【校園】【足球】【少甜】溝到女神後我決定......

好撚假

半真半假咁啦全真不如寫日記寫blog

主角有光環，所以會更特顯主角

好可惜男主光環應該有排都唔出現

（四十）

「你估今場又幾多失誤」Nicole顯露出一個完全放棄我嘅態度，
「5次啦」
「係7」
「有助攻喎」
「錦上添花啫」
「到底你呢排搞乜呀？」
「我都唔知。。。腳頭好重，反應慢一半，周身唔聚財咁」
「睇你樣又唔似有事喎」Nicole塊面哄到埋嚟，眼神喺我面上游來游去。
「呃。。。我飲嘢先」
望住阿健同班慶祝緊嘅隊友，莫非真係有機會因為我輸。。。？


星期六練完波，我同阿健一齊約另一半嚟個double dating，去黃埔間冒險樂園玩，玩碰碰車，玩夾公仔，玩彩虹池，再行埋附近嘅奇趣天地，彷彿搵返小學嘅童真，然後行去時新快餐店食佢有名嘅豬排包，食完行去火車站坐火車去沙田踩單車。其實我唔係好識踩。。。去到單車店揀好單車，我望住部嘢思考人生，佢地三個都坐上各自單車，淨我一個未上，「快啲啦屌你，唔係唔識踩掛？」
「緊係識啦」比阿健咁屌一屌，我硬住頭皮坐上去，然後同佢地一齊起步。頭一百米，我已經踩到舞龍咁舞左右搖擺，「喂你唔識早講嘛，就去其他地方啦」
「咩啊，我試緊部嘢轉彎喳嘛，行啦」
舞龍多三十秒，終於拎到平衡可以踩直線，我對上一次踩單車已經係好細個去九龍城單車公園踩有輔助碌。。。治住城門河嚟到馬場，入去白石角海濱長廊，呢度風景好好，汴風吹嚟非常舒服，我地4人都放慢速度去感受大自然。然後一路３去吐露港，我地停喺度影張合照留念，入到去大埔有少少上斜，好彩咁樣踩一個鐘我總算識踩單車，所以唔會難到我。一路踩路過船灣、丁角同龍尾，就見到大美督塊牌，我地繼續踩去水壩，見到海上停駐好多一艘艘小船，配合平靜海水同山脈，形成一幅好靚嘅風景畫。去到水壩停低影相，傾陣偈，我地就決定踩返沙田。途中經過士多，我地會停低醫一醫肚，感受下人情細故。返到沙田還車，然後兩對情侶就各自離開。「你估我地之後可唔可以好似佢地咁啊嗱？long d到好似冇影響咁」
「其實。。。」
「嗯？」
「冇嘢啦，贏咗冠軍再講啦。。。」
「贏硬嘅咩。。。我呢排屎到乜咁啊」
「我信，而家嘅你，一定得」
「ush! 我會努力贏！到時嚟打氣啊」
「一定啦，到時唔好失威吖，嘻嘻」


經過地獄式訓練，我感覺我狀態好返好多，冇9成都有8成，只希望比賽期間可以拎得到個節奏升返watt。臨開波前嘅開會，何sir幫我地打氣，「各位，嚟到呢步啦，盡情享受啦，跟返平時練習做好自己本份，我地一定贏架！」
「加油加油！」

（四十一）

今次對手雖然係上屆4強，但幾年前佢地精英賽曾經4連霸，分區賽甚至12連霸，實力非常強橫，人腳基本都係U19港腳級別，甚至已經有註冊做港超球員。相比之下，我地隊去到U19程度嘅球員只有5，6人，而且決賽喺旺角大球場，我地都係第一次踩呢個場，對方已經踩過，冇我地咁怯場。

「喂阿健，你有冇心理準備返唔到去架？」
「冇喎，贏撚硬，洗乜心理準備」
「最驚你準備咗」
「你顧掂自己先啦，呢排同Charmaine冇咩啊嘛？」
「吓？！冇啊，上次咪同你地一齊踩單車，可以有咩嘢？」
「冇就最好啦，唔好諗咁多」
「打我心口一拳啦」
「嗱你話架～」阿健真係一拳鋤落我心口，好大力，大力到我後退幾步，啲隊友都望住我地，驚我地真係嘈交。
「記唔記得以前我都咁樣打過你一拳」
「記得啊，你話我唔認真嘛」
「係啊，而家呢拳還返俾你」
「傻啦，兩兄弟計呢啲」
「哼，兩兄弟一齊上！」
「上啊！！！」佢大聲到啲人以為佢痴咗線，我都要掩住耳仔。
對上一次咁緊張已經係小學麥當勞分區決賽，當時阿健仲係嬉皮笑臉，我忍唔住打佢一拳叫佢認真啲。


Nicole走嚟問我，「你尋晚係咪冇瞓？」
「你又知？」
「我見到你wtsapp last seen 5點幾」
「係啊」我抬頭望向天，「好想贏，但對面咁強，我又怕」
「唔洗怕啦，輸咗咪斬你」
「呃。。。咁你都冇瞓？」
「唔係喎，瞓得好舒服，我係起身見到你last seen啫」
「放心啦，我好精神」講完我fing幾下手
「你係至好講」Nicole講完轉身走
「呵欠。。。」我背住佢打呵欠
我背後感覺到一個想斬人嘅眼神啤住我。


5分鐘左右，阿健左禁區頂搏到罰球，我擺定粒波行後準備射波，用力右腳一拉，粒波直接彎去死角，可惜路程有啲遠唔夠力，龍門勉強接落嚟沒收。8分鐘同13分鐘左右，sky同阿健互相配合，阿健成功射門，可惜兩次都柱邊出界，睇嚟我地都仲怯怯地場，踢起上嚟就住就住咁。對方前段處於捱打狀態，二十分鐘終於出現第一次攻勢，對方中場一腳劏穿我地一對中堅，前鋒入攝形成半單刀，好彩神貓出嚟夠快封到粒波。28分鐘左右，mountain唔知做乜喺禁區侵犯對方前鋒，輸12碼，前鋒自己主射破埋網，我地半場落後1比0返更衣室。


「定啲嚟！」何sir見勢色唔對路，不斷激勵我地士氣。
「啱啊！精神精神，我地前段攻得好好，證明我地都可以鍊贏佢地架」作為隊長嘅我，係時候要企出嚟。
「加油！ush!!!」


Charmaine同Kassie都喺看台走落嚟場邊同我地打氣，睇嚟阿健比我更加口是心非，把口話冇事但個人打晒震，而我又打一個呵欠，Nicole呢個時候睇唔過眼，拎水嚟潑我地兩個，「你兩隻嘢醒未架，呀隊長你啱啱講得咁口響，轉個頭即刻咁頹，阿健你仲衰，射完波冇力咁」
抹乾塊面之後我地兩個雙手搭住對方膊頭，頭貼頭，「啊！！！」
發洩完後我精神好多，而阿健眼神亦都凌厲返，兩人昂首踏入球場。

注咗冊唔可以踢學界

應該得？以前我踢話對面條友註冊左

呢幾年唔得喇

fc咗，16年開始改制唔比當時個對手而家做某港超正選

（四十二）

換邊後到對面狂攻，mountain終於回復水準，不斷上嚟殺波，頭錘亦清唔少攻勢。52分鐘，神貓角球出迎打空氣，粒波輾轉落到我腳下，當時我只係抱住最大腳去解圍嘅心態去清波，阿健福至心靈嘅走位去到皮球落地位置，瀟灑咁一腳控定再撥一撥，加速扭過中堅，然後大步泵泵聲推進，由於對面為咗擴大領先優勢忽略防守，頭先阿健扭過嘅已經係最後一人，冇人進逼情況下，阿健單對單面對龍門，以前佢會勁抽，不過而家佢成熟咗，穩重咗，會睇清龍門行動再作決定，龍門決定衝出嚟封波，當佢落地攤開手一刻，阿健輕輕一chip，粒波拋物線笠過龍門，直飛入網！我地振臂歡呼，阿健即刻入去拎返波放中場等對面快啲開波。


戰情膠著到最後5分鐘，我放長波俾sky去追，sky左腳拉弓傳中，左閘遞高手攔截皮球，食一張黃牌兼喺k角位對外輸罰球，呢個位對右腳嘅我用外彎拉過去其實效果冇咁好，所以我同sky配合，佢假助跑跑過粒波，慢慢行返轉頭，而同時間我亦助跑，但起動兩步就停低，sky瞬間加速直接左腳內彎cur埋去，fake到對面幾乎全部人零反應，阿健搶點成功頭錘頂入，2比1反超先。最後4分鐘，對面直接空群而出，攻勢水銀瀉地，我地唯有血肉長城，全軍退守咁捱落去，禁區大混戰，唔知邊個出腳踢飛粒波，今次神貓終於做返套好戲，跳起接住，然後落地瞓低攬住粒波攬到實一實，5秒後起返身，大腳開出，「咇！咇！咇～」終於，等咗好耐嘅完場哨響起，「YEAH!!!!!!」全隊瘋狂慶祝，教練團同後備都出嚟攬埋一舊，看台亦為我地鼓掌，我地全隊拋起何sir，然後到我，再到阿健。頒獎時間，我地一字排開接受獎牌，然後分開前後兩排影團體相，前排拎住冠軍嘅橫額，而我就企出去同嘉賓捧住獎盃。影完繼續慶祝，傳媒搵何sir採訪，然後搵阿健同我，我地兩個嘅另一半亦走落嚟感受慶祝氣氛，兩對情侶各自合照。入更衣室換衫沖涼，全隊一齊去慶功宴，瘋狂玩到凌晨先返屋企。

Push女女圖呢

（四十三）


比賽嘅攰，加上前一晚嘅通頂，呢一晚我瞓到可以用昏迷嚟形容，再起身已經係8點，夜晚8點，見到wtsapp好多unread，唯有逐條覆，班group幾百條就skip晒啦，我諗都係恭喜我地同埋祝福我地去到外國順順利利，讀到Charmaine時，見佢由一小時前在線變在線上，我就hi佢，然後佢打過嚟，「喂？你終於瞓醒嗱？」
「係啊，瞓得超好～」
「咁咪幾好，見你呢排精神好崩緊咁，吖係，聽日中午出嚟食啦，要farewell阿健」
「係喎，條友後日走，得啦，聽日中午嚟接你啦」
「嗯，你食咗未？」
「咁快啲食啦，唔講啦」
「好啦，聽日見，拜～」


今日Charmaine就咁著一件短tee配牛仔短褲，但仍然掩蓋唔到佢嘅美色，一路行一路有狗公昅佢，其實我都幾飄飄然，心諗你班友只可以昅，乜都冇。除咗我地兩對情侶，Nicole都喺度，好出奇嘅係，佢今日冇屌我，而係同兩個女仔係咁傾女人嘢，由買衫到化妝，再講外國生活，而我同阿健就講外國踢波情況，「嗰邊教練對你有咩評價？」
「就咁話我有potential喳，不過都夠架啦，起碼真係簽我，我會爭上一隊，你都要爭啊，唔好俾人踢返出嚟。」
「放心啦，一定唔會」
「次次你講放心都會出事。。。」
「係喎你幾時走？」
「唔。。。兩個禮拜左右」
「咁快。。。？」Charmaine聽到即刻問
「係啊。。。」
空氣無端端安靜，阿健見唔對路，即刻扮到好high，「喂不如你過到去，有時間嚟英國搵我玩啦，我又可以去你嗰邊」
「又得啫」
食埋飯大家各自離開，我同Charmaine講，「我屋企冇人啊，上嚟坐陣啦」
「好吖，未去過你屋企」
Oh yes yes yes!!!!



「我屋企冇你屋企咁靚架，將就下」
「冇所謂啦」
「唔好笑我間房啊」
我間房唔算亂，因為冇乜雜物，只係冇摺被，同有陣男人味，
「搵啲嘢玩啦」
「不如睇戲啦，用部notebook睇」
「又得啫」
「不如睇那些年啦，我未睇過」
「嗯」
於是我地上床坐，然後notebook放我腳睇。
「如果有第二個人同你一齊追我，你會點？」
「搶囉，誓不甘休」
去到男主角咀新郎，Charmaine開始低泣，然後挨落我膊頭，果然女仔係眼淺啲，「我仲以為佢兩個結婚添」
「係囉，你會唔會好似佢咀新郎咁咀我架，哈哈」
佢未講完，我就一嘢咀落去，兩人嘴唇溫柔蠕動，我輕輕伸出舌頭，舔濕佢雙唇，然後慢慢深入，去尋找佢舌頭遊玩，越伸越裹面變成混戰，然後伸返出嚟，用手托住佢下巴，用無比珍惜嘅眼神凝視佢，「咁樣o唔ok啊？」
「嗯。。。」佢開始眼泛淚光
「做咩啊？整親你？」
「唔係。。。阿佑。。。我諗你走之後我地要分開。。。」

？！？！？！？！？！

點解要分啊

Lm

（四十四）

「吓。。。。。。？」
「對。。。對唔住。。。」瞬間掩眼淚崩
「點解？你變心？」我已經嚇到唔知講咩好。。。
「唔係，我屋企想我專注學業，唔俾拍拖」
「上次明明好地地架」
「上次還上次。。。」
「咁。。。冇彎轉？」
「可以去到你離開嗰日已經要感恩。。」
「唔怪得早排你成日心事重重咁」
「對唔住。。。好對唔住。。。」
「唉，冇辦法架啦，唔通地下情咩，我仲要喺西班牙，咁佢地更加大條道理唔俾你拍拖」
「阿佑吖。。。」
「冇嘢喎，咁可以點啫」我開始眼紅紅，應該係阿秋死之後第一次想喊，
「我唔想。。。」
「我知，我冇怪你，唉，享受最後時間啦」
「嗯」Charmaine講完就攬住我。
送佢返屋企時雖然仍然手拖手，但氣氛已經變咗，有啲嘢已經返唔到去。


「我同佢散咗啦」返到屋企我wtsapp阿健
「點解？」
「屋企想佢專注學業，唔俾拍喎」
「屌」
「？」
「你信？」
「都冇得唔信啦，佢屋企不嬲想佢讀醫」
「好心你唔好咁易比人呃啦」
「你又知佢呃我？」
「唔係咁嘅意思啊，唉屌，唔理你啦，繼續執嘢」
總覺得佢有嘢瞞住我。


返到學校，朝早照舊Charmaine會嚟長櫈搵我一齊坐，照舊一齊溫書，只係我地比平時安靜，可能唔想面對兩個星期後嘅事實，「係喎，禮拜六同我去買嘢啊，要執行李啦」
「嗯」
話就話拎咗冠軍，但平日放學嘅練波時間冇變到，內容只係變咗師生大混戰。我心情非常一般，所以冇一齊踢，只係不斷跑圈，跑跑下Nicole走嚟一齊跑，
「你幾時返澳洲？」
「差唔多架啦，應該同你差唔多時間走」
「當時用咗幾耐去適應？」
「冇話適唔適應架喎，日子咪又係照咁樣過，地方唔同啫」
「咁又係」
「做咩呀？怪怪地咁嘅，你唔好同我講你冇喎」
「如果你真係鍾意一個人，你會唔會屋企人阻止都要同佢一齊？」
「你嘅意思。。。或者人地真係有苦衷呢」
「你又知我講乜」
「寫晒落額頭上啦」
「做人好似你咁豁達就好」
「唔好架～當你唔開心嗰陣，啲人會覺得你冇咩事，但其實我都一樣需要人安慰」
「咁又係。。。」
「記唔記得中3嗰陣我喺球場喊？」
「呃。。。冇乜印象添」
「衰人呀」講完呢句，Nicole就自己一個加速向前跑。

其實我冇唔記得，當時嘅佢讀書差俾屋企人屌，好堅強咁忍足全日，放學去到球場觀眾席上先喊出嚟。我見到就過去安慰佢，結果攬住我喊咗好耐，直到啲隊友入到嚟先分開。自從呢件事，我就成為佢樹窿，事無大小都會搵我傾，完全依賴咗我，而我都會同佢分享喜怒哀樂，阿健成日都會問我地幾時一齊，我承認有鍾意人，雙方亦算兩情相悅，奈何太怕醜同要面，就冇對佢表白，直至佢離開香港。

（四十五）

「嗱，Thomson model要記住atom係divisible，同埋electrons係negatively charged particles，呢樣嘢真係靠記，知嗎。。。？」
「唉，盡量記啦，越嚟越難，記唔到咁多吖」
「都要記架，要考好啲啊，唔好失禮我呢個名師」
「哈哈，算吧啦你，走啦，要返屋企啦」
「嗯，我送你」
「好吖」
我決定咗，呢一程係我最後一次送Charmaine返屋企，長痛不如短痛，咁不如直接啲斬欖。


「你睇吓個日落」
「好靚吖，今日冇乜雲睇得好清楚」
「記唔記得有次同你喺度睇？我話你都好靚」
「緊係記得啦，我仲以為我聽錯添」
「冇聽錯，話說嗰陣你鍾意我未架？」
「唔。。。未架～」
「咁好彩我怕醜冇表白啫，如果食住上表白，咪食檸檬囉？」
「係架，哈哈」Charmaine瞇眼笑起上嚟真係好靚。
「幫你影張相啦，日落美人」
佢戴住我地一齊買嘅紅色手繩，雖然做個on9姿勢，不過依然掩蓋唔到佢嘅靚。


「send俾我吖」
「得啦，係喎，今日坐巴士啦」
「點解？」
「想同你一齊坐嘛，地鐵邊有位坐」
「gogogo!」
上到上層，我地都冇乜嘢講，其實係我唔知講乜好，去到一半左右，Charmaine翹我手挨落我膊頭瞓著，我腦海不斷回憶同佢相處嘅一點一滴，「下一站係，美孚鐵路站」終於，我最唔想聽到嘅聲音響起，我叫醒佢一齊落車。
「Charmaine」我正面雙手攬實佢，好實好實
「阿佑。。。」
「下星期大考我唔洗返學啦，聽日就係我last day…」
「吓。。。」
「我仲要執櫃桶同拎嘢返屋企，所以今日最後一次送你返嚟啦」
「咁聽日我送你返啦」
「好。。。」
「對唔住。。。」
「傻啦，做咩無端端講對唔住？」
「冇嘢啦，你陪多我一陣啦」
「嗯，其實好想一直陪。。。」
聽到我呢句，Charmaine喺我懷裡喊，呢次係佢第一次真心咁鍾意一個人，亦係第一個人俾到佢心動嘅感覺，只可惜，佢知道冇辦法去享受呢一切，佢踏上不歸路之時，其實預咗冇資格去享受幸福，只係當佢親身感受到，然後失去，先體驗到嗰種痛苦原來咁痛。
「對唔住，好對唔住。。。」
「唔好再講啦，都唔關你事，timing唔啱都冇辦法」

目送Charmaine背影，我轉身深呼吸，呢個地方，如無意外都唔會再嚟，只會存在我回憶之中。

寄刀片了