我唔覺意穿越咗時空 遇到個神秘女仔？！

推太多次嘅話呢 會食負皮架
都係低調啲好 我出文果陣就會推一推

Chapter 46: 好險！

我哋兩個一直沿著石級向下行...

「嗯～」Jennifer大力深呼吸...

「大自然嘅空氣真係俾人一種煥然一新嘅感覺，令人心曠神怡～」Jennifer瞇起眼好滿足咁講...

『你都鍾意行山？』我有啲好奇咁問...

「你哋嘅大自然真係好靚... 好心你哋啲人類好好珍惜佢啦。 係啦，你應該知我地嗰度沙漠黎架啦呵？」Jennifer指一指天空提醒我...

『欸... 係... 我知道』如果唔係佢提我，我都冇刻意記住佢係外星人...

反正我已經接受左Jennifer呢個特別嘅存在～

『沿著呢度行，我哋前面就係第一個大廚房啦～(戰時爐灶)』我同Jennifer介紹柏架山嘅路... 就好似一個導遊咁。

『某登啲人成日都問... 屋企廚房幾大？』

『就係咁大囉～ 大過你屋企少少咁。』我指著前面嘅空地...

Jennifer可能冇睇某登... 所以唔get呢個笑話...

空地上面有好多個正正方方，用磚頭疊出嚟嘅爐灶...

正方形嘅爐灶中間有個好大嘅窿，但係已經生滿晒雜草... 有啲爐灶就生咗啲唔同顏色嘅花出黎...

大家得閒過嚟港島行山果陣都可以黎睇下～

估唔到過左咁多年之後，柏架山嘅面貌依然冇乜大改變...

『係啦，我地要搵啲乜嘢呢其實？』我見到Jennifer手上揸住藏寶圖...

Sor，係印咗出嚟嘅Google Maps先啱...

「你望下，呢個係琴晚果隻飛機嘅飛行軌跡...」

我見到一條黑色曲線... 跟住再見到近海防基地果度有條紅線... 係琴晚支導彈嘅軌跡！

後面有幾條虛線劃咗個範圍出黎... 就好似天文台嗰啲颱風圖咁樣... 一直劃到落嚟山區呢度。

「我地要搵番隻飛機殘骸出嚟，要研究返究竟佢地用咗啲乜嘢武器。」Jennifer望住地圖跟住再望下眼前嘅環境...

但係似乎冇飛機殘骸嘅痕跡喎...

咦？我見到長凳附近有啲野？我諗住行過去執...

「恆！唔好！」Jennifer大叫，跟住佢大力拉著我！

我嚇一嚇！即刻停低腳步！

「一陣如果係染有G-Particle嘅碎片，你命都冇呀！」Jennifer好大力咁箍住咗我隻手臂...

『好彩你提一提我咋Jennifer...』好險...

我嚟到熟悉嘅環境之後放低咗戒心... 唔記得咗周圍仲有危險！

「我唔想再冇左個拍檔啦知唔知吖！」Jennifer用好緊張又帶有少少責怪嘅語氣話我...

『對唔住，頭先係我疏忽... 我會小心㗎啦...』我警惕自己提高警覺...

「嗯，等我望望...」Jennifer雙眼突然發紅...

佢再拎起手機望一望G-Particle反應嘅讀數...

「似乎冇染到G-Particle... 我哋一齊過去研究下。」Jennifer睇完手機之後就如釋重負咁...

我同佢拖住手咁慢慢行過去塊野度...

係一塊黑色嘅機翼碎片... 仲見到上面有啲斷咗嘅電線外露出嚟...

Jennifer伸手執起黎研究...

「應該喺附近啦，呢塊都似係屬於嗰架機嘅機翼碎片...」Jennifer望一望手上嘅黑色碎片...

「呢度係咪有第二個戰時爐灶...？」Jennifer突然問我...？

『係，再行後面呢條小路就到。』我指著一個寫著康怡花園嘅木牌，跟住帶佢一直行...

「好，我試試...」Jennifer將一條天線插咗落佢部電話度...

『呢個係...？』我見到佢開左個app... 似乎係分析無線電頻譜嘅東西...

「RF Scanner. 任何嘅無人機都必定裝有一啲通訊系統，佢地會將收到嘅數據傳返上總部... 如果機上面嘅通訊儀器仲未壞嘅話，我地應該有辦法搵到架機出嚟。更何況，佢地都應該有類似裝喺黑盒嘅Beacon...」Jennifer一路行，跟住間中又望下電話...

「似乎真係有Beacon... 咦！？ 仲有呢個信號...？」Jennifer面色一變... 見到佢好似有啲驚咁...

『Jennifer，咩事？』我望到佢面色唔妥...

「電話都慳返，係腦聯嘅訊號...」Jennifer收起電話...

「好彩今次陪我黎嗰個係你咋... 如果係其他人，我諗嚟到呢度已經出咗事。」Jennifer繼續同我慢慢行... 佢面色凝重...

『你就咁就感受到腦聯嘅訊號喺邊？！』我有啲驚訝... 點解Jennifer咁快會知係腦聯...

「腦聯嘅訊號會不停干擾我嘅入侵能力... 就好似而家咁，我無辦法睇到你腦入邊諗緊乜野...」Jennifer控咗個頭過嚟... 但係我心入邊完全感受唔到佢...

『咁你會唔會有事架？譬如比腦聯控制之類嗰啲！』我諗起果次北角嗰個PLA我就驚...

Jennifer會唔會變到好似佢咁架？！

「唔會唔會... 佢地嘅信號同我嘅能力只係撞咗頻率，最多就令到我而家無辦法偷睇你諗乜野，但係佢地亦都控制唔到我嘅意志嘅...」Jennifer好放心咁講...

「黎，我感受到佢喺邊啦... 跟我行！」Jennifer拖住我沿著陰暗嘅黃泥路向前行...

只見第二個大廚房好快就映入眼簾...

我見到前面有啲野唔同咗...

前面嘅爐灶... 有啲爛左？！同埋呢架係...

Jennifer冇估計錯！飛機殘骸真係喺度！

更新到Chapter 46
臨訓前更新埋～
一陣起身又考試啦

故事入邊講緊嘅地方：

https://www.google.com/maps/@22.277965,114.2110891,3a,75y,51.95h,88.32t/data=!3m8!1e1!3m6!1sAF1QipOSnerj9pqrbNKY-OVT5nbAiy3lfHmemqyRN-9e!2e10!3e11!6shttps:%2F%2Flh5.googleusercontent.com%2Fp%2FAF1QipOSnerj9pqrbNKY-OVT5nbAiy3lfHmemqyRN-9e%3Dw203-h100-k-no-pi0-ya274.68985-ro-0-fo100!7i8704!8i4352

如果睇唔到嘅話就要試下用電腦

好睇

多謝多謝
你追到live？！

咁都比你捕到我！

係

好感動
竟然會有人鍾意！

咁高汁點會唔鍾意
情節又合理，感情線、主線安排得當
而且你啲軍事嘢又唔係鳩寫，我就覺得好吸引

其實一開始無諗過寫咁多感情線架
至於情節合唔合理... 哼哼
睇埋後面先講啦

真係估唔到會有人識得欣賞我嗰啲用心安排嘅細節位姐

今日果篇遲少少出
啱啱做完個考試好攰 想訓多陣

Chapter 47: 大意了！

只見飛機嘅機身部份斷開咗，散落咗喺大廚房嘅周圍...

另外又有一啲連住電線嘅機尾部位卡住咗喺樹上...

跟住有個箱型嘅黑色金屬盒喺地下...

「訊號來源！」Jennifer指住嗰黑色金屬盒！

我即刻行埋去嘗試拆佢... 雙手抬起個金屬盒...

點知...！

「吱... 啪！」我對手突然受到電擊...

可惡！放唔低個盒！我感受到好痛... 對手痺曬...

我痛... 我好似呼吸唔到... 我... 嗚！

Jennifer見狀即刻跑咗去... 做咩吖？！

你唔係拋低我唔理掛？！

好痛好痛好痛... 我個腦嘗試叫隻手放開！但係對手嘅肌肉完全唔聽使！

我嘗試用力掙扎... 可惡！力不從心！我連想郁對腳都覺得好麻痹...

而家每一秒都好辛苦咁... 我都唔知自己嘅身體仲可以頂到啲電流幾耐... 我對手好痛...

我仲感受到個心好似抽住抽住咁... 胸口都好痛！

Jennifer... 求下你救我啦！你去咗邊吖...？

「噹！」眼前突然有硬物大力打落我對手！個箱跌咗落地下...

我個人失重心... 突然向後一傾！

Jennifer從後攬住咗我... 佢放低咗手上嘅樹枝...

『多謝您吖Jennifer...』我幾驚你唔黎救我吖...

「嗯。我應承咗你吖.... 互相照顧...」Jennifer用下巴捱落我膊頭度...

我聞到佢嘅頭髮嘅香味... 呢個動作好親密...

我背脊感受到佢微微凸起嘅雙峰... 柔軟得黎又好有彈性...

Jennifer呼吸好急促，頭先應該係跑過嚟...

等等... 一陣又比佢打架啦...

我已經瞇埋眼，預咗佢又會打我個頭...

咦？

係喎... 唔記得咗添，佢而家聽唔到我腦入邊諗乜... 嘻嘻～

我感受到Jennifer喺度喘氣...

佢嘅嬌喘聲... 好容易令人諗咗第二啲野喎～

你姑且俾我陶醉多一陣啦... 話晒都冇女仔肯攬我...

等等，做咗認真野先，我嘅理性提醒我。

「等我黎。」Jennifer原來攞咗啲工具過嚟...

唔怪得佢不停地抖大氣...

只見佢首先小心咁用螺絲批將金屬盒上面嘅電極短路...

「咔啪！」螺絲批嘅周圍擦出火花！跟住傳出一陣燶味...

跟住佢再單手掂一掂... 佢無事！

跟住佢用螺絲批借力撬開個盒...

我見到入邊有一大pack疑似26650電池組... 仲有粗嘅紅黑引線...

『呢條線剪咗佢！』我用螺絲批拎起條粗紅線... 另外一隻手拎起個電線鉗一剪！

只見盒入邊電路板上面嘅燈熄咗...

「恆？」Jemnifer把聲喺我心入邊出現！

成功咗！點知...

「碰！」我個頭俾人輕輕扑咗吓！

『嗚呀！做咩打我吖... 好痛呀...』我扮慘咁對住Jennifer講...

「成日就掛住色色我...」Jennifer喺我耳邊細細聲講...

『咁都比你發現到！？』明明頭先有腦聯干擾佢架！

我真係恨不得即刻重新接上條電線！

「比我睇到你色色過都要打！仲有你唔洗旨意吖！」Jennifer指住我揸住紅色電線嘅手！

『對唔住Jennifer大人！』Jennifer作勢想打多一吓... 我立即求饒！

「哼～」Jennifer滿意了...

「繼續搜索。我哋要將成條殘骸清走，攞返去基地嗰邊...」Jennifer繼續執起其他嘅零件，然後集中搬去一個位置...

我都跟住照做...

我見到樹上面嘅機尾部分幾完整...

成個螺旋槳同埋V字型機尾都係連埋一齊...

V字型機尾？！咁咪同果日喺北角見到嗰㗎一樣囉！

只見機尾嘅大細同一個人嘅Size差唔多...

『Jennifer！』我大聲叫佢過嚟...

Jennifer佢放低咗手上啲雜物過咗嚟睇。

「呢個要慢慢黎... 」Jennifer拎咗條繩出黎...

佢徒手爬上棵樹上面，用繩綁著隻機尾固定佢...

跟住佢將條繩搭喺粗樹幹上面... 繩嘅尾跌咗落嚟我腳邊...

我知佢想做乜野啦... 我幫佢拎住佢條繩...

Jennifer見狀滿意咁點點頭，然後拎左把短斧頭出黎...

「啪！」佢大力一劈... 原本卡住機尾嘅樹枝就咁比佢斬斷咗，我手上條繩突然大力一拉！

我慢慢放... 隻機尾慢慢垂直向下... 原來都唔係太重姐～

「碰！」Jennifer一野喺樹上跳落嚟！佢真係唔怕斷腳架咩？！

『哇你嚇得我吖！咁高跳落黎因住吖你！』我抗議！

「唔怕話多個秘密你知～ 我哋火星人嘅骨髓有Silicon-base嘅compound～ 會比你哋地球人堅韌一啲！」Jennifer笑瞇瞇咁講...

『叻啦叻啦...』我有心敷衍佢... 咁得戚吖啦？

我同Jennifer細心研究機尾內部嘅結構...

只見除左有啲斷咗嘅電線外露出嚟之外，入邊似乎有引擎... 仲有油缸？！螺旋槳亦都完好冇損傷...

我再敲敲... 原來機尾有鋼板之類嘅裝甲... 唔怪得冇爛到！

「你讀書嗰陣有冇讀Mechan N輾？」Jennifer突然咁問我...

『我哋間大學就算讀咗Mechan N輾你都係唔會識得整引擎㗎... 更何況我都唔係Mechan...』我失笑...

「放心，我遲啲教你～」Jennifer輕鬆咁拋低一句...

『吓？！』究竟Jennifer佢識幾多嘢架？！

佢而家既身影就好似發著光咁...

佢身體又健壯，又有超能力，又識得咁多實用嘅知識，又好人又溫柔喎！

Jennifer其實你係咪神嚟架？！我幾乎跪咗喺度甘拜下風... 離題了～

「我哋嘅教育制度當然同你哋嗰啲有少少唔同啦～ 以前我讀propulsion果陣case study project有研究過。」Jennifer一邊同我一齊抬隻機尾返去，一邊同我講...

「好啦，有剩嗰啲我再叫人幫手搬，我地今日淨係帶隻機尾同埋呢個盒返去。」Jennifer將隻機尾放喺Model X嘅後座，再將隻盒放咗喺車尾箱...

「恆，我有個人想比你見吓... 你等等。」Jennifer喺17寸玻璃螢幕上面撳咗個叫Nextcloud Talk嘅app出嚟...

更新到Chapter 47
想訓耐啲都唔得

Jennifer型到

佢係嗰啲有咩事肯幫你出頭嘅女仔
絕對唔係死港女

港女都有好多肯幫你出頭㗎

聽日唔知幾點醒啦

Chapter 48: 又陌生又親切的人

「好啦，有剩嗰啲我再叫人幫手搬，我地今日淨係帶隻機尾同埋呢個盒返去。」Jennifer將隻機尾放喺Model X嘅後座，再將隻盒放咗喺車尾箱...

「恆，我有個人想比你見吓... 你等等。」Jennifer喺17寸玻璃螢幕上面撳咗個叫Nextcloud Talk 嘅app出嚟...

未見過...

跟住佢打電話比一個叫Professor Y嘅人...

只見畫面出現左一個中年男子，睇落大概30幾歲左右...

佢戴黑框眼鏡，頭髮凌亂，樣貌滄桑，連鬚都未剃...

只見佢著住一件灰色T-Shirt，完全有違我對一般professor嘅印象...

佢身後係凌亂嘅辦公室，檯面有啲雜物... 有幾件電子零件，電線，手提電腦... 仲有一塊太陽能板？

我仲見到佢檯面上有隻飛機模型... 其中一隻係果日我哋見到嘅白色無人機！

「Hello Jennifer，仲有... 你。我終於同你見面啦。」Professor隔住個mon指住我...

『Hello... 我叫...』「你叫阿恆吖嘛...」我仲打算自我介紹... Professor未等我講完已經講咗出口...

「點吖，啱啱嚟到海防基地，有無啲乜嘢唔習慣吖？」Professor好關心咁問我...

『欸... 至少都叫做瞓到嘅，但係就係冇乜野食咁...』我如實咁講...

唔知點解，呢個Professor我對佢好有親切感... 但係我又覺得好陌生... 我真係未見過佢。

「瞓到都好吖，野食嗰方面到時等Jennifer帶你過嚟九龍嗰陣，我請你地兩個食野啦～」Professor真係好客氣，就算我地啱啱見面都好...

「係啦，你哋係咪有野想搵我呢？」Professor點解好似知道晒所有野咁...

「我地執到隻機翼... V字尾，有螺旋槳同埋引擎連喺上面。另外琴晚PLA個邊似乎想試探我地實力，不停挑釁我哋... 隻飛機機翼就係屬於佢地架無人機嘅... 琴晚喺我地附近發射腦聯訊號，所以比我同埋阿恆打咗落嚟。」Jennifer認真咁報告...

個Professor聽緊，但係似乎冇望住鏡頭... 佢喺度搵緊啲野...

「PLA嗰邊由得佢地啦～ 反正佢4th Gen嘅武器始終冇得同我哋Lockheed Martin嘅5.5th Gen揮。飛機嘅話... 係咪呢隻？」個Professor攞咗一隻黑色嘅飛機模型出黎... 同我當日喺北角見果隻飛機一模一樣！

『「係吖！」』我哋兩個都嗌咗出嚟...

「阿恆，琴晚隻飛機飛過海防基地嗰陣嘅速度係...？」個Professor問我...

『冇記錯係105節。』我照直回答...

Professor面色變得沉重...

「唉。我老實話你知，嗰隻飛機我都有份設計。」Professor拎起果隻模型...

唔怪得佢手上會有模型啦！原來係佢！

『你肯定佢係自己人？！』我細聲喺Jennifer耳邊講... Jennifer指住個mon，叫我聽佢講...

「恆... 你要明白，未來嘅世界好多時有啲野都係情勢所迫。我而家唔係想做乜嘢就做乜野。果隻飛機上面嘅飛行控制系統，係我當時畢業論文嘅其中一部份... 至於點解會落入PLA手上，我冇辦法向你詳盡解說。」Professor嘆咗一口氣...

『咁大球場果度果隻白色flying wing，係咪你派黎？』我有少少唔客氣咁質問... Jennifer稍為皺眉頭...

「係。當日我叫咗米國果邊將物資送去大球場，同時我亦都打算派無人機過去個邊，因為我知道你想改裝你嗰支「新」槍... 好可惜，呢度似乎有人通風報信... 我情急之下先會私底下出無人機炸毀PLA其中一邊嘅裝甲車。令到你同Jennifer吃驚，我真係唔好意思...」個Professor一五一十咁講...

佢似乎非常知諒解我會質問... 並冇責怪我以下犯上。

『你嘅立場其實企邊度架？』我開始有啲疑惑... 點解佢又要幫我哋，同時冇企硬抵抗PLA？

「我諗阿恆你應該未知道，海防基地嘅CO以及創辦人，其實係我本人。」Professor望住鏡頭嚴正咁講！

我難以置信咁望一望Jennifer... Jennifer都點點頭...

「但係由於我身份特殊，無辦法留喺嗰度，所以先會將指揮嘅工作都交埋俾Jennifer。我諗你未必會信我，但係你應該信Jennifer嘅係咪？」點解個professor連我嘅心理都捉得咁清楚...

理論上佢隔住個mon都冇可能會睇到我諗乜架喎！

「阿恆，呢個係我交比你地兩個嘅任務... 我會將你地執到嗰架飛機嘅設計圖叫某咕佢攞過嚟比你地。你哋諗辦法將隻飛機還原，攞黎幫基地做偵測機。咁樣可以減輕你地嘅人手，亦都可以避免經常啟用雷達。」個Professor竟然會將設計圖比我哋？！

『咕？』邊個咕吖？

「呵... 你有見過佢嘅... 係隻斑鳩黎架。」Professor乾笑幾聲...

『佢唔係太鍾意我...』我就好似鼻子碰到灰咁講...

我平時都好鍾意斑鳩... 甚至有次試過見到有隻受傷嘅斑鳩跑咗出馬路...

我跳咗出去執佢返黎...

「不過我知你鍾意小動物嘅～」Professor望住我慈祥一笑...

「好啦，你哋兩個要好好照顧對方吖知唔知道？」Professor語重心長咁講...

「『知道～』」我同Jennifer異口同聲成個細路仔咁講...

「吖～你哋兩隻野吖！咁恩愛吖嗱！好啦，我都要做野先... 之後你地有機會黎九龍我哋再見。」Professor講完之後就收線...

見完professor之後嘅感覺好奇怪...

我好似識得呢個人，但係我又諗唔到佢係邊個...

佢亦都異常地清楚我會擔心啲乜嘢...

更新到Chapter 48
終於有好好補眠

好sweet

咕

你估我唔到嘅～