我地係個Ghat度hae咗成粒鐘，忽然見到班印度中學生話要同我影相，本身影完都冇乜野，點知一睇返頂丫！我同佢地撞衫嘅！！如果唔係我膚色白佢地少少我差d都搵唔到自己呀！
Shasha同我講，下晝佢可以車我去一個遠d嘅山同湖，嗰邊睇日落靚好多，佢唔收我錢，淨係幫佢入返d油就ok，我心諗電單車油錢有限數啦，所以就跟咗佢去一齊入油。去到油站，個師傅問我地要入幾多，入滿就大概500rs，我計下500rs大約都係60蚊港紙左右，點知我未開口Shasha就同師傅講話入住200rs先啦應該夠架啦，真係唔夠先再入，我又係打左個突。
沿路我地兜過咗幾坐山，睇到好多當地人嘅農村同鄉郊生活，我相信如果唔係Shasha帶我黎我真係冇機會睇到。去到中途，大陽開始落山，我先發現原來日落我係睇幾多次都唔會厭架！Shasha又叫我幫佢影咗好多寫真，話要send俾佢個日本女朋友喎。
返到去之後又去咗佢uncle度食飯，佢終於開口同我講，佢話有幸認識到我呢個朋友，同埋呢2日玩得好開心，不過因為佢仲係學生冇收入，所以如果我覺得開心嘅可唔可以俾少少錢佢，佢冇講明要幾多，其實我都估到佢應該都係個guide咁，只不過用一個friendly d嘅方法去接近你。嗰刻得冇咩特別反感，可能係見到呢邊d人咁窮，而自己只係付出少少就可以幫到佢地，再加上呢2日Shasha真係好似帶咗我入呢個城市咁，雖然一開始可能係有目的，但我都相信佢係重視我呢個朋友嘅，如果唔係都唔會我返咗香港我地仲keep住有whatsapp contact啦。
所以呢一次，我覺得係天使贏咗。
附送少量Shasha寫真，佢真係好鍾意上鏡，行幾步又叫我幫佢影一張‥
