有日屎忽痕一條友去印度食左半個月咖哩

加速

Lm

live!
想去印度好耐

live jor, G持
無柄膽唔大，睇post止渴。
搵下你個page先

第二朝起身，Rohit話要喺rooftop同英國妹飲咖啡，而我就想出去食d野再行下舊城區。Jodhpur比起Udaipur更污糟，到處都可以見到牛屎同垃圾，不過同Varanasi相比依然係小巫見大巫。行過小巷民居，忽然有幾個小朋友走過黎同我講〝One photo, one photo〞，我初時以為係印度人嗰種鍾意人幫佢地影相嘅心態，就冇為意幫佢地影咗，點知一影完佢地就伸出手大叫〝Pen, pen, pen〞，我話我冇筆，然後佢地就轉為〝Money, money〞，之後仲要越來越多細路走過黎，見到佢地貪婪嘅表情，唔知點解當時我都怯咗怯。我見越來越多細路行緊過黎，我好驚自己個袋會俾佢地扯爛，於是我靈機一觸，喺個袋度拎咗包muji糖出黎，講咗句〝I just have candy〞然後拋高包糖，而我就趁佢地轉晒focus時極速離開咗，不過我擰返轉頭見到佢地都好似幾鍾意包糖。



後來我先諗返起可能係d台灣人d blog成日叫人可以帶d筆去送俾當地d小朋友，可能因為咁就養成咗佢地問人攞筆呢個習慣。我個人就覺得咁做有好有唔好，的確筆唔貴，亦都幫到佢地，不過又有可能令到自己好麻煩，因為你俾咗一個細路，只會有更多細路追住你。





本來尋日我都唔係好明點解Jodhpur會叫做blue city，而家終於都明明地，因為我每行到一條小巷，都總會有一兩間屋係油咗藍色，至於點解係咁，都有好多個說法。有人話係因為藍色最有慰藉心靈嘅效果；又有人話係同印度嘅宗教神話有關；亦都有可能只係因為藍色可以反射熱力，令間屋更涼快，真正原因真係不得而知，但正正因為咁，拉賈斯坦邦又多咗個顏色城市啦！

守理鐘果Part 都好大感觸

好似想講人走後
所有的事物都帶唔走咁

諗返起有一日我上堂訓教
一醒回神果下 唔知係唔係仲累緊
有種感覺 我Feel到自己係控制緊自己起身
然後靈光一閃 我精神意志同肉體係唔同
有日我會死 我就控制唔到身體
咁我再Recall唔到自己起身
就Lost所有野
可能唔太關事 但係想講Ge係
人生好短 失去係好可怕
你想珍惜時都珍惜唔到
多謝樓主幫個伯伯影相
同聽佢講佢的故事

強烈建議 樓主去旅行Keep住寫遊記
唔係要睇食玩訓
而係睇風土人情
比起好多書 寫得更有味道

又live

寫得好精彩，睇完D記憶返晒來

請繼續

一路行一路行，沿住一條斜路就進入咗梅蘭加爾城堡，亦即係我地尋日喺clock tower見到好宏偉嗰座建築。呢個係我喺印度睇嘅第三座城堡，講新鮮感一定冇乜，正如歐洲嘅教堂、伊朗嘅清真寺、澳洲嘅石頭一樣。不過對於呢座古堡，我仍然都係覺得好靚，因為我本身對紅土建築物就有一種偏好，所以每次見到都會影好多相。









梅蘭加爾城堡係印度最大嘅城堡，大約喺550年前建造。遊客要入去又要俾印度人食多600rs差價，而且相機係要另外買票架！印度好多景點都係咁，話會怕相機會對歷史建築構成影響，唔通俾咗錢就唔會做成影響？不過作為遊客，影機呢100rs都要焗住食。之前上網見到有d台灣人教人話可以同佢講入去唔會影相然後唔買相機票，但入到去可以偷影冇人捉，雖然我覺得可能真係work，但我完全唔認同呢個做法，既然人地係明文規定寫到明，作為遊客就應該遵守人地嘅規則，而且100rs又唔係多，點解要用呢d旁門左道去慳嗰少少錢？萬一遲d人地完全禁止相機或者加票價，害嘅咪又係其他遊客，所以我寧願你覺得貴嘅，就索性唔好入去，逃票嘅行為，同大陸人爬入動物員比老虎食咗有咩分別？





城堡由入口到室內都好莊煌好有氣派，不過身處喺入面同時令我諗到而家印度貧富懸殊嘅問題。印度就好似以前嘅中國，有錢嘅人真係可以好有錢，而窮嘅人真係可以好冇價值，甚至你用幾千港幣就可以買起一個人，你話呢個社會有幾咁可悲？而最慘嘅係咁多年黎印度政府都冇諗過去改善，大陸經濟呢十幾年突飛猛進，但印度人嘅生活仍然係苦不堪言。













不知不覺行到最高處，由城堡上飽覽整個Jodhpur，藍色之城果然所名非虛。對於當地人黎講，身處此地可能係一種貧窮，但對於長期生活喺高樓大廈嘅我黎講，呢個景色其實真係一個天堂。












臨走之前，當然要做下你生意先啦

個日我睇到佢個眼神都眼濕濕
佢英文唔好但都好努力去表達自己有幾唔捨得呢度
我都即刻諗返原來好多人都唔係必然

多謝
因為我覺得食玩訓要寫唔難，其實個個都寫到
不過可能個個都差唔多
而我想寫嘅係我每次旅程只有我自己先體會感受到嘅經歷

聽講入朝定唔知咩區域要除鞋
有d人就係偷鞋再拎返去賣 唔知係咪真
樓主你#656 寫鍾樓同個小市集寫得好正

又一day 聽日返工等新文

係咪muji柑桔糖 印度仔岩食？

留明

藍色城好似玩aoe d建築咁

多數廟同清真寺都要除鞋
因為我著舊鞋去所以唔擔心呢d
我都見有人會拎住對鞋入去
亦會有d景點會有人收錢幫你keep鞋

係，諗住買黎搭車食

繼續遊走喺Jodhpur街頭，原來呢度仲有另一個市集，而且更加local更加熱鬧。無意中行到一個商場，而且係有mcdonalds架！應該係我黎咗個幾星期第一次見到m記，諗住走入去個商場行下啦，頂你，一間舖都冇，死城黎嘅！







Rohit比我早一日走，臨走前我地交換咗whatsapp，佢話如果我去到德里嗰邊有d咩事可以搵佢，佢可以搵朋友幫手，講真呢2日我好感激佢，買野幫我講價，d印度佬想煩住我佢幫我叫佢地走，聽唔明又可以搵佢翻譯。不過Rohit走咗又未必壞得晒，因為咁樣第三日俾我識到兩個韓妹。









距離去Jaipur嘅火車仲有大概半日，夠我行埋幾個尋日冇意間發現到嘅小景點。第一個就係呢個水井，喺印度有好多呢d大大小小嘅水井，佢地外形獨特，牆壁同樓梯嘅舖排形成咗一個一個嘅三角形，有好多人都鍾意去呢d水井影相拍片。不過通常呢d水井都唔會喺市區入面，可能要搭車特登去，咁岩尋晚俾我搵到原來Jodhpur嘅舊城區中心，就有一個水井。



正當我影緊相嘅時候，黎咗2個韓妹，本身都冇乜野，不過佢地越影，就有越來越多印度仔走過黎問佢地合照，我睇住佢地個樣由笑笑口變到尷尬但又唔知點拒絕，於是我就走過去大聲講，「不如我地一齊影張大合照啦！」跟手有幾個印度仔即刻走開咗，剩返幾個同我地影。影完之後佢地問我打算去邊，我話我有個garden想去，佢地話想一齊行，然後我地4個人就起程去Jaswant Thada，至於點解係4個人？因為唔知幾時有個阿根廷仔跟埋我地一齊行話想一齊去，咁大家都係backpacker梗係一齊行啦！

原來兩個韓妹都係各地出發自己一個黎印度，佢地一個黎三星期、一個黎五星期，不過咁岩係Delhi識到大家，所以就一齊同行。我問佢地點解咁夠薑自己一個女仔黎咁勇，佢地話唔驚啦，去邊度都有危險架啦，自己小心d就得，我同佢地講你千其唔好俾香港人聽到呢番話，會俾人批鬥架！

號外：Jodhpur街頭小事



行完城堡之後見到班學生黎參觀，充分見證到d人成日都話印度人bb個時好可愛，年青時都仲ok，大個咗之後個樣 。丫唔係，其實我係想話呢班學生見到我之後好想衝過黎，不過個sir喝住佢地，而我就無謂阻住人地上堂啦。



繼印度煎pan之後我又巧遇印度馬明，我同佢講香港好多妹妹仔lum你喎，然後佢靜靜雞問我可唔可以介紹幾個俾佢識。



呢3個叔叔見到我之後好想同我講野，但又完全唔識英文，一直係度指手劃腳，但後來我估佢地應該係想叫我幫趁佢隔離間士多。



呢位男士無啦啦走過黎捉住我隻手，嚇到我飛起。原來佢係想我幫佢影返張相，不過佢個pose到底想點‥




Clock tower出面呢間omelette真係好好食，個樣好似好普通，但食落我會話係我印度之旅既top5呀！你睇阿叔隔離排雞蛋，就知有幾好生意啦！真心推介呀

個水井好似係the dark knight rises, the pit 個場景既原形黎

https://en.wikipedia.org/wiki/Chand_Baori

可能not exactly 係你去果個

樓主有tg 嗎? 留個嚟聯絡下

Dark knight 邊一幕