【校園】【足球】【少甜】溝到女神後我決定......

死臭雞

（十九）

嚟緊呢場波嘅對手，係上年全場㩒住我地嚟打，只係臨尾輸罰球比我一腳收死，佢地今年有兩個甲組青年軍入去，係我同阿健喺青苗嘅隊友，大家都熟悉大家踢法，所以絕對係硬仗，我地嚴陣以待。
今次我地以433踢，阿健單箭頭，我中場中路推上一格打攻中，配兩個box to box逗住我，如無意外我應該會踢得幾舒服。
我地先攻，阿健拎到波嘅一刻，對面已經三文治夾走個波，睇嚟對面做足針對性部署。一路落嚟，兩邊攻勢唔多，都係中場膠著，對面起腳中龍，神貓即刻碌個波比禁區附近回防嘅我，我望準右翼走位，大腳斬上去，我相信右翼嘅速度，希望個波唔好比對方截到，我就踢大力啲等佢追，臨出界時佢追到，cup返轉頭已經比人包夾，勉強之下佢搏到角球，角球由左腳嘅右翼斬內灣波出嚟，Mountain頂到，比對方中堅柵到粒波彈出嚟鵝眉月，我順勢起腳勁射，粒波省中Mountain再反彈落對方防中，造成折射Z字型咁去龍門另一方向入波，半場領先1比0。

中場休息嗰陣，我地氣氛都比之前凝重，因為感覺到對方仲有後手，而且上半場我地都冇乜優勢，領先純粹好運。何sir收起左翼換個中場中落嚟，將阿健調去打左翼，然後我打上一格做輔鋒玩無鋒陣，我地都打個突，因為未練過呢個陣，呢個決定有啲冒險，佢解釋係利用我喺禁區頂做誘餌，想我cool波可以為兩翼拖時間，等佢地走位我交直線，甚至乎我扭入去射都得。比賽繼續，由於唔太熟，以致頭十五分鐘零攻勢，而我地亦都失守，比對面罰球直入。重新開波嗰陣，我地總共五人壓上，我帶住波喺離門四十碼左右已經比兩個人夾，我回後比中場然後攝上前面，佢再比個過到波我，我終於明白何sir用意，因為對面兩隻中堅都係勇往直前類型，見到有空位，我右腳輕輕督前，阿健拎到波左痴右右痴左咁，一下扭過三人，直接單刀面對龍門然後左腳輕力一燙就入波，我望到何sir一路用攝錄機影低我地，我諗係返去做參考。阿健亦好似解鎖左翼呢個選項，佢速度快，而且射波準，仲要雙槍，可以玩逆足左翼帶波去中間玩軌跡，或者爆落底用左腳傳中，只要佢練熟傳中，相信又係一隻頂級左翼。比賽繼續膠著直到完場，好辛苦贏二比一出線八強，但總算打咗枝強心針，因為嚟緊勁敵只有上屆分區冠軍，完場時何sir又再叫阿健去私下傾一陣，我見阿健今次神色好凝重，「喂，搵你傾咩？咁嘅樣」
「遲啲你就知」
「點解？」
「到時你咪知囉」
我見阿健行去同Kassie傾計，講講吓Kassie眼紅紅然後兩人攬埋一齊，究竟阿健搞邊科？

阿健jm9

去做g

（二十）

結果第二日，阿健冇返學，班主任講「阿健有兩個月都唔會返學住，不過佢唔係轉校，而係暫時休學，校長亦都批准咗，阿健叫我地唔好透露原因，咁我地都尊重佢嘅意思，如果你地想知原因可以私下問佢」
呢個時候全班望住我同Kassie，覺得我地應該知啲嘢，我唯有表示我都唔知。我whatsapp 阿健「喂你到底咩事，兩個月唔返，我地仲要打學界架」
「你地得嘅，就算輸上屆冠軍都仲有亞軍啦，入到精英賽啦」
「你都痴線嘅，邊有話實贏，咁Kassie呢？佢知唔知你做乜」
「佢知啊，佢會好支持我呢個決定，亦會好開心我有呢個選擇」
「屌，懶神秘，快啲返啊，精英賽唔可以冇你」

以前食lunch通常我同Charmaine+阿健同Kassie，而家阿健走咗，就變相我地3個，當然我地兩個都對佢地一齊嘅過程好有興趣「其實你鍾意阿健啲乜？」
「初時我鍾意佢夠型囉，後來識佢覺得佢好細心，到而家佢係好錫我架」
「咁佢而家走咗你地咪video call？」
「係掛。。。時間都唔係好啱」
「咩時間唔係好啱？佢究竟做咩」
「佢叫我唔可以比你知架，話你好快就會知，而且會行同佢同一條路」Kassie講完呢句眼神望向Charmaine ，Charmaine 黑人問號樣。
過多一星期，何sir搵我「西甲有隊波有個offer比你，去join佢地u19」
「吓？」
「阿健而家就係去咗英冠李斯特城，點解你好似唔知咁嘅」
「但係。。。咁如果隊波一時間走咗我同阿健，仲點踢到落去？」
「咁你放心，你嘅時間係6月，到時精英賽決賽都已經踢埋」
「我要詳細考慮。。。比啲資料我返去睇睇先」
原來係愛斯賓奴。。。仲以為係啲咩大球會添，不過我又唔係啲咩人，有外國u19已經算係咁，話唔埋真係踢得好可以上埋一隊，睇嚟阿健而家應該搏晒老命踢，而且仲好enjoy，我同阿媽講呢件事，佢只係話無論我做乜，唔後悔就得，當然最好踢到啲成績比佢威啦。呢個時候我又whatsapp Charmaine 「原來阿健去咗英國李城踢波」
「係？咁恭喜佢啦，佢一路都好想出國闖」
「我嚟緊都會去西班牙。。。」
「真係架？哇恭喜埋你，西班牙邊度？」
「巴塞隆拿」
「哇同美斯踢波牙你」
「市入面嘅愛斯賓奴」
「？？」
「巴塞隆拿係城市名，佢入面仲有隊波叫愛斯賓奴，我去呢度踢」
「總之都好犀利啦，遲啲你兩個會唔會做對手架」
「唔係冇機會架，踢歐洲賽咪得」
「嘻嘻，到時我實撐你嘅」
「飛過嚟睇我比賽咁好？」
「睇電視啦傻瓜」
「超，以為你咁神心，下星期八強記得嚟睇」
「知啦，到時提我啦」
講起八強，係時候要練多啲熟習少咗阿健嘅踢法，亦唔怪得何sir會喺呢幾場分薄阿健嘅功能，原來佢一早安排晒，練多啲踢熟咗，所以影響唔算好大，而我地亦1比0小勝對手晉級四強。

中學雞就出國踢波
俾人撞到散都似

諗起尼馬故

其實越早過去越好

（二十一）

「阿佑，之前個決定你考慮成點」
「ok，我去，我唔可以落後阿健嘅步伐」
「咁我就開始慢慢安排你過去同埋安頓嘅事啦」
「何sir，你幾時開始幫我地傾呢啲架」
「你知我一路好器重你地，所以今季見到你地咁好表現，就拜托當地人脈去幫你地，唔好令我失望」
「放心，我一定得」

下星期四就情人節，同時亦係四強，喺一齊溫書嗰陣我又膽粗粗問Charmaine「星期四晚得唔得閒啊，贏波之後同你去慶祝啊」
「唔。。。好丫」
我打聽到佢鐘意滿天星，於是我去屋企樓下訂咗啲滿天星到時送比佢，至於表白對白就。。。搵極唔啱心水，唯有全部抄低再慢慢組合。

場波好順利咁贏2比0，開完會之後我去搵Charmaine 「嗱，贏波啦，今晚你有冇想食咩？」
「吓我以為你有諗嘅添」
「咁當然有啦，不過我有幾個choice，你講你想食咩菜就得」
「日本啦，不過唔洗咁貴，普通得架啦」
「okok，你唔換衫？我諗住返去沖涼換衫啊，然後嚟你屋企接你」
「都得啵，咁一陣見啦」
為咗唔要Charmaine 等我，我9秒9衝返屋企沖涼換衫，再gel個靚頭，戰鬥格咁去搵佢。

去到佢屋企樓下，我whatsapp佢「我到你樓下啦，你ok講聲」
「我冇咁快丫，你上嚟等我啦」
嘩叫我上去咁大膽，不過又唔係第一次上，而且又唔會做到啲咩架啦。
「叮噹」
開門嗰陣，Charmaine 拎住白毛巾抹緊頭，佢身著住白色鬆身浴袍，胸前條隙若隱若現，我緊張到吞口水。
「我啱啱先沖完涼丫，冇咁快，你慢慢等啦，嘻嘻」
衰妹係唔係特登引誘我，好想除佢浴袍就地正法。
我去一去廁所交水費，見識到咩叫廁所大過廳，除咗有企缸，仲有浴缸，而且浴缸腳邊位放咗部電視，不過我最注目嘅係洗衣機旁邊嘅放衫籃，入面有粉藍色bra，而且有條白色little twin star底褲，我兩件都拎上手聞一聞，原來呢個係Charmaine 嘅體香，我亦手揸bra，發覺可以吸手，即刻扯扯地，我未至於變態到去偷，所以盡量將佢放返原位，出返去發覺佢房門虛掩，我攝手攝腳咁行過佢想裝一裝，見到Charmaine 坐喺化妝枱前化妝，早知早啲嚟啦，應該可以見到我想見嘅嘢，我好驚比佢發現，我就乖乖地出廳等
「丫！！！！」伴隨住大聲嘅跌嘢聲，我走入去佢間房「點啊你，搞咩啊」
「我諗住拎櫃頂個盒嘛」
「你唔夠高叫我嘛，起身先」
「丫！」佢睇嚟扭親腳
「我去搵冰幫你敷」
返到嚟我將佢隻腳放上我大髀，敷冰再幫佢捽捽「今晚唔好出去啦，嗌外賣啦」
「Sorry丫。。。」
「唔洗，學你話齋，地方唔同啫，都係做同一樣嘢」
「哈哈，又啱喎」
「有冇好啲？落嚟行幾步睇睇」
「好好多啦」
「多謝，冇你我唔知點算」講完佢就輕輕攬過嚟。
「傻女嚟嘅」我都攬返佢拍拍佢背「喂係喎，有嘢送比你」
我走出去拎花入房
「登登，鍾唔鍾意？」
佢好驚訝咁掩口，然後眼濕濕「你又知我鍾意滿天星嘅，好靚丫」然後又輕輕攬過嚟。
「當然，我對我鍾意嘅人不嬲咁上心」講嗰陣我口震震，之前完全冇諗過呢句，果然諗場都係要爆肚，佢聽到攬得我再實啲「阿佑。。。」
「Charmaine ，同你輸賭，贏分區冠軍嘅你就做我女朋友，輸嘅我就做你男朋友」
「哇咁你玩晒啦」
「係架」
佢冇出聲，只係輕輕點頭，我地攬咗大約一分鐘先分開。
「今晚想食咩啊女朋友？」
「咪住，都未踢完場波，你冇痴咁埋添丫，嗌非禮架」
「嗌啦，嗌破喉嚨冇人救你架」
我伸手擠佢腰，佢還擊，我地就瞓落床玩埋一舊
「丫痛。。。」
「Sorry啊，我扶你出廳」
時間尚早，我地喺廳叫完外賣就睇戲慢慢等
「走啦，廢時你老豆返嚟見到」
「好啦，拜拜」
我嘟起手掂吓自己塊面
「衰人」佢屹高過錫落我塊面「行啦你，返去同我講」
「得啦」
Oh yes，我得米啦！

（二十二）

第二朝返到學校，今日Charmaine 早咗返「咦你咁早嘅，唔等你老豆車你返？定係你太掛住我呢」
「彈開啦你，都話場波未完咯」
「做咩啫，咁惡。。。」我唯有以退為進，扮下風。
「唔係。。。我。。。」Charmaine 開始急，完全唔知想講咩。
「講笑喳，我似咁小氣咩」
「衰人，陣間繼續教埋我electric circuit嗰part丫」
「知道，遵命」
讀讀吓，我問佢「喂係呢，28號禮拜六你生日，嗰日留比我」
「你想點丫」
「同你慶祝咯」
「好啦」

嚟到比賽前一日，即係24號星期二，球隊呢段時間都不斷加緊練波，暫時隊波運作好暢順，士氣亦非常高。
當射完十球罰球後，我坐場邊休息準備一陣練戰術。
「嗨阿佑～」
「咦Nicole點解你會喺度嘅，你唔係喺澳洲咩？」
「我sem break返嚟啊，知你地聽日決賽，當然嚟醒啲嘢比你地啦」
Nicole喺中一二三都同我同班，仲要成日坐我隔離，加上佢係球隊嘅戰術大師，所以我地非常老友。與其話戰術大師，可能經理人會更加貼切，作為一個女仔，佢鍾意足球嘅程度同我差唔多，都係會睇波，而且討論足球嘅人，我諗係因為佢老豆係足球員嘅原故？佢中一自薦入足球隊，當時老師都覺得好驚訝，佢只係話唔係想踢波，而係為球隊出一分力，結果平時練習佢會幫我地準備補充飲品，比賽前會睇熟對手嘅比賽錄影，然後幫我地分析，佢往往分析得好好，都可以針對唔同嘅形勢比出唔同嘅建議。
「何sir～」
「喂Nicole，咩風吹你嚟啊？」
睇嚟佢又去同何sir研究聽日嘅情況，何sir聽咗陣，就叫我地開會，隊友見到Nicole都好興奮，係咁同佢打招呼，除咗因為戰友回歸，更重要係Nicole算係ig嗰種運動kol，面尖鼻高眼大，束起個all back頭，可能去過外國開放啲，佢上身著件sports bra，加件風褸，露件小蠻腰，腹肌若隱若現，馬甲線亦非常明顯，下身著legging，緊身到鮑魚位置亦都有少少形狀，令人想入非非。
佢一臉認真咁同我地講聽日嘅對手「嗱，查咗對方啲資料，佢地今年有個港青級嘅前鋒入隊，佢唔似阿健咁高大，而係米7鬆少少嘅靈活型，而且佢跑得非常快，中場成日比身後波佢去追，所以Mountain聽日你千祈唔好失位，唔係你追唔到佢。至於對面弱點係左閘，大傷完出返嚟未係top fit，聽日要攻擊多啲呢個位，打破缺口，龍門嘅話佢同神貓都係今屆top 2，如果阿健射得入神貓，就一定射得入佢，咦阿健呢？」
「佢。。。」
「算啦唔理佢，肯定蛇王緊，至於對面其他人都冇變過，逐個秤我地唔一定輸，聽日要一定要贏啊，加油！」
「加油！」我地眾志成城一齊嗌。

Nicole

姼

（二十三）

聽完Nicole分析，我地都練多啲右路攻擊，希望打穿佢地條左路。
「何sir，阿健呢？」
「佢去咗李城踢波」
「吓咁正？幾時嘅事嚟架？」
「都係呢個月喳」
「咁隊波而家應該習慣少左佢啦？」
「係架，咁當然臨門一腳係差少少，不過都盡力啦，阿佑之後都會出國」
「吓，佢又去李城？幾時去？」
「兩個幾月後，完埋精英賽就去架啦，佢去愛斯賓奴」
「佢兩個開心啦，算係圓咗自己嘅夢」

「呼。。。好攰啊」我行去看台休息
「嗱」Nicole好似知我想飲嘢咁，將枝嘢飲拋比我，仲拋條毛巾比我抹汗，佢最好就係呢一樣，總會知道你最需要乜。
「你爽啦，去西班牙踢波」
「係架，贏埋精英賽冠軍就去架啦」
「講到贏硬咁，不過我信你地ok嘅，阿佑著8號，阿健著10號，舞台係英國，你以前成日同我講你地要遵守嘅一個夢境，睇嚟要成真啦」
「成真三分二啦，另外最重要嘅三分一唔喺度都冇意思」
「我諗佢見到都開心嘅，哎最衰小學唔識你地，唔係我同佢應該做到好朋友」
「無論幾好朋友，佢最fd只有阿健一個」
「真係好想認識吓佢」
「你聽日嚟睇架可？」
「當然啦，咁重要點少得我，連續兩年四強出局，今年入到決賽點都要贏，你地一定掂」

返到去我whatsapp Charmaine聽日嘅時間地點，然後whatsapp阿健「今日Nicole嚟咗」
「咁開心？佢特登飛返嚟？」
「sem break飛返嚟睇，我諗去到精英賽佢都會喺香港同我地一齊，忽然間成個人好hyper」
「屌你啦，唔好見到Nicole唔記得隔離嗰個先得架」
「痴線啦，點會」
「你要知道佢係對你搭糖的，你冇得唔認」
「我知，我亦都認我對佢都搭過糖」
「屌你啦想3P?Charmaine知唔知你兩個以前嘅事？」
「乜以前嘅事啊？冇發生過任何嘢」
「唉屌你自己搞掂佢」
呢排因為練波多，的確係有少少忽略咗Charmaine 嘅，所以我打比佢
「喂？」
「哈佬～」
「做咩打嚟嘅？」
「冇啊，掛住你咯」
「哼，口花花」
「話咗甜到你有糖尿病嘛」
「係啦係啦，你今晚好好休息丫知唔知？」
「遵命～聽日會贏波比你睇」
「嗯，唔講啦拜拜，聽日見」
「嗯，聽日見，拜」
25號，下午2點，我執好晒嘢起身離開班房，同學同老師都幫我打氣，Charmaine 就舉起v字手勢。

去到球場我地把握時間熱身練波，Nicole拎埋戰術版喺手同何sir討論緊。何sir叫我地圍圈坐，「嗱我冇咩嘢好講，大家嚟到呢一步辛苦架啦，無論贏輸都唔重要，最緊要盡全力，星期五晚我地去慶功宴！」
「好！」

好緊張

唔好quote文

live咗

（二十四）

上半場雙方都踢得好緊湊，盡量減少犯錯，就算唔入波都唔失波，控球百分比大家都55開。十分鐘左右，對面港青前鋒拎波，單挑Mountain，Mountain冇殺上去搶波，而係慢慢跟前鋒節奏小碎步退後，前鋒突然後腳傳後，然後跑去Mountain身後，Mountain估到佢意圖，即刻大步向後退，對方中場拎波即刻傳一腳過頭身後波，由於Mountain跟住前鋒起步，所以兩者距離冇拉太開，Mountain同前鋒同時跳起，Mountain身高優勢頂到波，波跌落嚟再一腳清走，非常清脆，前鋒身形完全唔夠Mountain，俾Mountain咁樣空中壓一壓，成個人落地就失去平衡，半跌喺地上，Mountain以一個勝利者姿態居高臨下望住佢，呢一刻Mountain可以確認係我地學界分區最強中堅席位。二十分鐘時候，對方左路發難，扭過我地右閘然後落底線，對方左閘上嚟做個支援，拎到波然後地波傳中路，我地右中堅走甩咗港青前鋒，俾佢起到腳射地波去龍門遠柱，神貓秒速反應落地接實粒波，睇嚟佢都可以確認最佳龍門呢個席位。Mountain右手做個hold住嘅手勢，示意右閘同右中堅定啲嚟，平時後防4人都係靠佢指揮，自此對面亦再冇攻勢。臨完半場前，我傳比右翼sky，佢先跑贏對方中場，然後左閘過嚟落地剷，sky快腳督前個波繼續跑，左閘直接剷空氣。
「好波丫sky！！！」Nicole把聲響到由場邊傳過嚟，原本坐喺度嘅後備同教練全部激動到起晒身，一直以來sky都只係被視為阿健嘅副手，明明佢都有港青實力，但永遠冇機會做主角，所以佢實力往往發揮唔到十足，阿健嘅離隊係一個機會令佢解放全部實力，呢一刻教練團可能會覺得將sky作為主得分點係賭博成功，但根本唔係賭博，而係佢有實力成為球隊嘅主力得分點，呢一連串過人嘅背後落咗幾多苦功，只有佢一個知道。
前面無人地帶，後面中場依然緊追唔停，sky控定粒波同佢單挑，左腳輕輕撥一撥，撥過中場之後向中間推進，推多幾多，sky喺龍門前一堆人搵到唯一路線，於是用力督前個波少少，就好角度之後左腳大腳一抽，粒波食中佢腳趾公落嘅旋轉，龍門鞭長莫及，1比0！
入波之後sky興奮到除衫剷草，呢一刻佢終於一吐烏氣，證明到自己嘅實力。
「wow，好波好波」我地走過去同Sky慶祝
「喂屌咁撚勁嘅」
「下半場照咁踢啦，佢地左閘真係一個缺口」
「加油加油，打埋下半場就得架啦」sky入完波，大家士氣非洲高昂，領先一球完上半場。我地坐場邊做一個半場檢討「各位好波啊，keep住落食住上，贏埋作地！」
「好！」
呢個時候Charmaine 嚟到，我同佢眼色示意，佢行去看台，我諗住行過去嗰陣佢舉手示意我唔好過去，咁又係，呢個時候要暫時放低兒女私情。我背住佢舉起右手手指公，就行返出場邊。

好型呀

（二十五）

「咇咇」下半場開始，對方換走左閘，換一個中堅落嚟轉打三中堅陣，三中堅中路防守好密集，好多時我拎波已經有人拍埋嚟逼我，又或者sky比人mark死晒我傳唔到。膠著二十分鐘左右，對方沿左路推進，想嚟個強行突破，mountain殺上剷波，清波時省中左翼再反彈落自己到然後彈出底線，輸一個角球。角球彎出嚟去到後柱，對方中堅走空咗升起一頂做二傳，港青前鋒唔知邊度走出嚟接應，再大腳一抽，球速快到神貓撲到都入，追平1比1。比賽繼續，雙方繼續有來有往，我喺中圈前面位置接應mountain長傳，推進十碼然後傳身扭過防中，我大嗌「sky！2仔！」2仔係2號戰術，佢會喺禁區右邊K角起步，跑向中間鵝眉月位，我會諗盡辦法傳去嗰個位置比佢，今次對方中堅殺上嚟，我唔可以比過到波，唔係會省到佢，於是我向左轉身護球，用右腳右指尾腳外檔片個波埋去，個波彎過中堅倒西落sky腳下，sky接應推順，半單刀狀態之下起腳。
「砰」粒波中內柱然後龍門沒收。
「哎呀」我地所有人都好可惜，時間越嚟越少，不過兩邊防守再冇任何犯錯，比數維持1比1進入加時。

「sorry啊唔入」
「唔好咁講，龍門企位靚你焗射果個位，陣間再入咪得」我知道sky已經盡咗力，今場比賽嚟到呢個地步佢無疑係最大功臣。休息時何sir都冇講太多，叫我地休息多啲，而Nicole拎袋冰過嚟俾我「得十分鐘，快啲敷左腳腳腕」
「你又知我呢度痛」
「你踢波都仲係咁拗隻左腳，遲早連呢隻都出埋事你真係唔洗踢，叫你加強訓練又唔聽，去到西班牙點夠人爭」
「知道啦，我會去練」
袋冰敷五分鐘，已經feel到左腳腳腕輕鬆好多，冇咁緊，Charmaine 從看台走落嚟「點丫你，冇事丫嘛？」
「冇嘢，好攰啫」
「你一定會贏架！」
「當然啦」
「今次到我幫你按摩啦，趴底！」
「噢。。。好酸啊，係呢度呢度，嘩屌。。。你又識按嘅」
「我跳舞都會咁按」
按咗三幾分鐘，情況好好多，有咗愛情嘅滋潤，我又滿血出場。

（二十六）

加時上半場對方好似想摸和踢十二碼咁，踢到好保守，我地亦都真係好攰，結果就咁老鼠拉龜到加時下半場。一開波對方瘋狂搶攻，原來佢地根本唔係為摸和十二碼，係儲力為呢段時間，我地未習慣到個節奏，非常騰雞，sky呢個時候抽筋，我過去幫佢拉。
「仲頂唔頂到」
「冇事，5分鐘啫」
「嗯，殺埋落去就得」
最後一分鐘，我地防中傳波俾我，睇嚟真係太攰，個波完全唔夠力，港青前鋒半路殺出嚟截波，防中知道出事就上前攔截，對方攻中上嚟同港青做個one two，我地防中完全企喺度比人輕易過咗，又到港青同mountain對決，mountain集中力非常高，完全唔比佢空間扭波，港青無計可施，選擇傳比左翼，呢個時候冇人注意到對方中堅已經走到我地禁區頂，左翼直接大腳傳中，中堅升高一頂，神貓撲出不遠，中堅上前想補射，神貓衝上前大字攤開，粒波省中神貓心口再彈出嚟，可惜粒波去到左翼腳下，神貓未起得切身，佢半空龍下射入，我地落後1比2。

法定時間過咗，進入補時一分鐘，我同sky強行突破，我接應想轉身，對方中堅拉跌我，喺離門廿五碼位置我搏到罰球。神貓上嚟準備頂波，我擺定粒波，抖大啖氣「呼。。。」我個心跳得好快，好緊張，我向後五步，起跑，右腳尾三隻腳趾位置掂波落旋，粒波外旋飄向龍門左上方。
「同我入啊！！」只係，粒波下垂力唔夠，冇向下曲墜，「砰！」中眉頂之後彈出底線，我瞬間絕望坐落地下，怪自己偏偏呢個時候處理咁差。對方龍門大腳開波，「咇！咇！咇！」球證瞬即吹雞完場，我地輸1比2，全隊都攤晒瞓落地，而我望落好堅強咁企喺度，但其實我個腦仲係空白一片，何sir大嗌「過嚟啦」我地先慢慢行過去。
「踢得好好架啦，呢場對面值得贏，我地都有不足，精英賽繼續努力啦」何sir冇怪我地失機，而勉勵我地再加油。
「打多一次我地一定贏」Nicole充滿怨氣咁講。
「打3次我地一定贏兩次」Sky應佢。
「打5次我地一定贏四次」今次到Mountain。
我好無奈咁望何sir，點知佢「打10次贏九次！」冇計啦，一球中柱一球中眉的確唔抵。
「點呀佑哥，唔好咁自責啦，你盡咗力啦，都唔關你事」Nicole走嚟安慰我
「唉，明明罰球係我最有信心，偏偏最後關頭腳軟」
「所以咪話你腳訓練唔夠囉～」
「知道啦。。。我會好好訓練，唔會令你失望多一次」
「知就好啦，仲下巴輕輕話我喺澳洲返嚟睇你地捧盃，嗱呢個捧唔到唔緊要，精英賽再輸就唔放過你」
「我地拎唔到冠軍，要打首圈，希望今年突破到首圈啦」
「我返去諗定個plan你復活節跟住做啦」
「Yes madam !」

學界有加時

冇直接十二碼