(七十二)
我將呢個消息喺3人group內講,原來阿健都有收到邀請,咁就得啦,我地兩兄弟又可以拍住上。當然,而家首要目標係打贏次圈,如果唔係乜都冇意思。次圈對手畢爾包B隊,又係一場惡戰,每日收操後,我同Roberto都會留低繼續操體能同傳波,聽講球隊搵過佢傾關於升一隊嘅事,我非常羨慕,希望佢成名後唔會忘記我呢位戰友。
由於我地聯賽常規賽排名低,所以每圈我地都會作客先,不過咁樣反而有利我,因為我鍾意踢落後波,總會逼出小宇宙。今場波亦唔意外,上半場先落後1:0,下半場再輸多粒總數輸2:0。次回合返到主場,上半場我先罰球直射破網,下半場初段Roberto硬爆入禁區搏到12碼再自己操到射入。得勢不饒人嘅我地食住上,臨完場前Roberto同左翼嚟個撞牆之後勁射入網,最後總比數反勝3比2晉級4強,距離升班只淨兩場賽事。
4強對手係皇家馬德里卡斯迪拿,即係皇馬B隊,基本上係西丙星光熠熠,不過既然成為我地對手,即係佢地都係敗者,如果唔係就一早升班啦。雖然教練團對於對手分析好專業,但始終言語上有溝通問題,我都係交返俾我軍師負責。對手已經有球員試過喺皇馬1隊比賽,例如後防拿祖,前鋒莫拉達同謝斯洛迪古斯,真係前後都難搞。首回合我地依然先作客,教練希望主守,所以安排我後備。球隊上下一心,防守非常嚴密,皇馬兩個前鋒就越踢越急,不斷錯過機會,最後我地成功逼和0:0。
放虎歸山冇好後果,皇馬把握唔到主場優勢就等住被淘汰。上半場我地憑 Roberto入波領先1:0,半場喺更衣室大家都掩飾唔到喜悅,只係差在未慶祝埋。對手話晒都係皇馬B隊,點會咁易打沉,一開場4分鐘我地中堅大失誤,防線最後一人情況下拉跌莫拉達,結果食全餐紅牌出場兼輸12碼,莫拉達一射中鵠,追平1:1,我地打少個,兼且對手有作客入球優勢,我地先知大鑊。。。我地未企穩好,今次到龍門嚴重犯錯,出迎打空氣俾對方中場盧卡斯華斯基師偷到粒波後射入,我地已經落後1:2。全隊都垂頭喪氣,我同Roberto呢個時候企出嚟拍掌激勵,「COME ON!! COME ON!!」 依然未見起息,我同佢都唔甘心就咁止步,於是將平時訓練嘅功力全部拎晒出嚟。除咗我會傳波俾佢,更多嘅係我會走前多半格同佢打one two,呢一年幾乎8成時間同佢練one two,而家大派用場。85分鐘時佢成功搏到12碼,追平2:2。比賽仲未完,我地要入多粒先至贏,95分鐘時我地有角球,斬出去後禁區內波子機解圍出嚟,由於我地龍門已經上前頂波,企禁區頂等遠射機會嘅我已經係球隊最後一人。我唔想輸,搏埋條命去追波,謝斯拎到粒波,不過佢猶豫咗,我就繼續衝,趁佢猶豫一刻我飛身落地剷走佢粒波。拎到波後我向前推順,見到遠處Roberto有入涉嘅意思,我大腳斬波去佢面前。皮球劃破翔空,身高矮細嘅Roberto起步定,然後再起跳,到拿祖發現時已經太遲,已經凌空緊嘅Roberto呢一刻高過佢,銅頭一搖,將個波批去遠柱,皇馬中堅同龍門都難以置信咁望住個波入網,Roberto依然好氣好力咁跑上看台慶祝,而我半死咁大字形瞓地,球證亦同時吹完場雞,艱難咁反勝3:2成功升班!