(八十五)
一直望住電話內嘅合照,終於成為現實嘅相見。雖然分隔兩地,但大家都等緊對方,就算有幾攰,都只係想聽見對方嘅聲音。每晚碌手機期待對方傳來嘅訊息,幾多個漫長黑夜嘅等待,終於見到佢,只想呢一刻好好擁抱,永不分離。「知唔知我有幾掛住你。。。」我陰聲細氣喺Nicole耳邊講,輕輕嘅吹風令佢忽然面紅耳赤。
「你有幾掛,我就有幾掛」我就鍾意佢呢一點,往往比直接回答更有味道,亦都成為我地日常溝通獨特方式。送完佢去酒店安頓好,我就要趕返球隊訓練,犧牲lunch time實在非常值得,「咁你好好休息啦,我返嚟嗰陣搵你」
「嗯,加油~」 收到伊人奉獻香吻,我就出門而去。
作為一名職業球員,我依然喺訓練保持專業,非常落力去操,冇因為趕住返酒店而揸流灘,同埋我冇諗住留低加操,所以要訓練課程入面加倍努力,去彌補冇加操嘅練習。今晚去返Caelis餐廳,就係上次三人行第2晚食嘅5星級餐廳,今次只有我地兩個,氣氛截然不同,我地亦嗌一份情侶套餐,將所有要補祝慶祝預祝嘅事項一次過搞掂。食完後返酒店換返套casual運動打扮,然後去返Jardins de Joan Brossa公園,當初我地互相透露心跡嘅地方去散步。
去到髮夾彎人造路,開始回想當天,「Nicole,記唔記得當時有嘢喺你耳邊飛,你驚到縮去我後面?」
「記得呀,我仲記得你幫我頂,俾佢咬咗幾啖,哈哈你好白痴~」
「唉,早知當時由得你俾佢咬」
「知唔知點解我會講嗰句?」
「邊句?」
「明知故問。。。」死啦,其實我真係有啲唔記得。。。
「點解?」我唯有敷衍帶過啦, 將個波拋返俾Nicole。
「因為我知道你會好為我著想,會好保護我,會好錫我,咁而家事實證明我冇睇錯呀~」
「而家會,將來都會!」我停地腳步,攬實Nicole。
慢慢行到當初表白嘅地方,我地都好有默契咁停低,「係呢Nicole,你當時expect我點答你架?」
「冇架,嗰陣忍唔住講出口,始終醉醉地,就將我內心諗法講出嚟」
「我真係嚇一嚇架,估唔到你咁直接」
「阿佑,多謝你」
「我多謝你至真,走咯,廢時返去太夜」
「嗯」
經過激情嘅一晚,翻雲覆雨過後,可能因為忍咗一年,一次過發洩出嚟嘅關係,第二日操練我居然有少少腳軟,不過對我狀態冇太大影響,而家嘅我可以話生涯以嚟巔峰,加上roberto大放異彩,有傳教練團有意將我地雙子星喺夏天提拔上一隊,可能只係教練對媒體嘅客氣說話,但對我地係非常之鼓舞。為咗百分百狀態出戰,呢晚Nicole都乖乖地冇引誘我。係,用到引誘去形容,皆因尋晚第一次過後,Nicole好似撻著制咁,非常主動,而且配合,令人回味無窮。