【校園】【足球】【少甜】溝到女神後我決定......

（佑三，緣聚緣散）

作為一名專業球員，我唔可以揸流攤，因為件事未去到冇彎轉嘅地步，可能仲有得救，而且如果真係專會，就更加要踢好啲證明自己身價，風風光光咁走。歐霸盃32強同16強先後淘汰對手，晉級8強對史浩克04。至於聯賽方面，由於國王盃出咗局，因此可以專心聯賽，所以我地已經連續咁不敗，可惜係和波比較多，大意失分唔少，聯賽排名反而跌落第4，不過起碼叫攻力冇問題，我地三叉戟繼續火力全開。


我都唔明班人點解咁玻璃，而家每場主場都會出現YAU OUT嘅標語，甚至乎我部車會俾人貼標語。明明我想冷處理，但偏偏佢地唔俾件事冷靜落嚟，而球會亦唔從我嘅角度出發，唔會出嚟包庇我。甚至球隊內部亦開始出現兩種聲音，一種係外地加盟球隊嘅球員，佢地比較親西班牙政府，覺得我係搞事。一種係本地球員，直情有踢到加泰代表隊，本土意色相當濃厚，摩蘭奴係基中之一。佢喺巴塞市出世，踢愛斯賓奴青年軍，同時代表加泰隊，所以呢件事上好撐我，覺得我只係表達自己意見，唔應該受到咁無理對待。

人情冷暖，世態炎涼，算啦，此處不留人，自有留人處。嚟緊聯賽作客去到巴塞，又係報紙大造文章好時機。呢場波我地輸1:0，不過場外八卦新聞比場內比賽更受關注，口水佬碧基繼續出聲，話巴塞嘅球迷唔會因為政治立場排斥球員，所以明明係我作客去魯營球場，居然出現支持我嘅橫額。。。嘩，咁樣擺我上檯，媒體已經寫到我會轉會，咁樣同當年法比加斯笠波衫事件冇分別。但係我又幾享受，哈，估唔到我都會有咁嘅待遇。


歐霸再次打入4強，對手係里昂，首回合輕鬆贏4:1，我貢獻兩助攻。話咁快，今季我又係雙雙，各項賽事到而家有11入球，18助攻。因為大比數領先，次回合我地心態放鬆咗，居然落後到1:3，總比數5:4，我地僅僅領先1球，我地先至如夢初醒，咬緊牙關守到完場，好彩企得住陣腳，冇再失波，有驚無險咁晉級決賽，將會對曼聯。


西甲順利完成，我地今季再進一步，排第4，拎到歐聯資格，而我喺助攻榜排第3，有11個助攻，同時有8入球，呢個數據令我首先進入賽季最佳陣容嘅正選。我同球練講咗想離隊嘅意願，佢表示明白我處景，尊重我決定，始終我都叫為球隊立下唔少汗馬功勞，所以唔會難為我，大家好來好去。而巴塞亦都真係派人接觸我，我地傾好條款細則之後決定完埋歐霸就正式簽約。2000萬歐元轉會費，4萬歐週薪，算係咁啦，冇得同英超神射手阿健相比。歐霸決賽對曼聯，我盡晒力去踢，可惜最後輸2:0，我再次成為激端球迷眾矢之的，話我冇心踢。屌！睇嚟我決定相當正確。

架車？

買咗部車仔代步唔係太重點，基本上10個球員10個有

文呢

而家

（佑四，整裝待發）

巴塞官宣我加盟，我嘅鬧劇終於告一段落。我返宿舍執好自己嘢，去同隊友道別。回望呢幾年，由青年軍到而家成為球隊主力，轉埋會，不知不覺呢度成為我第二個家，話走就走真係有啲唔捨得。現實就係咁殘酷，係時候抬起頭繼續上路。我揸車離開基地時，見到有幾個球迷拎住波衫搵我簽名，話goodbye and thanks YAU，都有少少感觸，遺憾嘅係未能為球隊更進一步，遺憾嘅係會以呢種方式離開。


我知自己幾多斤兩，講到要接恩尼斯達班，我完全未夠料，不過我可以為巴塞帶來活力。我嘅組織功架同閱讀球賽能力都相當唔錯，可以供應準繩度極高嘅傳球，亦可以完美咁調控比賽節奏。除咗有雙雙成績，我亦有91.5%傳球成功率，場均1.3次關鍵傳球同4.8次長傳次數，至於罰球。。。有美斯喺度我唔會踢到架啦。。。


我喺市內租咗間屋，其實唔係唔想買，不過租簡單啲，同埋冇時間去搵屋。於是，暑假期間趁得閒我不斷睇屋，既然有結婚打算，點都要接埋Nicole嚟住，所以唔可以鳩揀，廢時佢唔鍾意。最後我決定喺距離市中心唔遠地方買間house，裝修嘅話我同佢鍾意白色，就用白色做主調。「你搵一個星期過嚟睇間屋啦」
「知道啦，度緊schedule啦」
「養唔養寵物？」
「住落再算啦」
「你識揸車嘅買多部細車俾你代步？」
「呢啲慢慢先算啦，搞掂裝修先啦，未得我同意千祈唔好亂嚟！」
「係係係」
估唔到佢對裝修咁講究，我諗住簡約風，睇嚟佢諗住高貴風，望一望我戶口。。。好彩而家轉咗會，嚟緊呢季會賺多好多，唔係一係買完屋冇錢裝修，一係買唔到心水屋。


「wow，現場睇靚過相睇喎～」
「我眼光係咪好掂呢」
「算你啦～」
「就係掂先揀到你」
「呃。。。」
間屋兩層高，有個花園同泳池，地下係車庫，車庫後面係飯廳同活動室。至於二樓係客廳同睡房。基本上全屋重新裝修，所以工程量好大，有排都未住得。去到呢一刻，其實就算我把口唔講，Nicole都明顯feel到我會想同佢一齊行之後嘅路，佢冇抗拒亦冇任何表示，我就當佢同意架啦。至於求婚，我好早就決定喺2000日求，話咁快下年就係，係時候要諗諗點求好。


隔冇幾耐，祖雲達斯都官宣roberto加盟，嘩。。。估唔到條友仔唔聲唔聲啵。佢去意大利之前我地食餐飯，原來祖記上年已經搵過佢，不過佢都係想同我再闖多年，無悔無憾咁離開。結果西甲打入前4，歐霸入決賽，老實講，都算有個交待，加上我走人，佢都冇藉口再留低，所以決定去意大利尋找新挑戰。再隔冇耐，曼聯都官宣阿健加盟，我地3人同一年接受新挑戰。

靚車？

NICOLE 有左

（佑五，可能係啦）

呢日冇乜嘢做，喺屋企執返啲封晒塵嘅嘢，廢時將來搬屋太多雜物，望到幾本相簿，以前嘅片段瞬間湧現。
「喂阿佑，你估我地將來係唔係做球員？」喺港青，阿健曾經咁樣問我，當時我地仲細唔識世界，但佢對於踢波充滿夢想。
「可能係掛」
「冇信心？定係唔想做？」
「你好想做球員咩？」
「我想架，我想踢曼聯，拎英超，拎歐聯，做球王」
「嘩，你發白日夢好啦，吹到咁偉大」其實我都係因為阿健，而開始去幻想自己做職業球員嘅畫面，唔知我可唔可以好似碧咸咁一腳罰球收死希臘？
「我做前鋒，你做中場，你一腳過頭波俾我，然後我窩利抽射，一齊捧盃」
「遠嘅唔講，近近地中學一齊贏個學界」
「一於咁話」


重傷過後，我終於踢得返波，令本來已經熄滅，一齊染指學界冠軍嘅希望又再重燃。康復過程非常辛苦，全靠信念先撐得過。校隊只有阿健一人苦苦支撐，所以中一學界成績好差，完全係前面入兩球後面失三球嘅情況，我嘅加入再次激發佢嘅鬥志。「阿佑，今年係唔係可以升D2啦？終於等到你加入」
「可能係啦」
「咩可能，係一定」
我同阿健嘅默契係由細到大一齊踢波培養，反而性格其實唔係好關事。我地兩個性格好強烈對比，佢好多嘴，我好冷靜；佢好剛陽，我好陰柔；佢好果斷，我好婆媽。但可能因為咁，大家都互補到對方不足，佢衝動時我可以叫佢冷靜返，球隊需要激勵時佢又可以企出嚟鼓舞人心。比賽球場上嘅默契，球場外嘅陰陽互補更顯重要，可以令成隊波一齊進步。


「阿佑，聽日場波贏咗，我地就拎精英賽冠軍啦，係唔係？」精英賽決賽前夕，我同阿健兩個練完波後唔捨得走，大家都好緊張，唯有互相傾訴去抒緩緊張情緒。
「係！贏撚硬！」
「仲以為你會答我可能係添」
「唔可以次次都可能嘅，聽日輸埋我地就冇機會，我地唔可以輸」
「我地一齊踢波有冇十年？」
「如果你計埋幼稚園，就超過」
「聽日場波，唔會係我地最後一次合作架可？」
「一定唔會！」


時而勢易，我同阿健嘅合作而家得返香港隊，更多嘅係作為對手。而家佢喺曼聯，我喺巴塞，如果好似之前咁又喺歐洲賽淘汰賽碰頭，今次我一定唔會放過佢。「睇緊咩呀？入晒神嘅」Nicole從後攬住我，我先知佢入咗嚟。
「冇，睇緊啲舊相啫」
「我要睇～我都未睇過你細個嘅樣」
話口未完，佢已經搶咗本相簿，入面有我bb出浴照，唉。。。
「哈哈哈，你細個好薯呀，隔離係阿健？你睇人地幾型，你就成個薯仔咁」
「而家我型咪得囉，理得我細個啫」
「咁而家你的確幾型嘅～咁我係唔係全世界最靚先？」
「可能係啦」
「妖！」
同Nicole耍花槍永遠都唔會厭，對於新球季嘅不安，同佢相處嘅時間都會將呢啲不安一掃而空。


球季終於都開鑼，我著21號，人才濟濟情況下要先列後備，靜候一鳴驚人嘅一刻。

21號 迪莊

push

都話阿佑=阿佑，21號係咁啱姐，以前愛斯賓奴都著21如果真係要講嘅會係強化版艾法美路

阿佑有無得同阿健再合作

可能會啦

一齊去祖

點知去傑志

衝擊亞冠

加速

（佑六，失誤了？）

走咗尼馬，換來丹比利，球隊依舊踢433，中場線3人我冇正選，通常都係等恩尼斯達落場休息先會換入我，所以我非常珍惜每一分每一秒。初頭幾場我表現一般，始終未係咁夾，而且球隊重心唔放落我度，所以我純粹做個駁腳。估唔到丹比利大腿受傷要休息4個月，球隊轉打442，前場就美斯蘇，中場變成我同恩尼斯達，我做靠右嗰個。以前就算我踢中間攻中，我好多時都會靠左邊搵食，因為我覺得自己逆足左路出波會好啲。不過，而家靠右先發現原來順腳出效果更好，我一腳過頭波彎入禁區，蘇亞雷斯衝頂破網，呢一腳傳球甚至被傳媒形容成碧咸七旋斬再現，完全始料未及。教練見效果相當唔錯，就繼續呢個陣容，而我成功企穩正選。


以往喺愛斯賓奴我會多回防，因為球隊防守力唔係好好。而家喺巴塞，企我後面嘅兩個中場分別係拿傑迪鍚同布斯基斯，完全成為我背後嘅屏障，加上恩尼斯達年華老去，活力已經冇以前咁好，於是年青力壯嘅我唔洗有太多防務，只需集中前場進攻，我可以踢得比以前更開放。美斯好好夾，好肯同我配合，而且只要我走到位，佢就9成都俾到我，我再同蘇9做配合，變成另一組非常強橫嘅三叉戟。


一月份球隊簽入古天奴，唔影響我嘅位置，因為佢嘅角色係接棒恩尼斯達，所以左攻中變成佢，唔會搶我右攻中位。夾慣夾熟後漸入佳鏡，殺入歐聯8強對羅馬，祖雲達斯同曼聯都一齊入到8強。除咗我再攀高峰，roberto同阿健亦冇怠慢，兩人都係各自聯賽榜首兼神射手。我間屋經過幾個月裝修，終於正式住得人。只可惜枕邊人已經空空如也，我就嚟等唔切2000日，好想聽日就係。


球隊打入歐聯4強，對手正正係祖雲達斯，同roberto對決嘅一日終於來臨。唔知係咪我分心準備2000日，呢兩場聯賽我都神不守舍咁，毫無表現，下半場好快被換走。不過，教練依然對我投下信任一票，我可以喺首回合作客正選出場。祖記韌刀十足，可以同我地爭奪中場，而我就仍然冇乜起色。30分鐘左右，我喺中圈拎波，諗住傳俾古天奴，估唔估面對面都交失，roberto偷到波打反擊入波，落後0:1。落後嘅情況下我越踢越急，結果臨完半場我喺禁區頂犯規，比真歷直射罰球破網，落後0:2，呢兩球都係直接因我失誤而起。。。教練頂我唔順直接半場換走我，最後首回合落敗0:3。賽後roberto搵我握手，佢睇得出我唔在狀態，希望我快啲pick up返，下星期可以完整鬥返場好波。


Nicole過兩日嚟到，一見面當然俾佢屌兩屌，話晒佢電視直播睇到我首回合醜態百出。「我同你講，下星期我親自到球場睇你，唔該你醒醒定定啦～」
「放心啦，唔會令你失望」
「陣間見到間屋，好期待呀～」
「你肯定嚇一跳」
「哼，唔send相俾我，懶神秘。如果唔啱我心水，你今晚瞓廳啦！唔準掂我！」
「饒命啊。。。」

求樓主寫求婚寫得詳細啲

一定啦