(七十六)
分手一年,或者當初我地分開太突然,又或者我走得太急,我地好多說話都未講清楚。曲終人散,大家各自回家,最後行去巴士站方向只有我同Charmaine,「而家冇地鐵,我同你坐巴士返去啦,廢時你自己女仔一個危險啊」
「嗯。。。」
估唔到會再有機會同佢一齊坐巴士,佢坐入面我坐出面,我特登喺佢面前拎電話出嚟whatsapp Nicole,「我坐緊車啦」
「咁乖同女朋友報到吖?」Charmaine眼尾望到,明知故問咁問我,
「係啊,以前我送完你,返屋企嗰陣都會同你報到啦」
「其實同你一齊嗰陣真係好開心。。。雖然會有小拗撬,但每次你都會笑住咁講對唔住,等我下咗啖氣」
「係啊,因為唔想見到你嬲嘛」
「阿佑。。。」Charmaine知道有一種愛,明明想放棄,但無法放棄;有一種愛,明知係煎熬,但又避唔開;有一種愛,明知無前路,心卻早已收不回。
深夜旺角去美孚好快,唔洗一陣就落車,我唔知邊度嚟嘅諗法,「Charmaine,不如行陣公園啦」
「嗯,反正我今晚都應該瞓唔著」
行到去公園,我地搵張長櫈坐低,坐低之後我地都唔知點開口,於是我拎電話出嚟同Nicole報到,「我返到啦,沖涼hea多陣就瞓~」打完字之後我收埋電話,然後十手指下意識地交叉互相磨擦幾下,
「哈哈,你知唔知你講大話隻手會咁樣捽架?」原來Charmaine知道我呢個動作,
「知啊,我控制唔到,所以我講大話唔叻」
「一年前我地都係坐呢張櫈,你記唔記得?」
「記得啊,當時都好唔捨得對方」
「係囉。。。明明話會等,點解呢樣又唔記得。。。」Charmaine呢句充滿怨氣,
「sorry…」
「唔洗,你而家幸福就得」
「咁你呢?一路單身?」
「係吖,都話屋企人唔俾我拍拖」
「都而家呢個地步。。。不如坦白啦,根本冇呢個理由,你到底呃緊我啲乜。。。?」
「。。。」Charmaine眼神從哀怨變成恐慌,睜大雙眼不停顫抖。
我地再次陷入沈默,唔知過咗幾耐,Charmaine把聲震晒咁講,「我。。。對你。。。唔住。。。」嘴唇緊抿,逐漸變得扁平,最終成為一條直線,眼神亦唔敢再對住我。
「唔怪得你當時一直講對唔住,可恨我當時發現唔到,哈哈哈~你一直當我傻仔咁玩?」強顏歡笑不過三秒,我內心一沉,原來我一直俾佢當傻仔咁玩?
「唔係架。。。」淚水喺佢眼眶打轉,「當時已經好後悔,直到而家我都仲鍾意你,真架。。。」
「哼,枉我初初到西班牙咁傷心,全部白費,我一直都想忘記過去,但當我見到我地合照嗰陣,才發現心底仲留低一份想抹都抹唔走嘅回憶,每當我孤單,寂寞,好迷惘,需要人陪嗰陣,一句訊息都好,但你冇,因為你知道冇面目搵我,我而家先知當初一直期待緊空氣」
「阿佑。。。對唔住,對唔住。。。」Charmaine唔再忍,直接痛哭
「而家再講任何嘢都冇意思,係,我承認,心底內仲有一份真情存在,如果唔係我唔會為咗你呃Nicole我返到屋企,但呢份真情只限回憶,我會好好收埋佢唔再拎出嚟」
「我明啦。。。我唔會令你傷害到愛你嘅人,我都唔想傷害你女朋友」
「我記得當時我有懷疑過。。。?」
「係。。。」
「如果你坦白,或者故事嘅結局會唔同」
「你叫我點講得出口喎!」我都係第一次見到Charmaine力歇聲撕。
望到佢咁嘅樣,我開始心軟,應該咁講,如果佢一開始就坦白,我都會心軟,因為我性格好人,因為我對佢嘅愛大到可以包容呢件事,只可惜愛情唔係玩心理戰嘅地方,錯過咗就錯過咗。
Charmaine終於冷靜落嚟,「阿佑。。。多謝你愛過我」
「我冇後悔愛過你,一啲都冇」我只可以苦笑,呢種就係命運嘅安排?
「夜啦。。。我要返去啦」
「我送埋你去樓下啦」
「嗯」
臨入門口時,Charmaine擰轉身望住我問,「如果有來世,你仲會唔會愛我?」
我凝視佢,微笑點點頭。醉過才知酒濃,愛過方知情重,雖然最終我地成就唔到一段美好嘅姻緣,但我唔後悔,始終我地曾經無悔咁相愛過。
https://www.youtube.com/watch?v=41txh0FXTrk