有日屎忽痕一條友去印度食左半個月咖哩

推post支持樓主

市集內9成都係男人，就算係我行過都會惹來一雙雙奇怪嘅目光，所以如果一個女仔黎應該會覺得好驚。雖然佢地其實係冇惡意，不過點都會令我覺得周身唔聚財。



亂中有序、應有盡有，印度人好少講價，又或者可能只有遊客先會被抬高個價。當日我拎起一個花紋好靚嘅鋁碟，佢叫我開價，因為我係佢今日第一個客人，我試探性咁問佢〝How about 10rs?〞我以為佢一定會拒絕我，點知佢一口答應，仲講咗句〝because you bring me luck.〞原來好多印度人對於每日嘅第一個客人好重視，覺得佢會為間店帶黎好運，所以我開幾多佢都會賣俾我。最後我俾咗100rs買咗隻碟，補償返我曾經對佢嘅唔信任。



從賈馬清真寺上望過去，望到了紅堡，也望見了最另一種繁華。

好好睇

多謝大家呢個月既支持
聽晚應該埋尾了
我都要好好諗下點總結呢半個月既trip

咁快完

支持
呢d先係真遊記 真摯又唔嘩眾取寵

lm

追左成朝
發覺真係好好睇
樓主加油

追左成個月好唔捨得樓豬

唔似得隔離垃圾日本幅射post

舊德里的黃昏



時間過得好快，轉眼已經係放工放學嘅時間，茶檔依然熱鬧，不過除咗印度大叔，仲多咗好多上班族同學生哥。天然嘅空地就係小學生最鍾意嘅球場，板球果然係印度人嘅國民運動，d小朋友真係由細玩到大，我又諗返起我細個嗰陣，冇電腦冇手機嘅日子，都係好似佢地咁同其他小朋友喺球場踢下波、玩下四驅車，連玩gameboy都要面對面用雙打線對戰，雖然好old school不過又真係好開心。



細路仔永遠都係最天真無邪，佢地唔開心會喊、高興會笑、會直接問你拎糖攞錢，唔會用語言偽術去扼你，就好似呢兩兄妹咁，妹妹執到粒糖，阿哥好曳咁一手搶走咗，然後阿妹即刻喺度大喊扭計，阿哥仲好得戚咁企喺旁邊笑，而我都偷偷跟阿哥一齊笑，因為我諗返起自己以前都做過同樣嘅野‥





離開市集，行第二條路返去地鐵站，順便睇吓舊城區嘅民居。破爛嘅外牆、鬆脫嘅招牌、凌亂嘅電線之下，生活著一家又一家的印度貧民。街頭嘅小食檔地下不斷有老鼠走過，但仍然大排長龍，因為一件samosa只係賣緊5rs，或者對佢地黎講已經係一日嘅晚餐。











水洩不通嘅街道，人力車同tuktuk爭先恐後搶位cut線，雖然之前喺varanasi、jodhpur已經見慣見熟，不過配合埋舊德里呢度又有另一番景象。街上幾乎全部都係男人，忽然一架超載嘅tuktuk經過，吸引我嘅並唔係佢坐爆咗人，而係車上竟然全部都係婦女同埋小女孩，同街條街形成咗強烈嘅對比。

臨走之前，我去咗新德里車站隔離嘅Paharganj Bazaar，亦都係我第一晚落車嘅地方，不過當時太夜所以我冇停留。呢度好多店都係上居下舖，而且亦都係好殘舊，不過我冇打算要買d乜，只係諗住用一個最輕鬆嘅步伐黎感受埋我喺印度最後呢兩個鐘。









中途發生咗樣小插曲，就係中途我見到有個印度紋身henna嘅檔攤，就行咗過去睇下，雖然我知道henna喺印度通常都係已婚嘅婦女畫喺手上嘅禮俗，但我就覺得好得意，反正一星期左右就會甩，玩下都無彷，於是就問下價。佢show咗張紙俾我睇話1inch 50rs，其實初初我都唔太知點計，就望下隔離個女人畫咗前後手掌都只係300rs，咁我應該都唔會太貴於是就俾佢畫啦。



點知佢畫完乾咗之後拎把尺出黎求其度兩度就用部計數機㩒個數出黎，一睇就係眼都突埋，佢打咗5千幾rs！！哇哇！真係㩒住我黎搶，不過我都叫喺印度生活咗半個月邊有咁易俾你大到，於是我一於惡過佢就話明明隔離咁都係300rs，有乜可能我要5千幾？可能佢冇估到我見到佢收錢，於是就話隔離個女人係佢鄰居所以收佢友情價，即係我想講呢d大話3歲細路都唔會信（香港only，印度人可能會信）。然後我就大佢話我今日走，用晒d錢架啦！（其實都係真，我成身得返1500rs左右用黎搭車加dinner）佢就叫我開價，我就話我最多俾1000rs最多我夜晚唔食飯，本來佢都想回返我價，不過見我企硬佢就話ok，然後收咗我1000rs。最令我估唔到嘅係隔咗一陣佢竟然回頭俾返200rs我，叫我上機之前買d野食啦。唔知點解嗰刻我嘅怒氣全消，仲有d感動添，雖然我知佢都賺咗我好多，但忽然良心發現呢下真係令我更深信一句：

喺印度真係咩事都有可能發生！！

原來今日完唔到
聽日先寫ending

咁又唔好咁講
大家唔同style姐

唔駛唔捨得wor
下個trip如果我唔懶嘅我會再寫架
最緊要有人睇

謝謝
我睇返先發覺打錯好多字

我寫遊記鍾意感受行先
景點美食做點綴
所以對想去印度嘅人可能功能性不大

多數樓主
一次過追晒，好似去咗一次印度咁

你睇過你就明，好低質
又影人全家福po出黎，又懶係badass咁搏attention

一世人都未必有機會去印度, 多謝樓主你篇遊記可以比我了解下呢個國度

er...我真係冇睇
冇時間睇

有機會真係可以去下，由其係男仔，唔太難

旅人經常抱住一句格言，就係「無論你幾唔捨得呢度，你都知自己無辦法留喺度，唯一可以做嘅就係搵機會再黎。」而呢個旅人就係我。

印度雖然唔係我最鍾意嘅國家，甚至可能連五甲都不入，但今次的確係少數我仲未離開已覺得有d唔捨得嘅旅程。朋友問我印度好唔好玩，我唔識答佢，因為好玩嘅定義實在太廣，有人會覺得真係有d實際野玩先係「好玩」；有人會覺得食得好住得好就係「好玩」。但睇返我今個trip，食嘅來來去去就係咖哩、薄餅、samosa、lassi；住嘅一唔係冇熱水、一唔係就係碌架床，同好多人「好玩」嘅定義實在有出入。不過印度最令我難忘嘅，唔係四色城唔係泰姬陵，而係我呢15日遇到嘅人同事。

無論係男尊女卑嘅Ajay、亦友亦盜嘅Shasha、抆完屎同我握手嘅Rohit、志同道合嘅Rahul，以至到喺餐廳追尋夢想嘅嗰班毀容女仔、火車上遇到嘅波蘭夫婦、無數同我selfie嘅人、幫咗我好多嘅hostel老闆等等，每一個都係我今個trip嘅其中一忽拼圖。無錯恆河係好特別，但如果冇咗旁邊嘅小販、落水沖涼嘅伯伯、用水洗衫嘅婦人，其實佢都不過係一條好普通嘅臭河。

同埋可能係因為自己一個人，事前亦冇任何完善planning，反而令成個trip多咗變化更加精彩。上年嘅伊朗、今年嘅印度，都令我睇到好多我唔知道甚至從來冇諗過嘅野。冇錯印度可能喺人眼中好危險，尤其係對女仔，不過呢刻我都可以幾肯定，我一定會再黎呢個國家，因為印度太大，我仲有好多地方好多野想睇想探索，希望有機會可以再繼續我嘅印度遊記！







印度…To be continued...

終於寫完，中間好多錯字好多甩漏
多謝大家呢1個月嘅支持
其實我個人好懶，之前有幾篇遊記都爛咗尾
今次全靠大家呢千幾個正皮同埋留言先令我撐住寫落去
有時做完野好攰都要叫自己點都要死一篇出黎先

希望呢個post會令大家更了解印度，又或者對印度呢個地方有少少改觀
如果做到我已經好滿足了

至於未必會親身去嘅
如果睇完個po好似自己去咗咁
我都算功德完滿la

黎緊下個trip見到！

（其實呢度真係出po出得好快，我自己個page仲係出到shasah咋 ）

好睇 辛苦晒