【校園】【足球】【少甜】溝到女神後我決定......

手動正皮

都係覺得阿佑同charmaine一齊襯d

我都係咁話

（健二，驚天逆轉）

我同阿佑唔同，佢技術好，腳法細膩，亦都有一腳遠射，而且唔太需要直接面對後衛，所以對抗性唔係最重要一環。但我唔係，喺英超對住班狼死後衛，如果連企穩都做唔到，點樣踢落去，所以我不斷操橫操厚個身，去加磅，起碼叫做唔會俾人撞到仆街。班主係泰國人，所以我地去泰國踢熱身賽，頭兩場我冇得出，教練只係叫我留心前鋒走位，同隊友嘅串連合作。第三場下半場終於入場。好多謝班前輩唔會因為我新手唔信我，唔俾波我，中場drinwater會長傳俾我，而我把握到搶點成功頂入。臨完場前我同右翼馬列斯撞牆，送佢一程俾佢半單刀，可惜中柱，不過佢都會俾隻手指公我。


英超終於開季，係球隊十年來再次角逐英超，今年目標係護級先，老實說英冠上到嚟都唔敢要求太多。但係開季頭4場都唔算順利，2負2和，要去到第5場對史篤城先贏。之後對曼聯，其實我係曼迷，除咗話夢想喺曼聯踢波，而家呢個moment想贏到佢地證明自己 。之前幾場我表現唔錯，所以有正選踢，開波16分鐘曼聯已經一頭一腳領先2:0。不過我地未放棄，機會總要靠自己尋找，缺口總要靠自己打破。中圈再次開波，可以曼聯輕敵，左路防守鬆散，我即刻走邊路接應傳送，然後出盡力向前推進。曼聯後衛rojo過嚟逼我，佢都幾撞得，將我撞一撞然後踢到粒波甩腳，我俾佢撞出邊線少少。不過咁樣仲好，我就唔會俾佢痴到身，我用盡力加速跑追返粒波。講撞我唔一定夠佢撞，但講跑我一定夠佢跑！我已經跑甩佢一個身位，眼見粒波就嚟出底線，我出盡奶力追返，然後用力拗腰傳個高波去禁區中間。我地另一個前鋒烏路亞已經到位等緊，佢搶點成功頭錘頂入追返1球。



雖然氣勢如紅，不過實力有差就係有差，去到57分鐘我地落後1:3。唔得，咁難得對曼聯，我唔希望我第一次就咁樣輸。60分鐘我接應長傳，今次我到左路單挑曼聯右閘rafael，終於有個球員比較矮小可以俾我恰，我拍一拍佢，佢已經向前碌落地，合法碰撞當然唔吹我。我底線拎返波，即刻轉身加速去返禁區中間，rafael好快回身追返我，我已經食住佢身位，佢衝動之下用手拉我，我乘勢跌落地，球證毫不猶豫吹雞直指12碼，一射中鵠追近2:3，反擊開始！64分鐘隊友禁區外勁射，可惜省落我隻腳到反彈，中場甘比亞素已經衝緊上嚟補射，我見佢殺得勝起都廢時阻住佢，轉身讓開半步俾佢炮彈式射波，追平3:3。79分鐘，我地中場偷到曼聯一次失誤，我見到前面中門大開，走位等接應，隊友拉腳波埋嚟，粒波恰到好處彎到我前面，我控定加速，已經呈現單刀狀態。我見到曼聯門將迪基亞企嘅位置封唔晒近柱，瞄準近柱死角位向前一篤！佢根本落唔切地只可以望住粒波入網，對住dream club入波嘅我非常激動，而且反超前4:3，我直接剷草慶祝！去到83分鐘曼聯已經無力回天，又係我，曼聯用新人後防blackett守我，雖然我都係新人，但而家我完全可以睇住佢嚟食，佢頂唔到波俾我偷到，我轉身加速推進，佢跑得好快唔洗一陣就跟上我，可惜年輕人終究年輕人，太衝了，居然從後剷跌我，又輸多球12碼，最後我地上演大逆轉，下半場30分鐘內連入4球反勝5:3，健呢個名成功留下烙印。

尋晚攰得濟訓死左

李斯特城真係好熱血打得

（健三，再創奇蹟）

好可惜，唔知係唔係用盡勝利女神嘅力量，跟住足足13場冇贏過，只有11勝2負嘅慘絕人寰戰績，去到聖誕節踢完18場聯賽只有可憐嘅10分排包尾，係降班大熱門。呢一刻，我真係有啲徬徨無助，領隊亦都好似冇辦法，球隊士氣極低。好彩之後幾輪對手唔勁，我地拎3勝1和總算叫做吊住條氣未死得。


喺我眼中，一次唔得，我就練到得為止，我嘅努力絕對唔會輸俾阿佑。每日除咗常規訓練，我仲會加操到夜晚，甚至朝早好早起身跑步，我可以學kobe咁話，「你有冇見過凌晨四點嘅李城」。努力真係有回報，跟住6場聯賽拎到4勝，我亦重拾射門鞋，只係球隊仍然水深火熱，深陷降班旋渦之中。另一方面，我地喺聯賽盃-6打入4強，阿佑約定我要贏聯賽盃踢歐霸，佢贏國皇盃踢歐霸，我地來年相約歐霸決賽對決。呢輪聯賽作客贏熱刺，我地食住道勢再喺聯賽盃4強次回合贏埋，晉身決賽。


呢場波kassie有嚟睇，從中學到而家，佢嘅轉變好大。以前佢係班上小八婆，天文台，幾本上咩風都收到然後散晒出去。活潑可愛，係我對佢嘅第一印象，而我幾鍾意同呢類人玩，所以未一齊前我都同佢幾fd，一齊坐嗰陣成日傾偈俾老師話。某程度上我係因為佢同班上嘅女朋友分手，因為吃我地醋，呢個係其一原因。其二係我太熱心足球，尤其比賽前我唔會同佢出街，只會顧住練波，久而久之佢頂唔順就分手。呢方面kassie好好多，除咗唔會逼我去街，仲會嚟睇我練波，睇我比賽。去到而家，如果我喺主場踢大戰，佢都會坐火車嚟睇，係一個完美嘅跟得女友。佢成日話，「bb你一定會係神射手」我就同自己講一定要拎到個獎俾佢睇！雖然聯賽盃晉級，但聯賽始終都係低潮，佢都會安慰我，為我打氣。



為咗場決賽，我地選擇暫時喺聯賽留力，反正對手又曼城又阿仙奴，老實講真係冇盡力嘅必要，盡完力都輸就好唔抵。好好彩，聯賽盃決賽順利勝出，我地拎到來季歐霸入場券。「喂阿佑，我搞掂啦，你唔好輸啊！」我有啲擔心佢，始終西甲幾隊強隊唔易踢。當然，佢應承得嘅事，好少會落空，佢好順利一路殺入去決賽。至於我？聯賽繼續幾場不勝。。。已經係降班大熱。我唔會咁易認輸，連續4場好艱辛咁贏波，去到對車路士先輸，不過已經搶到唔少分去護級。聯賽最後大直路，最後4場我地拎到3勝1和佳績，莫講話成功護級，直情排到上第14位。英超史上，喺聖誕節排包尾，而最後成功護級嘅情況只發生過3次，我地就係第3次！

今晚繼續

作為曼迷記得個球，見到華迪撞鳩拉菲爾無吹，之後入到禁區吹返拉菲爾就嬲

就天黑啦

跟住足足13場冇贏過，只有11勝2負嘅慘絕人寰戰績

11負2和，sorry

（健四，天意弄人）

本來經過呢個奇蹟，諗住新一季會順順利利，點知季前去泰國熱身賽時，球隊突然宣佈將領隊皮雅臣炒魷，理由係工作關係不合。失去呢位領隊我好唔開，因為佢係伯樂，冇佢嘅重視唔會有今日嘅我。其實之前佢個仔同另外兩個人因為牽涉拍扑嘢片炒魷，估唔到燒埋落老豆度，乜拍條片就要炒魷嘅咩，咁我同kassie嘅片。。。屌，小心啲先得，唔好變希哥二世。新領隊係雲尼亞里，之前佢教希臘國家隊表現好一般，而且生涯冇乜獎，當然，專業嘅我無論邊位領隊，我都會交出120分功課。


我依舊見住凌晨4點嘅李城，喺我眼中冇嘢比足球更重要，而且因為轉領隊而更勤力練習佢嘅戰術。開季頭3場我地順利2勝1和暫時排榜首，我知道季前我地係降班熱門，一來換領隊，二來冇大增兵動作，比較大嘅引入已經係防中簡迪同後防侯夫。即使如此，我一定令到啲人跌眼鏡，唔只要護級，而係要排名上半版，所以我場場比賽都搏盡，直至第14場對曼聯之前，我地拎8勝4和1負佳績，暫時排榜首，而我已經連續十場聯賽有入球，暫時歷史並排第一。要打破呢個紀錄做歷史第一人，我就要對曼聯入波，冇錯，又係曼聯，上年已經踩住佢地上演驚世逆轉，估唔到而家又要踩住佢地打破歷史。對於愛隊可能有啲殘忍，不過亦都係我嘅光榮。比賽24分鐘，我成功入波，終於我嘅名字可以寫入英超史書。呢場波結果打和1:1，成功打破歷史之餘又可以唔洗贏愛隊波，都算係最好結果。


班主維猜見引入我呢個亞洲球員都算成功，於是佢叫我可以幫手叫阿佑加盟，造成亞洲雙星。「問啲咩？叫我轉會？係嘅叫佢唔洗諗啦。。。」 我估唔到阿佑會秒拒絕
「吓？你唔想踢英超咩？」
「唔係。我想踢多一兩年再睇咩環境啫」
「咁好啦」
我將結果同老闆講，佢唔會怪我，唯有打消呢個念頭。其實我好想同佢一齊踢，因為我feel到我地雙劍合壁嘅話可以再創高鋒。不過阿佑就係咁，好重情壬義，唔會咁易離開培養佢嘅球隊，我只希望呢種性格唔會拖累佢成就。


去到第33場聯賽，球隊已經連贏5場聯賽排榜首，我同阿佑都打入歐霸4強，但係天意永遠好大整蠱，明明約好咗決賽見，但提早4強就要分出勝負。呢輪聯賽我地4:0大炒史雲斯，我以最佳狀態迎接阿佑，我一定唔會留手。首回合佢作容嚟到李城，展現出頑強鬥志，只係我狀態賽在太好，最後我贏3:2，不過唔可以太開心，因為次回合佢贏1:0都可以憑作客入球優惠晉級。


賽後我去搵阿佑同Nicole聚舊，離開時我叫Kassie今晚去我度瞓。人係自私的，今晚我要佔有kassie。原來佢同charmaine落bar飲酒，我估到charmaine因為見返阿佑所以諗起往事？挑，都未同佢算返當年俾帽阿佑戴呢筆帳。一片翻雲覆雨過後，kassie好擔心charmaine一個未返到去，於是不斷搵佢，但係都冇回覆，佢就俾間bar地址我去搵charmaine。


去到間bar，見到佢趴喺檯，「冇事啊嘛？」
「冇事。。。」佢眼神迷幻，感覺真係好醉
「見返人喳嘛，小事啦，況且佢而家點都唔關你事啦」
「我知。。。但我連咁小嘅事都做唔到，點解嘅。。。？」死啦，我最驚就係女人喊，見到仍眼濕濕咁都唔知點算。我唯有夾佢返酒店，講起上嚟我第一次咁近距離接觸佢，以前同佢唔算fd，只因為佢係kassie死黨同阿佑女友，先至話認識多少少。以前佢都算靚，而家更加靚，佢今日噴咗香水，香氣夾雜酒氣，好特別，好好聞，我都忍唔住索幾索。


帶佢返去民宿，本來諗住唔理佢走人，但我於心不忍，同時驚佢同kassie報串，所以我幫佢整理好先走人。「好熱吖。。。」小姐啊。。。乜你咁多要求架，念在相識一場，好！
「哎好啦好啦，斟杯水整條毛巾俾你冷靜下。」
之後佢要水，仲要我餵佢，佢係咪當咗我係阿佑？！
我托住佢起身餵完佢飲水，準備轉身走，「你慢慢瞓啦，我走啦」
「唔吖，唔好走。。。」佢居然用手扯我落佢身上，仲要攬實我。攬都算，仲要錫埋嚟，我知道再咁落去會好錯，我決定唔撚理佢，大力起返身，整痛佢都咁話。


終於擺脫佢，好彩佢提一提個唇印，唔係我返到去真係等分手都得。「bb你咁耐嘅？」
「你個fd啊，醉到呢，根本自己返唔到去，我去到間bar佢趴喺檯，唔係我去到佢真係俾人溶咗都似，唔講啦，我沖涼先，咁樣搞一搞好鬼熱」
我除低外套去廁所沖涼，沖完涼我見到kassie拎住我件外套，個樣好哀怨望住我，「點解有女人味嘅」
「你個fd囉，佢噴香水，咁我要扶佢返去架嘛，咪痴到啲香水味囉」
「咁呢件衫呢！你自己望吖！」講完佢掟我件白色裇衫俾我，我屌。。。做乜會有啲胭脂印喺件衫度架。。。呢獲仆街啦。

聽日會有阿健難得嘅感情戲＋第二回合

.

振個夫剛先啦

第二回合嘅歐霞杯決賽定第二回合嘅床上大戰？床上嘅麻煩要多六七個回合，好似打季後賽咁

（健五，成王敗寇）

「BB你聽我講」
「唔好叫我BB！」
「唔係呢，真係冇嘢架」
「咁你解釋，講吖！」kassie強忍淚水，我都係第一次見到佢咁嬲。
「頭先佢飲醉」
「酒醉都三分醒架」
「你聽我講埋先，咁我要扶佢返去架嘛，咁中途佢醉到都行唔到，一開門口佢成個人撻低，咁我咪即刻逗住佢囉，一逗住佢個頭咪撻落我度囉，同埋啊，真係同佢有嘢嘅我唔會咁快返到嚟啦」忽然諗起我臨走時佢提醒我個唇印，好彩提一提，唔係真係水洗都唔清。
「真係？」kassie態度開始軟化，有見及此我即刻攬住佢，
「真係架，我地都一齊咗幾年啦，我對你點你知架」
「唔知喎！」
「我愛你，從以前，到而家，將來都係」聽到呢度kassie終於忍唔住喊
「呢番說話你終於捨得講出口呢咩。。。」講起上嚟，唔計敷衍性嘅示愛，咁認真同佢示愛好似真係第一次。


「好啦好啦，唔好喊啦，我個心得你一個，冇其他人」
「嗯。。。」
「乖啦，我氹你瞓」講完我錫落佢額頭
「健。。。我都愛你」然後佢回返一個香吻俾我嘴唇。。。


呢一晚，我地渡過前所未有咁激烈嘅一夜。


雖然首回合我地領先，不過次回合唔敢鬆懈，尤其阿佑絕對有能力改寫戰局。再次去到巴塞市，不過今次係用挑戰者嘅身份作客愛斯賓奴，我亦都冇心情游山玩水，眼前只有勝利。開賽初段我地比較被動，因為教練希望我地先做好防守，由於0:0都可以出線，所以我地唔好大犯錯就得。15分鐘左右，阿佑中圈拎波準備推進，咁啱我喺附近，於是我去防守，緊逼佢唔俾佢輕易傳波，去到最後關頭佢轉身過我，我情急之下拉佢衫頸位，因此佢勒住chok親氣門，「喂你洗唔洗咁」
「sorry我冇心架」
阿佑求勝心同我一樣重，所以我理解佢頭先嬲嘅理由。32分鐘，我接應長傳準備推進，突然我從後被剷跌，原來阿佑回防剷我，佢食咗黃牌，我盡量忍住道氣，心平氣口同佢講，「一人一次，打和」
佢唔理我就咁走開。


換邊後50分鐘，簡迪喺我地禁區頂附近侵犯roberto，呢個位係阿佑食糊位，所以我都叫隊友要排足6人人牆，而我就去近柱位企喺度，就算佢咁勁彎過人牆，都仲有我包位頂走粒波，我諗觀眾都估唔到我會將fifa招式搬出嚟，我太了解阿佑，知道唔咁做嘅話佢真係射得入。全場屏息靜氣等球證吹雞，我同阿佑都同時深呼吸，「咇！」阿佑起步拉弓，粒波真係彎過人牆直飛近柱死角，我見住粒波來勢，即刻跳起希望頂走。我屌！唔夠高添！粒波勁到臨門前曲墜落嚟擦眉底入網，就算我米8幾跳起都頂唔到。望住佢地慶祝，先發現進步快嘅唔止我一個，阿佑亦都幾何級數咁進步，馬天佑，你好嘢！


愛斯賓奴領先1:0，總比數追成3:3平手，不過佢地作客入球優惠，如果呢個比數完場我地就會出局。唔可以，我唔可以就咁輸！只係阿佑，roberto同摩蘭奴呢三叉戟攻力真係好強，攻勢一浪接一浪，領先嘅情況下氣勢如紅，連我都要返中圈協防等反擊。85分鐘左右，drinkwater偷到波，即刻長傳俾我，我拎到波後加速，見到右翼馬列斯前面空晒，我直接斜傳俾佢單刀，而佢亦不負所託成功燙射破網，比數追平1:1，出線形勢又去返我地度。於是佢地再加強攻力，90分鐘，阿佑睇準我地兩個中堅中間空檔，一下手術刀直線劏穿晒，摩蘭奴拎波後直接起腳勁射入網，出線權再次去返愛斯賓奴手上。


補時5分鐘，最後呢5分鐘，只要入多粒就得啦，一粒就夠！無論係我起腳，定係馬列斯起腳，都無功而還。95分鐘，最後一個攻勢，中場甘比亞素hold住個波，我突然加速向前走位，佢睇到然後一腳過頭波俾過嚟，我轉身背向龍門心口控定。再次轉身面向龍門，龍門已經衝出嚟，我趁佢落地時將粒波推離腳然後加速，佢落地瞬間撲到我右腳，佢想收手都收唔切，而我俾佢勾一勾亦失去平衡跌落地，「咇！」球證直指12碼點，佢地即刻蜂擁而上同球證理論，但係點講都改變唔到龍門勾跌我呢個事實。呢球由我搏返嚟，由我親自操刀，愛斯賓奴，就等我一劍封喉！

射失12m

屌罰球守龍