(八十)(續)
返酒店路途中,喺頭先市集見到一檔花店,決定買枝玫瑰送俾Nicole。屈指一算,原來今日係一齊第600日,雖然600日唔係咩特別日子,不過考慮到之後週年紀念未必一齊慶祝到,就唯有買份禮物仔。我唔想俾佢知,於是行前再轉埋彎先同佢講話去廁所,「你喺度等我,我去一去廁所,好快返」
「咁我坐呢度等啦」
我買咗3朵紅色玫瑰,收埋喺身後面。Nicole見我姿勢有啲唔自然,已經開始懷疑,「做咩呀你?奇奇怪怪咁?」
「冇嘢冇嘢,你行啦」
去到馬路一排椰子樹下,我覺得呢度有啲feel,「Nicole,你合眼先啦」
「做咩呀?」佢又真係乖乖合埋眼
「打開眼啦」 同一時間我將花拎到佢眼前,「600日快樂」
「。。。?!?!?!」Nicole驚訝到兩手掩住嘴,眼淚瞬間喺眼眶打轉。
「我愛你,願我地有10個600日,100個600日」
本來準備喊嘅佢聽到都笑出聲,「噗,60000日我地死咗啦」
「咁下一世繼續囉」
「衰人,你特登俾位我入等你可以講呢句,多謝,我都愛你」講完Nicole行前一步送上香吻,不過我地拎住一抽二抽唔係咁方便,所以都係蜻蜓點水式親吻。
「I love you!!!」我攤大手大嗌
「I love you!!!」Nicole亦有樣學樣,呢刻應該亦都係佢人生暫時笑得最燦爛一刻。
第三日我地比較hea,喺酒店碌床單,其實都冇得碌,純粹自然醒加懶床,去到中午先捨得起身,食埋lunch就出發去Phillip Island. Phillip Island有非常豐富嘅動物生態,南海岸係海鳥、海豹、小企鵝嘅棲息地而且仲有樹熊、袋鼠等等,對於喜歡大自然嘅Nicole係人間樂土,最主要係佢未嚟過,所以有新鮮感。
沿著海岸線木棧道可以親近動物,除咗近距離接觸海鳥,更加有機會睇到鯨魚,觀浪聽濤,一片無盡嘅大海令我地煩惱散去。不過冇機會見到企鵝,不過我地行木棧道,聽到腳下有異動,我即刻趴低伸出頭向下望,居然見到小企鵝喺度挖窿。我叫Nicole過嚟睇,「嘩!!!好得意呀!!!」佢想伸手摸,不過我制止佢,然後就望住小企鵝一彈一彈咁行返去附近佢間人造木屋,忽然Nicole拍我屎忽,「哈哈,你睇,佢行路屎忽左搖右擺,好似你」
「我鬼有?」不過,佢話有就有啦。
一路行,一路喺木棧罅隙發現更多小企鵝,Nicole不顧形象痞低影相,不過當其他路人知道原因後都跟住做,就顯得佢好正常。木棧兩邊間唔時仲會有小袋鼠同野兔出現,聽到Nicole尖叫就知佢又發現新大陸。
我地周圍hea到入黑,因為會有最令人期待嘅企鵝遊行。成大群企鵝喺日落返上岸。當聽到唔可以影相之後,Nicole非常失望,不過佢都理解驚會嚇親班小企鵝。日落嘅海邊真係好凍,Nicole都要依偎住我,手伸入我長褸,將我隻手當暖蛋取暖。冇幾耐,忽然見到兩三隻小黑影,我地所有觀眾都為之一震,小企鵝被海浪衝上沙灘後開始匍匐前進。有一隻唔小心被撲岸浪花捲入海中,其餘成功上岸嘅繼續努力往前,慢慢爬上斜坡鑽入草叢,場面非常搞笑可愛。離開時,我地抬頭發現滿天星斗,於是坐低一陣觀星。
返到酒店,我地依然回味頭先旅程,Nicole太攰瞓先,我就執一執手信同衫褲唔好咁亂。其實幸福好簡單,彼此相愛,彼此有同一目標。某程序上都算係對的時間遇上對的人,大家互相支撐一齊撐住,先嚟到今日,可以一齊睇企鵝觀星。望住身邊睡美人,我輕輕錫佢額頭之後就進入夢鄉尋找佢。