(三十四)
練完波之後,我whatsapp Charmaine,「我啱啱練完波啦,你做緊咩啊?」
「執緊房吖,個櫃門壞咗,可唔可以上嚟幫我整?」
「屋企冇人咩?」
「冇吖,得我一個。。」嘩仲唔狗衝,等幾時?
「okok,即刻嚟」
叮噹,「yo靚女」我右手擺後腦,挨落門框度,chok晒樣同佢打招呼。
佢露出已經好耐冇見到嘅瞇眼笑,「哈哈,白痴」
「好掛住你啊」講完我就攬落去,佢亦都攬一攬我,「咦你好臭吖,頭先係咪冇沖涼!」
「幫你整埋先沖啦」
「沖咗先!整臭我間房」
「好啦好啦」
於是我就去廁所沖涼,極速五分鐘搞掂就去佢間房,「點啊,邊度壞?」
「呢度吖,成個絞甩出嚟,本來準備搵你架啦」
「好啦!幫你搞掂佢」
其實我唔係好識搞,不過幫佢拆絞再裝返應該唔難,「幫我托住」
「拎個十字批俾我」
「呢個拎走」
對於我每句指示,佢都「得」咁覆我,忽然間我腦海幻想起動作片入面裝修師傅劇情。。。
「呼,搞掂啦」我企起身對住佢興奮咁講,佢忽然面紅,眼神有啲閃縮,「咸濕仔」
原來我巨龍甦醒,一字咁扯到恆一恆,「咳咳,鬼叫你咁正咩」
「整個櫃都扯,你得吖你,又唔知喺度諗乜」
「咪諗起你囉」
「我?」
「冇冇冇~」
「肯定又諗啲唔好嘅嘢」
「邊有啊,我呢啲正人君子,好頸渴啊,出去飲嘢啦,走走走」未講完我就推Charmaine出廳。
飲飲吓,忽然聽到鎖匙開門聲,我同佢都碌大對眼,門口已經入嚟一個男人,佢望住我,「你好」
「uncle你好!」我坐到直一直個人,其實係嚇親。。。
「下次講聲嘛,我就唔咁早返阻住你地」
「唔阻唔阻,我幫Charmaine整櫃喳,啱啱整完,飲埋杯嘢走架啦」
「哦~你叫?」
「我叫阿佑,係」
「係我男朋友」Charmaine用一種我察覺唔到嘅微妙眼神同眼前呢個男人講。
「遲啲得閒上嚟食飯啦,我漏咗嘢喺公司,要返去拎,再見啦」
「拜拜uncle」
「呼。。。」緊張死我了
「做乜驚成咁喎!」
「俾著你呢個情況都會嚇一嚇啦,仲有估唔到你會直接認係我女朋友喎,嘿嘿」
「咁事實嘛,又唔係唔講得,反而你頭先做咩窒,講!」
「咁驚你唔想公開住嘛。。。」
「衰人,唔理你啦,哼」講完佢就起身返房
「喂,做咩啫」我起身喺佢後面攬住
「傻瓜」Charmaine微笑,其實佢想知我會有咩反應,睇嚟我呢個反應佢好滿意。
「你瘦咗咁多嘅?」
「係咩?」
「以前攬你攬唔到咁實架」
「即係話我肥啦?!」
「唔係。。。以前瘦,而家仲瘦啫,你唔洗減肥啦,已經夠晒正啦」
「阿佑。。。」講完就轉身正面攬實我,我輕輕拍佢頭。
「I love you」我頭貼落去佢塊面,佢合埋眼,「me too」四唇交接,良久,兩人分開嘴唇。
「衰人」
「不嬲都衰架啦,係喎,今晚同你食啦」
「嗯,食咩?」
「食你」呢句我邊講得出口啊,「叫外賣囉,鬼叫你呢度咁隔涉」
「咁你搵menu啦,我冇乜所謂」
食完飯執埋嘢,我就返屋企嚕。