(八十八)
雖然一隊操練強度大好多,不過我同roberto平時已經有練習,所以都算係跟得上。返到西班牙抖多個星期之後,球隊就出發去德國踢3場友誼賽。除咗隊內分組賽之外,呢度就係我表現嘅地方,頭兩場我都比賽末段後備入替,不過不失,第三場好啲,半場45分鐘就同roberto出場。呢場我同佢再次雙劍合壁,我助攻俾佢令球隊小勝1:0。足球唔係一人比賽,亦都唔係1+1=2嘅比賽,我同roberto正正就係1+1>2嘅例子。我嘅傳波同佢嘅走位配合,我諗真係要每日一齊操,仲要每晚同房瞓,先有呢種默契出現。
開季首圈對頭5輪我都冇正選,甚至後備落場嘅只有4場,貢獻一個助攻,慶幸嘅係冇乜失誤,所以第6場對弱隊我有正選打。我把握到呢次機會,拎到一粒入球,係禁區外放冷箭得手,至於搶截,協防,全部都盡力去做,我知道呢一切教練都睇得到,因為球隊一名中場受重傷時,教練俾更多機會我出場,去到第15輪我已經有4入球5助攻。之後國王盃第32強,我地只係對西乙,我同roberto亦難得一齊打足90分鐘,順利大勝4:0,同時令教練對我地兩個增加唔少信心。只可惜,喺聯賽第16輪我扭傷,要休息兩個星期,直接橫跨埋歇冬可以抖差唔多一個月,當然即刻叫Nicole改機票stay耐啲啦~經過佢悉心照顧,加上愛情嘅滋潤下,復出之時我春風滿面,狀態十足。
當我知道阿健隊波晉級英格蘭聯賽盃4強時,我忽然有個諗法,「阿健,你贏聯賽盃係咪可以踢歐霸嘅?」
「係啊」
「我贏國王盃係咪都有歐霸嘅?」
「係啊,唔通你想。。。?」
「係啊,你估有冇可能?」
「哈哈哈哈哈~你贏到再講啦,我呢邊4強只係錫周三,史篤城,同米杜士堡,我地要贏真係唔算難」
「睇住嚟~」佢講得啱,我地呢邊仲要踢皇馬巴塞等等強隊,一啲都唔易。 不過我知道一定得,尤其佢地未必會專注打國王盃,我地可以偷到雞。
隨後比賽我同roberto都成為常規輪換,無論球隊領先定落後都會換入我地。國王盃16強我地又對上西乙球隊,今場roberto正選攻堅大演帽子戲法,頭頂腳踢都有,全能到仆街,而我咁都r唔到任何助攻,不過冇所謂,晉到級就可以。之後一星期嘅八強我地對上西甲下游格拉納達,兩回合計僅贏2:1。不過有天大好消息,切爾達踢走巴塞,成為我地對手,另一邊兩邊由馬體會同皇馬撕殺,兩雄相遇必有一傷,呢鋪真係大好機會。同一時間,阿健亦都4強淘汰史篤城,決賽會對上米杜士堡。。。應該可以輕鬆贏。
「喂阿佑,你地4強幾時踢啊?」
「香港時間2月28凌晨4點,你呢?」
「早係4個鐘,你睇住我地捧盃啦~」
「預咗啦。。。大佬你輸米堡嘅真係會大力恥笑你」
「你地都係,唔好出局,我地要喺下年歐霸決賽鍊過」
「你放心,一定!」
講起上嚟我好耐冇睇過阿健比賽,於是趁我地比賽前有時間,我叫埋roberto一齊睇阿健直播,順便介紹阿健俾佢認識。我喺度諗,如果我攻中,雙箭頭阿健同roberto呢對一高一矮,一強硬一靈活,呢個三劍俠組合畫面會幾咁靚~而家嘅阿健已經唔係當時嘅佢,中學嘅佢會拉落少少做支點,然後派波俾兩邊sky佢地上,然後自己再跟上。而家嘅佢仲後生,可以用高速不斷跑動,隊友一個直線地波或者過頭波,佢就可以直接轉身去追然後帶入禁區起腳,簡單直接。加上佢有過米8嘅身高亦有一定制空力,可以用頭錘攻門,今季各項賽事加埋已經入超過10球。某程度都係嗰次喺香港受傷改變咗佢,而家佢改為第一時間觸球就去,唔再上腳扭,所以都幾啱踢英超,啲人拎佢同熱刺新星哈里簡尼比較都算係側面認可阿健嘅實力。Roberto見識到阿健嘅表現,知道自己將會遇到強敵,愈強越強嘅佢不會咁易認輸。最後李城憑阿健一腳靚入攝勁射破網順利捧盃,而稍後時間我地主場亦1:0小勝切爾達,首回合先拔頭籌。