【校園】【足球】【少甜】溝到女神後我決定......

咁咪派帽俾Nicole?

Nichole好女仔黎

（七十二）

我將呢個消息喺3人group內講，原來阿健都有收到邀請，咁就得啦，我地兩兄弟又可以拍住上。當然，而家首要目標係打贏次圈，如果唔係乜都冇意思。次圈對手畢爾包B隊，又係一場惡戰，每日收操後，我同Roberto都會留低繼續操體能同傳波，聽講球隊搵過佢傾關於升一隊嘅事，我非常羨慕，希望佢成名後唔會忘記我呢位戰友。

由於我地聯賽常規賽排名低，所以每圈我地都會作客先，不過咁樣反而有利我，因為我鍾意踢落後波，總會逼出小宇宙。今場波亦唔意外，上半場先落後1:0，下半場再輸多粒總數輸2:0。次回合返到主場，上半場我先罰球直射破網，下半場初段Roberto硬爆入禁區搏到12碼再自己操到射入。得勢不饒人嘅我地食住上，臨完場前Roberto同左翼嚟個撞牆之後勁射入網，最後總比數反勝3比2晉級4強，距離升班只淨兩場賽事。


4強對手係皇家馬德里卡斯迪拿，即係皇馬B隊，基本上係西丙星光熠熠，不過既然成為我地對手，即係佢地都係敗者，如果唔係就一早升班啦。雖然教練團對於對手分析好專業，但始終言語上有溝通問題，我都係交返俾我軍師負責。對手已經有球員試過喺皇馬1隊比賽，例如後防拿祖，前鋒莫拉達同謝斯洛迪古斯，真係前後都難搞。首回合我地依然先作客，教練希望主守，所以安排我後備。球隊上下一心，防守非常嚴密，皇馬兩個前鋒就越踢越急，不斷錯過機會，最後我地成功逼和0:0。


放虎歸山冇好後果，皇馬把握唔到主場優勢就等住被淘汰。上半場我地憑 Roberto入波領先1:0，半場喺更衣室大家都掩飾唔到喜悅，只係差在未慶祝埋。對手話晒都係皇馬B隊，點會咁易打沉，一開場4分鐘我地中堅大失誤，防線最後一人情況下拉跌莫拉達，結果食全餐紅牌出場兼輸12碼，莫拉達一射中鵠，追平1:1，我地打少個，兼且對手有作客入球優勢，我地先知大鑊。。。我地未企穩好，今次到龍門嚴重犯錯，出迎打空氣俾對方中場盧卡斯華斯基師偷到粒波後射入，我地已經落後1:2。全隊都垂頭喪氣，我同Roberto呢個時候企出嚟拍掌激勵，「COME ON！！ COME ON！！」 依然未見起息，我同佢都唔甘心就咁止步，於是將平時訓練嘅功力全部拎晒出嚟。除咗我會傳波俾佢，更多嘅係我會走前多半格同佢打one two，呢一年幾乎8成時間同佢練one two，而家大派用場。85分鐘時佢成功搏到12碼，追平2:2。比賽仲未完，我地要入多粒先至贏，95分鐘時我地有角球，斬出去後禁區內波子機解圍出嚟，由於我地龍門已經上前頂波，企禁區頂等遠射機會嘅我已經係球隊最後一人。我唔想輸，搏埋條命去追波，謝斯拎到粒波，不過佢猶豫咗，我就繼續衝，趁佢猶豫一刻我飛身落地剷走佢粒波。拎到波後我向前推順，見到遠處Roberto有入涉嘅意思，我大腳斬波去佢面前。皮球劃破翔空，身高矮細嘅Roberto起步定，然後再起跳，到拿祖發現時已經太遲，已經凌空緊嘅Roberto呢一刻高過佢，銅頭一搖，將個波批去遠柱，皇馬中堅同龍門都難以置信咁望住個波入網，Roberto依然好氣好力咁跑上看台慶祝，而我半死咁大字形瞓地，球證亦同時吹完場雞，艱難咁反勝3:2成功升班！

加速

定係加甜呢

加甜再加速

Why not both
不過想講樓主啲甜幾好睇

（七十三）

其實我都好想慶祝，不過頭先真係俾埋條命咁去跑，抖多抖先啦。Roberto同球迷慶祝完之後，眾裡尋他千百度，見到傳球靚波俾佢嘅我慢慢企返起身，就衝過嚟攬住我慶祝。呢個時候隊友們終於記得我存在，都走過嚟將我拋半空，全隊一齊沈醉升班嘅喜悅。

球季結束，代表我有時間返香港，除咗踢香港隊一場友誼賽，亦可以同同學聚舊。「係喎，我去完香港可以嚟澳洲搵你喎」 我將呢個諗法同Nicole講，
「都得，不過我house冇位啦，你租酒店？」
「好啊，你過嚟陪我瞓咪得」
「哼！」
「我一個人驚鬼啊」
「你慳啲啦」
「咁你會唔會返香港？」
「唔返啦，邊有咁多時間呀，同埋返去都冇咩意思」
「咁又係。。。好啦，我book定機票同酒店啦」
「嗯」
一諗起又可以同諧魚水之歡。。。但又諗起之後又要打半年飛機，心裡極度唔平衡。


屈指一算，原來都差唔多成年冇返過嚟。中學都已經進入放暑假前輕鬆嘅階段，反觀班同學個個焦頭爛額，擔心DSE成績唔好同前路迷茫。呢日，我同阿健都返學校探老師同學，脫離一年中學生活，加上同學著校服而我地著便服，咁感覺真係好唔自在，好唔習慣。我地中午喺班度叫PIZZA食，我望一望周圍，唔見當時非常熟悉嘅身影，原來Charmaine腸胃炎呢兩日都冇返學，有follow我ig嘅同學知道我同Charmaine散咗，就話佢真係病而唔係唔見我，因為前日早退時已經面青口唇白，呢個時候阿健拎住兩舊pizza行埋嚟，好大聲咁嗌，「嚟嚟嚟，食嘢食嘢，凍啦」 知我者，阿健也，明明我只係做個疑惑表現，同學係要懶醒咁多嘴。之後應老師邀請同師弟妹做個sharing，簡單講外國生活，平時嘅訓練，勸勉佢地有夢想嘅唔好放棄之類懶係勵志嘅說話。其實此行目係想同班舊隊友同老師一齊踢波，我地放學後就急不及待去球場。Sky，Mountain呢班人都好想同脫胎換骨嘅我地去鬥返場，咁當然我地水平已經拋離佢地，阿健可以撚到mountain ankle break咁跌低，至於我面對三文治夾擊亦可以從容不迫，睇準時機將個波輕輕撥一撥，再轉一轉身就成功擺脫。雖然有啲大蝦細咁，不過最開心始終都係同呢班打天下嘅隊友一齊踢。


當晚，我地踢到夜晚8點半先走，然後一齊食飯，返到屋企都10點幾。好彩，香港同澳洲時差相差唔多，返到屋拿拿臨沖完涼搵Nicole。「我仲以為你唔記得我添～」隔住個mon都feel到Nicole嗰種怨氣。
「邊會呢，踢波踢到不知時日過啫」
「估到你啦，好開心呢？咁耐冇見」
「咁你幾時跟港隊操呀？」
「後日」
「唔好失威俾人睇呀。。。」
「放心，一定一鳴驚人」
「咁你機票同酒店呢，搞掂未？」
「搞掂啦，轉頭send俾你睇」
「嗯」

Ex一定搵佢啦

（七十四）

我同阿健正式到港隊報到，唔知點解有啲老大哥好似睇我地唔順眼咁，隊內比賽照樣落腳剷阿健，一樣性格比較衝嘅佢即刻起身推人一下，「喂！練波洗唔洗咁啊！」
我同其他隊友見狀即刻過嚟分返開佢地，「小事啦健，我地喺外國都俾人剷唔少，足球冇眼啊」
「佢同我睇住嚟！」阿健嘅眼神狠狠咁啤住嗰條友。
隊友傳波俾我，我搵準機會放腳長波俾阿健去追，阿健拎波後，又係啱啱剷佢條友嚟守佢，阿健嘴角戚一戚，側身碎步助跑，右腳輕輕撥一撥個波，左腳踝掂到波再順勢撩起，粒波到屎忽高度左右，阿健右腳遞高再剔波一下，粒波直接完美拋物線向上，越過佢地兩人，阿健再加速去前面接波，完成一次彩虹過人，推順後再直接起腳彎入遠柱。阿健挑釁性咁對住人V字手勢，俾阿健咁樣侮辱，前輩即刻火起，「你係咪想同我玩啊？！」
「哼，我驚起你玩唔起喳～」阿健露出一個陳冠希式恥笑，我地見唔對路即刻再分開佢地，教練都叫佢地行出場邊訓話。
「喂阿健，教練講咩？」
「冇，佢話師兄係辣咗少少，大家同隊就揸手講和算啦」
「我諗班師兄想知我地外國踢波到底有幾多料子啫」


我同阿健返屋企嗰陣，收到同學打嚟嘅電話，「下星期四放榜啊，我地班星期三夜晚會約出嚟食飯啊，你同阿健嚟唔嚟？」
我將呢段簡單講一次俾阿健聽，佢點頭示意，
「可以啊，預埋我地啦」
「OK」
「到時見～」
返到屋企我將今日經歷同Nicole講，佢理性咁分析完，得出一個結論「班人純粹俾個下馬威你地，等你地知就算你地幾勁都好，都係要聽大佬枝笛」
「咁講又係，怕我地年少氣盛掛？」
「咁你地就要低調啲啦，始終有媒體訪問過出過名，傑志嗰啲分分鐘俾高人工吸引你地，咁班人咪唔gur囉」
「唉，踢個波都咁煩」
「社會係咁，冇辦法」
「係喎，下星期三晚同同學食飯」
「哦？你咪去囉，唔洗特登講啵」
「但係。。。」其實我驚佢會介意Charmaine喺度，但又唔知點講好，
「乜我似咁小氣咩？」估唔到佢已經睇穿我諗乜。。。
「我唔係咁嘅意思。。。」
「我唔會睇錯人，你去啦，夜返講聲得啦，我會早啲瞓」
「yes madam！」


當晚，我地約7點鐘旺角一間韓燒店等，我比較早6點40就到，本來諗住入去坐住等，但侍應話要過半人先入得，咁我就企門口hea等佢地嚟。我喺班group影張相話過半人數先入得，佢地都話我洗唔洗早成廿分鐘到，我地開始開玩笑咁話最遲食全部。傾咗2分鐘後，一把熟悉嘅聲音響起，「嗨，好耐冇見啦，阿佑」
本來低頭碌緊手機嘅我，一聽到呢把聲，成個人靜止咁，呆咗幾秒，忽然有隻手伸過嚟喺我眼前揚一揚，我先回神慢慢抬頭，「哈佬，好耐冇見啦」
「睇嚟你早到嘅習慣都係冇變喎」Charmaine依舊一副煞食嘅瞇眼笑。

加速

洗唔洗咁快

其實我想主角同番Charmaine一齊...

做過雞...
你係主角你接受到?

咁佢唔知架嘛
同埋 其實我硬係唔鍾意Nicole呢個人

喂你咁樣害主角
佢做過雞呢單嘢遲早實穿
阿健都知㗎bor

利申返 唔介意非處
但好介意有過sp/俾錢就上得

反正我覺得佢同Nicole做friend好過
Charmaine先有女朋友feel

正視聽，阿健知嘅只係Charmaine以為自己有咗食詐糊，唔知背後發生乜嘢純粹以為戴綠帽，唔知去到sugar daddy level

Sorry樓主
唔知好過知嘅

竟然中意隻雞多啲
啱, 笑窮不笑娼

健一定會傷

你係9up定睇到個伏筆位