我唔覺意穿越咗時空 遇到個神秘女仔？！

咁就希望你會追埋落去啦
應承大家唔會斷尾

大家想上嚟吹下水都可以架

我認得你呀
所以先撳入嚟睇下你個故

有心了
不妨話你知～
你係其中一個令到我會鼓起勇氣寫故嘅人

實在係受寵若驚
估唔到我都可以影響到人寫故

係無諗過你年紀咁細
都可以寫到一啲令到本躺心動嘅嘢
跟住仲要發現你原來果陣仲未拍拖
所以就激發本躺覺得：既然言言都寫到，點解我有諗頭都唔寫出嚟呢？

你要知道，有時你一個小小嘅舉動 都可以影響到好多人架

中學生光環好洗好用
個個都覺得你中學生寫到故仔好勁
所以我要把握呢個最後機會寫多個故等人讚我


講笑

不過你而家仲係俾人狙擊緊喎
次次你喺熙熙個故留言都會收到負皮

你係就快啲寫過個完整嘅故啦

我都已經無所謂啦，都慣咗

望到你實一實 等你出新故

各位早晨
啱啱醒，陣間先出文

更新到Chapter 33
本躺好懶 近排冇乜寫文

C-130示意圖：

白色無人機示意圖：

更新到Chapter 34

QJB-95示意圖:

本躺近排太攰冇校對好
英文都打錯
Pedal Pedal Pedal Pedal Pedal Pedal抄返六次

已經做physics做到痴線咁濟
聽日可能遲少少起身，敬請大家見諒

啱啱落咗山去買sukiya
食完就出

Chapter 35: 罪惡感

『Johnson, 聽唔聽到？我係阿恆，而家喺東區走廊上面比兩架黑色七人車追緊！』當我地越接近ICAC嗰陣，啲信號應該越來越清晰！

「聽到，你俾啲時間我，我跑緊上黎！」Johnson有啲氣喘咁講...

佢嘅意思係佢跑上黎東區走廊？！

我哋已經嚟到ICAC... 我望一望右邊...

只見Johnson就好似Winter Soldier咁企咗喺條行車線道... 不過佢係企係路旁嘅...

佢抬起咗一支手提式反坦克導彈，佢地下仲有多一支同類嘅導彈！

Johnson半跪喺地下，然後通過瞄具瞄準...

我哋架車轉眼間就飛過左佢...

「碰！...... 轟隆！」其中一架七人車俾佢支導彈炸到變廢鐵！

但係另外嗰架七人車仲追緊我哋！

可惡？Johnson趕唔切開第二炮？！

咁而家點算好！？ 仲有冇人可以幫手呢？！

點知...

「嗚嗚嗚嗚...」天上再次傳來低頻嘅螺旋槳聲...

我通過右面嘅車窗一望... 係頭先嗰㗎C-130！

佢返黎做咩呀！？班PLA再射佢導彈點算？！

誰知，我見到C-130嘅側面機身閃一閃火光...

C-130對住我哋嘅方向發射機關炮！

轟隆！仲追緊我哋嗰㗎七人車突然中彈爆炸！

原來呢架唔係C-130運輸機...

佢係裝有重機炮Bofors 40mm，重型榴彈炮同埋地獄火導彈嘅Close Air Support Gunship AC-130！

Jennifer見狀就減慢車速，右轉入咗一條上山嘅小路...

路牌寫住去康山... 係有錢人嘅地方？！

「做咩吖？你細個未黎過康山咩？」Jennifer望住我驚訝嘅表情...

只見佢直去前面有一個車路入口，佢駛咗入去...

入邊好黑...

「好啦，落車啦。」Jennifer開左我道門...

『我地黎呢度做乜先...』如果我冇記錯... 呢度應該係康怡嗰個商場？

「同你搵啲衫攞去著吖。」Jennifer拖住我行...

唔記得咗佢有夜視添... 之但係...

『頭先追我哋嗰啲敵人呢？！你唔怕佢地喺呢度埋伏咩？！』我始終仲係對於頭先嗰幾個揸輕機槍掃射我哋嘅魁悟大漢仲係心有餘悸...

深怕佢哋周圍有人埋伏咁！

「放心，東區都比較安全... 你唔洗驚。」Jennifer有啲溫柔咁安撫我... 佢仲拖住我...

點解佢可以啱啱經歷完咁大件事都好似冇乜野咁架？！

仲可以照顧返我轉頭？！究竟Jennifer嘅內心有幾強大先會做到呢個Level吖...

Jennifer拖住我，帶我行落樓梯...

「你知唔知... 頭先我原本係諗住撞死嗰四個PLA嘅。」Jennifer細聲咁同我講...

「知唔知點解我最終改變主意，冇撞到落去？」佢用對發著綠光嘅雙眼望住我問...

『你唔夠膽？』我真係唔係好明... 我嗰刻都以為佢會撞落去...

「第一，我知我未必撞得過佢。」
「第二，係因為我載著你，我唔想搞到你受傷，我唔想要你見到血肉模糊既畫面... 我唔想...」Jennifer好似有啲嗚咽咁喺度講...

我摸一摸佢... 試吓喺漆黑一片嘅環境入邊攬住佢...

『多謝你吖... 我係應該要意識到原來頭先你係想保護我...』我好後悔話佢唔夠膽。

「我真係好驚... 好驚會累死咗你...」Jennifer攬住我，喺我耳邊講...

「你知唔知頭先我一直開車，腦海係空白一片！我淨係諗住要逃走！」Jennifer繼續...

『你成功咗啦Jennifer... 至少我哋而家... 都安全吖...』點解而家好似變左係我安撫緊佢...

我感受到佢其實都好大壓力... 可能係因為佢之前間接搞到隊友死左嘅罪惡感...

「嗯... 我唔想失去你吖知唔知吖...」Jennifer喺我耳邊細聲咁講...

我虎軀一震... 等等先... Jennifer係咪... 表白？！

喂... 我真係唔識handle 呢啲情況㗎！！！

『你... 你指... 你鍾意我？』我有啲唔肯定咁講...

「你話我鍾意你？」Jennifer嘅語調係... 唔肯定？

『當我冇講過啦！』我尷尬咁講！

「咁... 唔通你對嗰個Jenny嘅感覺就係鍾意？」Jennifer雙眼望住我黎問...

『呢個... 點講講好呢...』其實我自己都知... 我一直都係做緊Jenny隻兵... 就算我有幾鍾意佢都冇用。

「我知... Jenny又有波... 對腳又咁正... 仲要成日好似唔著褲咁... 你肯定有興趣啦...」Jennifer好似有啲唔開心咁講...

佢無講錯... Jenny真係好正... 又靚...身材又好又識嗲人...

但係Jennifer唔同... Jennifer係一個真係肯保護我嘅人。佢係一個會博咗自己條命都要保護我嘅人！

『我係有鍾意佢... 但係我知道無可能。就好似你咁講，佢唔會好似你咁同我並肩作戰。』我好肯定咁同Jennifer講。

「哼。學識好好珍惜吓我啦～」Jennifer好似妒忌！

『喂唔係呀！你就算無Jenny咁嘅身材，你咁樣我都覺得你好可愛架！』我口快快講錯野！

「你而家姐係笑我無波姐！哼！！」Jennifer扮到好嬲咁，跟住佢大力搣我隻手！

『呀呀吖！痛吖！又話會好好照顧我嘅？！痛痛痛！』我又想激下Jennifer！

反正我都知道...

佢先係真正唔會拋棄我，唔會嫌棄我嘅人。

更新到Chapter 35
筆者有啲嘢星期五之前要交到 而家仲追緊
出文嘅時間可能受到影響

對AC-130有興趣嘅可以睇呢段片～
https://www.youtube.com/watch?v=7lrfdzU8k4k&t=35s

唔好意思，由於而家有功課趕緊 應該今晚稍後時間先有
敬請各位見諒

Chapter 36:「購物」

Jennifer拎咗部電話出黎，用電話嘅閃光燈照明...

呢度係以前嘅吉之島... 不過而家呢到無電，咩燈都熄晒...

話時話我都好耐無黎吉之島啦...

姐係雖說佢星期三先會特價姐，但係就算特價都其實唔平得去邊...

可能係因為我窮所以先咁講喇...

跟住見到... Jennifer帶左我黎揀衫...

係童裝部... 當我細路仔咩？！

『喂Jennifer！你咁樣係咩意思先！』我指著童裝部嗰牌問佢...

我雖然生得矮... 但係我真係好唔鍾意被人當係細路仔！

「哼～ 我咁啱見到呢度啲衫嘅碼啱你嘛...」Jennifer語氣帶點諷刺咁講...

『你...』我頓時無語。

的確，我身上著住嘅都係細碼嘅衫...

Jennifer放低左部電話喺度...

「啦～」Jennifer拎咗幾件Teen Size嘅T-Shirt比我

我擺喺自己身上度黎試... 妖！又真係幾啱身...

另外Jennifer自己都揀左啲衫...

著起上黎佢都好似個細路女咁... 幾得意呀！

只見Jennifer喺塊鏡面前用手挺一挺佢對小饅頭...

跟住我隱約見到佢唔甘心嘅表情... 佢妒忌？

『Um...』「唔准笑我！」Jennifer詐嬲咁講！

「其實地球嘅男人係咪都係睇身材擇偶㗎？」Jennifer認真咁隔住塊鏡望我...

『無可否認地好大部份嘅男人都係咁架喎...』但係我其實就睇性格黎揀嘅...

應該咁講喇，靚嘅，有身材嘅... 一早都俾人搶走晒啦...

更何況，就算再靚，身材再好都會有走樣嘅一日。

不過我又唔係生得靚仔，又矮... 有咩選擇喎... 稍為有人對我好啲，我都say yes啦。

跟住咪一直俾人利用囉...

「似乎地球好大部份嘅女人亦都係咁架喎...」Jennifer捱住咗我...

「不過我唔係地球嘅女人。」Jennifer突然咁樣拋低一句...

跟住佢就行左去唔知邊度...

「你試下呢件...」Jennifer返左黎，塞左件衫比我...

咦？佢手上都揸住一件同款嘅...

情侶裝？

『欸... 但係呢件衫真係好似細路仔喎...』我望住件衫上面嘅卡通人物，有啲唔願意著...

「嗯嗯？」Jennifer突然用發著強紅光嘅雙眼喺漆黑入邊望住我！

『好好好好好！我試我試！』我屈服咗...

「哼～」Jennifer滿意咁冷笑一聲！

「唔准偷睇我換衫！」Jennifer要我擰轉身...

『係係，我唔敢...』

我自己都擰轉身... 除咗自己原本嗰件灰色T-Shirt...

換上Jennifer呢件...

幾有趣，又意外地幾襯喎！

而Jennifer特登揀咗件加細碼... 有啲緊身...

我地兩個，就好似一對小情侶咁...

一對未長大嘅情侶喺個商場度拍拖...

但係，而家個商場淨係得返我地兩個...

我咁大個人，其實都未試過咁樣喺商場道同個女仔一齊試衫...

『但係... 就咁攞會唔會唔係太好？』始終... 雖然就話個商場冇晒人姐...

「你要明白，呢度已經唔係你以前嗰個香港...」Jennifer擰一擰頭...

我仍然都係唔安樂... 所以打開銀包放低咗200蚊港紙...

「Umm.... 乜你地以前就係用呢樣野做credit?」Jennifer指住我放低嗰兩張一百蚊...

我點點頭... Jennifer打算拎走...

『由佢放喺度啦... 唔比返錢我良心唔安樂。』我堅持要嗰兩張一百蚊放喺度...

「既然係咁... 咁我當係你買比我架啦喎～」Jennifer笑面盈盈咁望住我...

Jennifer再拖我黎到一間好似粉紅色招牌嘅舖頭...

我頓時面紅...

呢間係賣女裝底衫褲嘅舖頭...！

『欸... 你都係自己入去啦！』我有啲尷尬！

良久...

Jennifer拎住一袋底衫褲出黎... 示意我將我自己件衫放埋喺佢個袋度...

「我再帶你去一個地方...」Jennifer收起佢部電話嘅閃光燈，拉我喺漆黑入邊行...

我地一直行... 我見到前面有啲光...？

呢度有啲玻璃爛左，見到外面...

係商場條天橋！

「呢度呢度！」Jennifer拉左我入天橋入邊其中一間舖頭...

「呢個嘢呢，好得意㗎！你撳落去佢會出聲架！」Jennifer原來帶咗我黎琴行...

「但係呢，我搵黎搵去都未見佢有電掣插住... 都唔知點樣發聲嘅！」佢帶我嚟到一部鋼琴面前，好興奮咁同我講！

跟住佢喺度撳啲琴鍵示範俾我睇...

我細個一直都想學琴... 但係何奈屋企人真係無咁多錢俾我買琴...

之後好彩有個親戚有部舊嘅電子琴唔要，所以我先會有機會學吓彈琴...

但係由於我心散，成日唔肯練琴嘅緣故... 屋企人冇再俾我學琴。

但係... 彈琴仍然係我唯一紓壓嘅方法...

我坐上琴凳... 慢慢揭開三角琴嘅琴蓋...

『你會唔會可以開燈照上天花板？』太黑我睇唔到琴鍵...

「哦哦... 好吖。」Jennifer好奇咁望住我喺度做咩...

我雙手放上琴鍵... 曲起手指... 右腳輕放喺Sustain Pedal上面...

然後，開始彈一首我每次彈完都覺得心曠神怡嘅歌 -- 《Bach G Minor》

呢首歌係需要左右手互相配合先會彈得好聽...

右手帶動旋律嘅部份需要注意拇指同尾指嘅力道，先可以有效地帶動旋律...

旋律有時會由右手帶動，有時會交接到左手...

兩隻手就好似一唱一和咁...

就好似兩個人拖住手一齊去闖世界，一齊去探險一樣...

https://www.youtube.com/watch?v=Nvrtau72PA0

我一度彈嗰陣冇留意到Jennifer嘅表情...