同意,個個識就唔使討論
不過人地有個官網係度,都可以做吓功課嘅
我都好想解釋多啲,但原諒我真係無能力成個官網啲原理翻譯落黎做中文
拿,我盡量簡代解釋吓。
a8 同a16 基本上原理係完全一樣,只係性能提升。
講吓佢大約係點做到,我唔係呢方面嘅專家,都可能有錯。
首先你要明白,聲音經空氣傳遞入耳,同經人肉,骨頭,脂肪之類入耳,都會唔同聲。
所以平時自己聽自己講野,同聽返自己錄音比較,係會唔同聲。
而一般嘅錄音,都係以音箱(即係喇叭)回放為目標多,以音箱回放,會經過牆壁同天花同地板之類嘅反射,再經過外耳,頭部之類,最後先傳入耳膜。
同埋左耳會聽到右邊嘅聲,不過速度上會慢咗啲傳入耳,另一隻耳如是。
平時就咁用耳機聽,會少咗環境反射,少咗經你大部分頭部嘅傳遞(耳牛都會有少少嘅),少咗左耳聽到右耳嘅延遲音波。
所以聽落可能會覺得無咁自然,同埋近咗(我知係廢話)。
咁smyth嘅功能就係,係你耳入耳放個mic(就算網上買都係連埋的,絕對唔使去lab先有),去錄低你耳仔聽到嘅野。
例如佢播一段原本係完全平直嘅1k Hz同2k Hz 交替(例子而已), 再同你左右耳仔(佢個mic)聽到嘅野做比較,例如左同右耳嘅時差,乜野frequency會高咗低咗之類。
再用類似逆向工程嘅方式,去計返一條平直嘅聲音,入到你耳仔會有咩變化。係回放任何音樂嘅時候,即時演算完先播俾你聽,去模擬你用耳內mic錄音時嘅環境。
而呢個環境,係完全無限定,可以係大會堂,可以係studio,可以係hifi房。
如果係佢個環境錄,經佢用耳機播嘅時候,就會聽咩都好似係個間房聽咁。
如果係演奏廳錄,就會聽咩都好似係演奏廳聽咁。
所以如果你去佢個lab, 只係會錄到佢個lab嘅環境音效,而唔一定係你想要嘅環境。
而如果錄音嘅時候唔係用喇叭,而係用耳機,都理應可以用黎比較返佢原本播嘅音頻(當佢係平直嘅線先),同經耳機同你個耳仔回放出黎嘅分別,而去做返逆向工程,去造個profile出黎。
所以一部機可以儲好多個profile(都係你黎), 從而去模擬返唔同環境嘅音效。
再講返a8, a16 嘅分別,真係主要係等級提升
例如a8 嘅motion sensor得2軸,即係你左右轉頭個時,啲聲音都keep到係你前方牆前面1米,但你直後移時,啲聲就會移離牆前1米
a16就改善咗呢樣。
同埋a16可以模擬到更多聲道,即係唔止兩聲道喇叭,重可以模擬到7.1 家庭影院嘅效果之類。
希望唔會講得太差同正確,有錯請指正。