【校園】【足球】【少甜】溝到女神後我決定......

咁快完

完左？

push

下仲有無

其實仲有每個角色外傳主線呢個位完架啦，係時候交代返幾位主角唔同嘅事，因為功力唔夠合埋一齊講所以分開用外傳方式去講，不過外傳今晚冇，要聽日先，因為一來今晚比較忙，二來要proofread同埋睇下有冇bug位，因為本身個故添食咗，同本身寫定嘅外傳有幾大衝突

仲以為會熱血奪冠之後先完
咁外傳睇黎都係Nicole同Charmaine

想睇兄弟對決

nicole

唔係冇機會嘅，吊一吊癮先

幾時出文

now

（Nicole１，冀盼的久別重逢）

初到墨爾本，我喊足一個星期，我唔慣咁樣自己一個生活，唔慣冇屋企人喺身邊。好彩室友都好細心，好體貼照顧我，仲教我英文。唉，本來我讀書麻麻，就算讀英中，啲英文都冇乜好過，尤其oral同listening差到根本同唔到外國人溝通，難得適應到生活，又要適應語言。其實香港學嘅嘢真係難啲，我而家high school學緊嘅數喺中2已經學咗，所以我數學都幾高分～哈哈，本小姐要拎返啲自信先得～


哼，死人馬天佑，明明我都暗示晒，點解仲係唔肯講佢鍾意我喎。。。佢唔係都鍾意我嘅咩？定係一路都係我自作多情？唔會嘅。。。頭2個月，我仲未同班人啲人熟，所以比較cool，係有次sports day玩4x100接力之後先開始多嘢講。我本來就鍾意跑步，加上細個學過體操，運動能力其實都好唔錯。我跑最後一棒，第3棒交棒時我地只係落後少少排第3，我接棒後望住終點係咁衝，超越第1線選手，仲有第4線要追，只差少少，平排啦，壓線！衝線後我道力太大收唔切，結果成個人向前仆，手腳都擦損晒。結果公佈，我啱啱壓線先，贏到4x100接力，我地4個開心到抱住慶祝。班上其他人都嚟恭喜我地，其他人亦開始留意到我，會開始撩我傾偈同埋玩。有個叫Gordon嘅上海男仔仲好錫我，成日約我跑步同去街，約過幾次之後，覺得佢份人好唔錯，跑步時會帶水同毛巾俾我，出街亦會帶紙巾，呢點加好多分！以前馬天佑淨係識喺我度拎，都唔見佢準備嘅。


呢日Gordon帶我嚟海灘睇日落，「漂亮吧？」
「嗯，很漂亮」
「像你那麼漂亮」
「哈哈，你是故意逗我的吧？」
「不過在我眼中，你是最漂亮的」
「你的意思。。。？」
「對，Nicole，我喜歡你」
死啦。。。咁樣俾佢表白，雖然對佢冇乜意思，但個心噗噗跳添。。。我都feel到佢想溝我架啦，只係估唔到表白咁突然。
「呃。。。我。。。」
突然，Gordon從後攬住我，我有一刻心動嘅感覺。
「抱歉，我。。。有點。。。不知道怎麼了。。。」雖然心動，不過只係剎那間就冇，因為，我心入面一早有另一人。
「你不喜歡我嗎？」
「不是。。。只是。。。」唉頂，好順口講咗唔係添。「我還沒準備好，對不起。。。」
「那好吧」聽到我嘅拒絕，Gordon面色一沉，好快我地就各自返屋企。
之後Gordon再冇約我出去，而且對住我又有返啲富二代嘅衰格，唔再gentleman。哼，男人都係咁，溝唔到人即刻露出本性。


拎住上年球隊合照凝望，我眼神第一時間就望到企前排最中間，手臂戴住隊長臂章嘅佢。姆指喺佢個樣上輕輕轉圈，唔知佢而家做緊啲咩呢？每次sem break我都會返香港，今次咁啱撞正球隊入學界決賽，當然要返去打氣。去到球場見到佢，好努力咁練習罰球。佢射完10球後行嚟看台休息，點算好呢？好緊張添。。。哎呀佢見到我啦！！！

「嗨阿佑～」

（Nicole2，一廂情願）

原來就算之前諗過見面時嘅各種可能，但當真係見面時腦海都會一片空白，為咗唔令佢發現我有唔妥，我就去返何sir傾返正經事。的確，呢一刻兒女私情要拋開一邊，因為聽日就決賽，唔可以功虧一簣。呢幾日，我將對手嘅比賽片重複睇，務求摸清佢地踢法。我將寫低嘅notes俾何sir睇，然後叫大家嚟開會，聽吓我嘅睇法。可以同隊友重逢返真係好開心，係呢一年外國搵唔到嘅感覺。咦，阿健呢？後來先知佢去英國踢波，真係犀利。


我知道阿佑鍾意飲咩，見到佢去練波時我去買，然後喺休息區拎條乾淨嘅濕毛巾。佢行到嚟看台休息時，我將呢兩樣拋俾佢，佢見到都碌大對眼，可能估唔到想要時就有掛，哈哈～終於到決賽，我同何sir將戰術講解一次後，我坐返去看台睇比賽。吓？！做咩Charmaine同佢咁close嘅。。。呢刻心情晴天霹靂，莫非佢拍緊拖？呵呵。。。原來一切都係神女有心，襄王無夢。。。場波最後輸咗，而真係輸嘅係我望住阿佑同Charmaine一齊走，佢眼入面全部都係Charmaine，再冇其他人。


之後嘅練波我都有意無意咁避開佢，但佢係要主動搵我傾，仲要隱約講起以前，而我亦犯賤咁去回想。明明有女朋友仲走去撩人，都唔知咩心態。呢日練波，Charmaine都嚟睇，然後坐我隔離傾陣偈，我同佢曾經都係同班同學。我先知原來佢都唔係好理解阿佑，唔知佢想要乜。阿佑行埋嚟，我照樣將佢要飲嘅嘢同毛巾俾佢，唔同嘅係今次我用力掟俾佢，而佢全程休息係坐我隔離同我講嘢，忽略自己女朋友，即係點呀？仲要約我跑步？唔好啦，廢時人地吃我醋，我都係走先。


去澳洲嘅呢一年，我堅強咗好多，亦都變得更獨立。有朋友，同學，室友嘅支持同陪伴，更重要嘅係我一路期待與佢重逢嘅一日，一直都以呢樣支撐住。雖然做好各種唔同嘅心理準備，但原來得知事實嘅一刻個心依然咁痛，呢一切嘅支撐原來咁脆弱，咁易就倒塌。我好想避開佢，不過冇辦法，要練波就要成日見面，我唯有不斷抨擊佢弱點，以洩我心頭之恨，哼！8強前嘅一次練波Charmaine有嚟睇，而且問咗我一樣好奇怪嘅問題，「係呢，如果有啲秘密講出嚟會傷害身邊嘅人，你會選擇隱瞞定坦白？」我忽然發覺，原來佢地感情咁脆弱，但我唔會咁衰拆散佢地，所以我為Charmaine考慮去答佢隱瞞，因為我知道阿佑其實內心好脆弱，佢嘅堅強早喺以前大大小小嘅折磨耗盡，而家嘅佢只有空有其表，而且佢性格太多愁善感，既然Charmaine問得我，就即係好嚴重嘅事，阿佑唔可以知。

（Nicole3，異地相約）

明明決賽，點解阿佑精神面貌頹到咁？唔通佢知道Charmaine要隱瞞嘅嘢？如果因為呢件事影響場波佢就知味道！頂，阿佑同阿健呢兩隻嘢搞乜架。。。個半場踢得差成咁，我去搵水潑醒佢地先得。潑完後佢地兩個雙手搭住對方膊頭，頭貼頭，「啊！！！」希望真係識醒啦。終於好辛苦反勝2:1，其實我好想同佢影相，呢刻嘅佢真係好型。。。不過佢隔離有人陪住，我就唔過去做醜人啦。。。


決賽後球隊比較輕鬆，變成師生大混戰，唯獨阿佑斯人獨憔悴咁跑圈，我唔忍心見到佢咁，決定過去同佢跑。佢無端端問我，
「如果你真係鍾意一個人，你會唔會屋企人阻止都要同佢一齊？」
「你嘅意思。。。或者人地真係有苦衷呢」莫非佢地分手？
「你又知我講乜」
「寫晒落額頭上啦」
其實佢唔算喜怒形於色嘅人，但我成日估到佢諗緊乜，咁樣係好定唔好？
「記唔記得中3嗰陣我喺球場喊？」我又無端端問起佢，
「呃。。。冇乜印象添」
「衰人呀！」明明佢記得，點解要呃我話冇印象，唔理佢啦！


好快佢就去西班牙，而我返去墨爾本繼續生活。香港帶俾我回憶有喊有笑，有甜亦有苦。今次返去，希望可以忘記唔開心嘅事，忘記佢，再重新出發。偏偏，有日俾我喺facebook見到有個足球page介紹佢，話佢係林嘉緯後最佳10號位，講起上嚟唔知佢而家點呢？好唔好whatsapp問佢？我猶豫好耐，都係決定問候佢，「你而家情況點呀，慣唔慣？」
「初初唔慣架，強度好大，後來適應到，而家叫跟得上，教練仲安排我可以入後備，已經有處女戰啦，你估咩成績～」
「咁招積，肯定入罰球啦」我好想再親眼睇多次佢入波，然後慶祝嘅威水樣。。。
「咁又冇，不過兩助攻反勝2比1」
「犀利犀利」
「咁你呢？返咗澳洲？」
「係呀，之後要12月先可以再飛」
「咁你幾時再返香港？」
我唔想返香港，反正香港再冇嘢值得我留戀。佢可能唔慣當地飲食，都係搵幾條訓練餐單俾佢先，於是即刻google幾條餐單send俾佢，應該有啲幫助。


就係咁，佢成日影training同食物相俾我，話我知佢有聽我話，於是我地不斷傾偈下又熟絡返。呢日佢send完相之後，無端端叫我過去西班牙，「咁幾時得閒過嚟玩啊」
「你算係約我旅行啦喎？」
「係啊」
「我地兩個？」佢想我地兩個？咁樣係咩意思？
「叫埋阿健囉」我頂！！！馬天佑，你係特登定玩嘢？？
雖然唔太願意，但又想可以再見佢，於是我搵定邊日放假，然後同佢講，

「12月，我得閒」

跟住落嚟形式都係分拆返幾位主角嘅心路歷情去講，會比較深度剖析大大小小嘅細節，將本身埋咗嘅伏筆照應返。至於兄弟對決，今次歐霸4強碎料啦，不值一提，我準備咗另一個更適合佢地嘅地獄

始終只係小弟第一次寫故，好多不善之處，有咩意見可以隨便提出，要屌嘅輕輕力就ok

Post住3章先，大概係咁嘅形式，當然每位角色都唔長，如果唔係出年都完唔到至於主線有啲看似巧合嘅場景，會逐一揭開其實唔係巧合，之前某啲特登描寫嘅人事物會再出現返。時間性上每位角色都會超越歐霸4強，去到最後會砌得返一個主線做真。結局，所以可以從每位角色唔同嘅結局去估到最後會點又或者可以從女角色第一人稱視覺去感受當下嘅甜蜜

希望大家鍾意啦

幾時出呀健

冇咁快

篇故嘅世界觀真係好正
加速

正呀

我愛樓豬

好故要推

屌我做緊乜

有人明白係最大嘅動力