(Charmaine5,四朵金花)
人生其中一個最大遺憾係中學grade trip我地4個金蘭姊妹冇得一齊去旅行,於是kassie就提議我地跟佢去英國玩,我地都一致讚成,夾好時間就book機票同酒店。諗起以前幾個柴娃娃嘅日子,每日都嘻嘻哈哈,冇煩惱,頂多只係煩考試煩test煩sba,考完就過眼雲煙,對比起而家嘅煩惱簡直小巫見大巫。讀書方面,背嘅嘢複雜超多,解剖學,臨床知識,一大堆嘢背到頭都爆。上堂仲好笑,有時要學生出嚟做model示範觸診,學體表解剖,於是男同學就著背心,而女同學就著sports bra上堂。。。初初好尷尬,不過習慣咗就冇乜嘢,同埋入到呢科嘅同學都好正經,所以都冇咩特別事發生~
考試先大壓力,筆試還好,反正都係死記,考practical先慘,兩個人一組入去病房,入面就得一個老師同一張病床,估都估到一個同學做病人一個同學做醫生。第一輪我拍擋做病人,我做醫生,老師士但出個情景,然後我就要根據呢個情況知幾多講幾多,最抵死係當出到一啲我未見過嘅topic,就要靠我把口鳩嗡,純粹靠邏輯同本身知識去推理個最合理醫法~考完之後將呢份恐慌散佈俾準備考試嘅同學,順便討論題目,非常刺激~
終於搞掂考試,成個人鬆一口氣,考成點?唔理嚕~而家要準備嘅係英國之旅去邊同買乜。我一直都好想買個袋,尤其見到凱特皇妃拎嘅袋好多都好靚,而且幾千蚊就有一個,一啲都唔貴。左揀右揀,我決定買個啡色Strathberry袋,成熟得嚟唔會太老,啱晒我呢啲想扮成熟嘅少女~再加埋香水,英國茶,餅,衫褲鞋襪。。。唔計機票酒店,我淨係買嘢都分分鐘過一萬蚊。以前叔叔俾落嘅錢我都冇乜點用,平時靠返coffee shop parttime夠食夠車錢就得,本身我又唔大洗,就算parttime返得唔多人工只有幾千都好夠我用。我唔係好識銀行嘢,於是特登去銀行搞張海外提款卡,廢時我去到英國想買嘢但帶唔夠錢。初時個女職員閪我面,可能覺得我整呢啲小事煩到佢,但佢見到我戶口幾十萬,而且乜都冇只有cash,對眼發晒光咁係咁sell我嘢,咩升級戶口吖,信用卡吖,保險吖。。。妖,聽到我都煩,最後敷衍佢搞個戶口升級算。
我,kelly,fion行出倫敦希思羅機場接機大堂,「喂~~~」kassie大聲嗌到附近啲人望住佢,不過佢唔理,急步咁行過嚟同我地攬埋一舊,我地4個終於再次聚首一堂。Kassie呢個導遊做得相當稱職,會介紹啲街道,建築物,景點,同埋佢喺當地發生嘅趣事,字裡行間聽到佢同阿健好sweet,羨煞旁人。
行程中間我同kassie會去李城兩日一夜,因為佢要去撐阿健場,至於kelly同fion兩個對足球冇興趣,所以呢兩日我地4人分成2人2人咁行動。其實我知道呢場波係對阿佑,我照樣選擇嚟睇而唔避開,一來我真係想睇呢場波,對上睇波已經幾年前佢地合作,今次居然會對決,肯定好好睇。二來難得有好姊妹陪我睇,平時邊有呢啲機會,聽講kassie終於識越位。嘻嘻,我叻過佢,我幾年前就識~同埋佢知道進攻技巧例如撞牆,入攝,唔同射門方法,當然喺佢眼中只會集中阿健一人。