依個大憲章有幾重要？佢可以話係現代憲法嘅元祖，令英國成為史上第一個憲制國家。簡單嚟講，憲法同法律嘅分別，就係法律係用嚟約束我地哋每一個人，而憲法就用嚟約束政府。大憲章其實係國王同貴族之間嘅契約，國王必需遵守，限制王權，類似中國嘅丹書鐵券，免死金牌，皇帝基本上都要遵守券上嘅承諾。當時好講騎士精神嘅歐洲人注重承諾，至於中國人誠信依味嘢，你懂的。
但係我地又唔可以話英國自此就係憲政國家，英國去到1689年光榮革命後，權利法案生效，先可以叫做憲政國家。大憲章要喺幾十年後先成為正式法典，甚至喺1261年被教皇宣佈廢除。歸根究底，因為大憲章實在寫得太求其，依份有63條條文嘅章程，純粹係啲半文盲貴族圍埋一齊，佢地講僧侶寫，你一言我一語，諗到一條加一條拼湊而成。最貼地嘅條文包括一個寡婦改嫁要俾國家幾多錢，一個騎士繼承家業要交幾多稅等。
當中亦有一啲非常重要嘅條文。其中一條係「執委會於國王破壞憲章時，可發動戰爭反對之」，無疑加強貴族對王權嘅制衡。另一條「除封建制度所規定之貢款賦稅外，國王不可征服任何額外賦稅或捐助，除非得到全國同意。」，限制咗國王既財政權。成份大憲章最精髓嘅條文，就係依條：「若不經本國法律審判及合法裁決，不得將任何自由人逮捕監禁，不得剝奪其財產，不得宣佈其不受法律保護，不得被處死，不得被施行折磨，不得被我等群起攻之，肆行討伐。」
大憲章確立咗臣民對其財產及人身嘅保障權，係現今自由同人權等主義嘅雛型。雖然佢喺訂立當時冇乜作用，但係佢提醒咗班貴族：原來自己唔單止係國王嘅「直屬封臣」，仲係有天然發言權嘅國民嘅代言人，有一種為國民出聲嘅使命感，依個使命就係由大憲章開啟嘅歷史所賦予。一言不合就可以撻大憲章出嚟：陛下，你祖先約翰當年親口承諾架，唔好走數呀！自此貴族同埋佢所演化成嘅議會擁有嘅權力越來越大，形成英國作為君主制國家，但君權非常受限嘅獨特政治文化。
仆街約翰被逼簽署大憲章
大憲章部分正本
