(九)
我返到屋企等𨋢嗰陣,見到隔離屋嘅車厘子,咁嘅名因為佢英文名係Cherry,細細個幫佢改嘅花名,同佢打個招呼就冇講其他嘢,由曾經好好嘅朋友變成咁,都幾唏噓,某程度上都係因為阿健。Cherry細我地一年,當時佢小一搬嚟我隔離住,返埋同一間小學,所以會一齊返學一齊放學,亦都一齊玩。星期六日佢會跟我同阿健落公園玩,有時一齊捉依因,或者周圍跑,當我同阿健去踢波,佢就同其他小朋友玩,由於佢細我地一年,所以我地都當佢細妹咁照顧。對比起我,佢會痴阿健多啲,我唔知點解,後來大個啲問返佢佢都唔知點解,當我斷腳嗰陣,三缺一嘅情況下,佢地就成日都出雙入對咁,情況去到升中,我開始同Cherry少玩咗,但相反阿健仲會成日搵佢,有時會去埋佢屋企教佢讀書,希望佢考到我地學校,可惜阿健太出力,教到Cherry成績好到唔只入我地學校,結果佢揀咗一間好出名嘅女校讀。由於唔同學校,我同Cherry見面嘅時間得返喺屋企樓下或者等𨋢撞到,不過每次見都會有講有笑,分享下大家中學嘅趣事,佢仲話阿健成日都接佢放學,過多一年就聽到佢地一齊咗,應該都係雙方嘅初戀。我好祝福佢地,畢竟由細一齊玩到大,雙方都會好熟悉,可惜可能因為了解而一齊,亦因為了解而分開,佢地拍咗唔夠半年就散,之後可能因為尷尬,我同Cherry每次撞到都唔知講乜,驚佢見到我就聯想起阿健。當大家再升多年級,再忙啲,就好少再撞到,久而久之就變到而家咁疏遠。
「我撞到車厘子,我好唔明其實點解你地會散,我覺得佢人幾好啊」
「好個屁,可能以前我地錫佢,就晒佢,當佢一齊先覺得佢原來好公主病,控制慾好重,嘈多幾嘈咪分手囉」
「哦。。。咁我真係估唔到,喂陣間lunch食咩」
「大排檔啦」
「好啊」
鈴鈴鈴,終於挨過中文堂到lunch,我同阿健準備出門口,見到Charmaine同Kassie兩個翹手咁行,我問佢地食咩,佢地話落到去先諗啦,阿健無端端叫佢地一齊食大排檔,佢地又會話好,尤其Kassie呢啲離地女原來都會貼地食大排檔
唔知有意定無意,我地坐半邊圓枱,位置係健 我 C K
「點啊,仲未抖夠?個樣咁攰嘅,唔舒服?」
「頭好痛啊。。。可能感冒」
機會又嚟啦飛雲,如果我今次細心啲照顧佢,肯定喺佢心目中大加分,但我暫時諗唔到點做。
佢地叫咗碗粥share食,同埋一碟菜就我地4個share
「屌,做乜撩我食lunch,搞到我唔記得咗原本而家要做份通識」
講完佢就極速食完碟飯放低錢就走咗
Kassie擰轉望阿健背影幾秒,擰返過嚟問我「知唔知點解阿健分手嘅」
「唔知喎,好少同佢講起呢方面,不過阿健要搵女朋友唔難嘅,又高大靚仔口甜舌滑咁,係有時太鍾意踢波姐」
「你地嚟緊幾時比賽丫」
「後日係架啦,做咩?」
「有冇得去睇嘅」
「唔係話冇嘅,要去到樂富囉,你放學即刻嚟到都應該得返半場時間」
「哦~」Kassie個樣若有所思咁
我地食完就起身埋單走人,忽然諗到買藥比Charmaine,就叫佢地行先,我自己去7仔
上到班房,除咗見到阿健好努力咁做功課,就得返Charmaine一個,佢已經伏喺張檯瞓緊,睇嚟佢真係好唔舒服,我即刻拎平時裝運動飲品嘅水樽去小食部斟熱水,然後拍醒Charmaine
「喂喂喂,起身食藥先啦」
「咦你有藥嘅」
「係啊啱啱特登買比你,我裝水比你食啦」
我就擰開樽蓋倒熱水,然後摵粒藥出嚟遞比佢
「唔該」
「係咪頭痛啊,我幫你鍊吓」
阿健o嘴咁望一望我,然後繼續做功課。