(開定先)《鐵血戰士: 血獸進化》討論區

一年又未免太耐

係架...我D marvel單買到成十張 下年先派貨有排等

最後都係冇打八號

今日講下鐵血與人類之間嘅關係同歷史

根據電影AVP入面嘅記載, 兩族嘅關係至少已經有幾千年嘅淵源
鐵血教曉包括古埃及, 瑪雅同高棉在內嘅古代人如何建築金字塔, 而古代人就當鐵血為神崇拜


起好嘅金字塔同神廟會用作狩獵場, 人類亦會奉上活祭品以繁殖異形, 供鐵血狩獵之用


每一百年, 鐵血就會回歸一次舉行成人禮, 年輕嘅鐵血會喺金字塔入面接受狩獵異形嘅挑戰, 證明自己已經係一個合格嘅獵人


如果失敗, 鐵血將會選擇自爆嚟毀滅一切痕跡



呢個時期鐵血同人類嘅關係大致等於主人同家畜

後來人類文明逐漸發達, 鐵血亦逐漸減少同人類之間嘅互動, 反而將人類當成其中一種有挑戰性嘅獵物
鐵血睇中人類並唔係因為人類嘅力量又或者武器, 而係人類與生俱來嘅奸狡
即使係最勇猛嘅鐵血都有可能倒於人類嘅陰謀詭計, 呢樣係人類同其他獵物最大嘅分別

即使係經驗老到嘅Jungle Hunter依然中伏


鐵血會被地球上嘅戰火吸引, 喺戰場上物色適合嘅獵物作為目標
根據記載, 文藝復興時期, 美國嘅殖民地時期, 第二次世界大戰, 越南大戰都有佢哋嘅身影

鐵血呢個種族極度狂熱排外, 除咗狩獵, 通常唔會同其他高智慧嘅生物交流
即使有都係好似古代人類咁當成家畜奴隸對待
同時其他種族嘅身體對鐵血毫無吸引力, 任何與其他生物有關嘅性聯想對鐵血都係極大嘅侮辱同冒犯

雖然鐵血唔鍾意同其他生物交流, 但對於實力被認可嘅獵物, 某啲鐵血都表現過尊重, 甚至會同佢哋並肩作戰

Predator 2 最後鐵血長老送咗把槍俾主角作為獎勵 (把槍背後嘅故事日後再講)


AVP入面Scar同主角Lex並肩作戰, 甚至最後親自幫主角留下印記

長老亦將自己把矛送畀主角

樓主好有心機

講得好正，支持樓主有時間講多d

好正，資料豐富，圖文並茂，整得好有心機

支持你

p1 條女話 最熱既夏季就會有p仔黎 li個設定有冇多d

長老把槍以前成日ff佢拍電影
點知一早就有漫畫

多謝各位嘅支持, 嚟緊打算每日更新一篇
新電影上咗就會轉返做劇情討論po

純粹係因為鐵血鍾意炎熱嘅天氣
貼近返佢哋母星嘅環境

遲下有機會再講
唔想等可以自己Search Predator:1718漫畫睇

多謝樓主

好齊料呀巴打
留名學野

咁佢講次次都有 係唔係都係同一隻 即係個區係佢既獵場

https://hk.auctions.yahoo.com/item/100433592389
上集3小強其實唔使1000
再平d可以去fb徵2手

係, 上幾次都係佢, 仲被當地人稱為乜乜惡魔

其實我想買AVP嗰幾隻
但貴勁多, 二手都2000up

好期待呢齣

樓主有好心機介紹鐵血個背景,希望可以介紹更多

見佢地敵對關係再照字面解,會唔會係俾巨大鐵血追殺先釋做逃亡者呢

有機會, 有理論巨型鐵血係部落中嘅執法者
專登派嚟追殺Fugitive Predator
加上巨型鐵血另一個名叫Assassin, 我諗今集逃亡者都凶多吉少

最有印象就係個大肚婆爆肚,入面個bb


當年重睇得dvd加普通led電視,黑到一舊舊咁

我都係 黑到咩都睇唔到 打鬥完全睇影

我好似2個套係係戲院睇
又係黑到老母西

繼續鐵血裝備系列

長矛


亦被稱為伸縮槍, 係一把可以伸縮嘅長武器
由一種不明合金打造, 特點係極度堅硬鋒利, 同時又十分輕盈, 加上伸縮式嘅設計更加方便於攜帶


首次出現於電影《鐵血戰士2》中City Hunter所用


呢把武器喺鐵血心目中嘅地位十分高, 每一個Young Blood完成訓練後都會獲得一把長矛
隨住年月嘅增長, 鐵血可以為長矛加上喜歡嘅裝飾同印記, 以紀念自己狩獵嘅歷史
當鐵血光榮地逝去, 佢哋嘅長矛亦會一同陪葬



使用長矛嘅好處係可以提供比腕刀更長更廣嘅近戰範圍, 同時輕盈平衡嘅設計有利於用作格擋敵人嘅攻擊, 尤其係好似異形呢種周身都係致命武器嘅獵物


必要嘅時候甚至可以投擲長矛作遠距離攻擊


部落入面將長矛使用得出神入化嘅鐵血會獲得「長矛大師」呢個稱號
長矛大師喺部落入面嘅地位僅次於長老, 負責教授年輕嘅鐵血如何使用呢種強力武器
據說一位長矛大師就可以抵擋一群異形嘅攻勢

AVP最尾鐵血長老送矛畀主角, 唔單止可以睇成俾主角嘅獎勵, 亦可以視為對主角作為戰士嘅肯定