喺材料科學入邊嘅意思係指喺指定嘅重量嘅物料入邊佢可以承受幾多stress。相同重量嘅碳纖維物料同埋相同重量嘅鋁，碳纖維可以承受嘅力通常都會高過鋁。
『所以就可以用更輕嘅物料做到相同嘅堅硬度？』我話晒都係讀N輾嘅...
「無錯，你望下個機架已經砌完啦~」Jennifer好滿意咁對比住我哋眼前架無人機機身嘅支架同埋佢iPad上面嘅影像...
跟住仲有機翼呢？仲有機尾個引擎... 點搞吖？
「至於機翼呢，我哋而家唔好裝上去住。」Jennifer知道我喺度諗乜！
Jennifer帶我落去地庫嗰度搵Peter Sir...
「咁快就嚟搵我？琴晚果兩隻翼我按你張圖整好咗啦...」Peter Sir手上揸住個好似摩打之類嘅嘢... 個摩打好似風扇拆出嚟咁... 後面仲連住啲粗電線...
「我哋就係嚟攞果兩隻機翼吖~」Jennifer指一指豎咗喺牆角，好似滑浪板嘅黑色物體...
我見佢咁大隻... 睇落應該好重... 我用力一抬！
吓？輕飄飄咁嘅？！ 但係佢又好似好硬淨，唔會屈曲咁！
「行囉~」Jennifer拎起咗另外隻翼，跟住帶我上返去頭先帳幕出面嘅空地...
『就咁裝上去？』我見到機翼同機身嘅支架有啲好似連接嘅位...
「未，因為仲有啲嘢我哋未裝上去，而果樣嘢... 好鬼死難搵，就係咁啱得你先有...」Jennifer望住我...
我身上有啲乜嘢特別吖？
