有日屎忽痕一條友去印度食左半個月咖哩

巴打我有個問題

我黎緊想十月去印度
唔計飛機有七日半
因為時間關係有兩個選擇

1. 金三角加Varanasi

2. 金三角加Udaipur & Jodhpur

因為我想Taj Mahal睇日出日落, 所以冇時間選擇一二去晒

如果我鍾意影靚景係咪應該選 2 好d?

Thanks!

食野夠可能哽死拉，你會唔會唔食

我仲BOOKMARK緊,有人推返

其實你得7日半，1or2都好趕
我當你delhi真係淨係留頭尾1日半，即係得返6日
agra你要睇晒日出日落即係又至少要1日半
jaipur我覺得最少要2日
即係你得返2日，基本上2一定冇可能
1都好敏因為varanasi好遠，除非你domestic flight來回，但其實好趕

如其咁趕，我覺得7日半淨係金三角都差唔多
頂多加個jodhpur

等我寫埋呢篇抖下先
今年好多野寫
黎緊6月去波蘭匈牙利，7月去尼泊爾行山

你召埋我個份

遊走在新與舊之間－新德里篇

好多朋友成日問我，「新德里同舊德里有咩分別？係咪2個唔同地方？咁同德里又有咩唔同？」其實好簡單，德里本身就係一個古城，不過後來因為人口增長，所以政府喺古城旁邊擴建，成為咗一個新城區，而為咗好讓人區別，於是就加咗個〝New〞字喺前面，成為咗而家大家成日聽到嘅「新德里」，而德里就係新舊城區結合嘅一個統稱。



新舊德里無論喺建築、環境、經濟上面有好明顯嘅分別，而遊客如我，單靠一條地鐵黃色線，就瞬間將新舊城區連接，當我從新德里走進舊城區，確實令我感到有d驚訝。



新德里嘅中點，無疑就係康諾特廣場，第一晚見黎呢度搭車嗰陣，我都差d認唔得呢度仲係印度。嶄新嘅商場、熟悉嘅牌子、連鎖嘅食群、煩忙嘅上班族，冇錯！呢個就係點解我通常都唔太鍾意去一個國家嘅CBD嘅原因，正如我唔鍾意東京，唔鍾意悉尼，唔鍾意德黑蘭，唔鍾意伊斯坦堡等等。





不過當日其中一樣令我好興奮嘅就係，我見到Nando's 呀！！！！有冇人明當你喺印度食咗十幾日差唔多嘅野個陣忽然見到你最鍾意嘅餐廳嗰種感覺？自從我去咗澳洲working holiday返黎之後，我就對Nando's念念不忘，之後無論係喺馬來西亞、新加坡、紐西蘭旅行嗰時我每次見到都一定要食返餐去回味一下，到底香港幾時先肯開架？





食飽飽之後，另一樣好重要嘅就係寄postcard。我係一個去旅行唔鍾意買手信嘅人，因為我成日覺得我求其買d野俾你交差又冇意思又唔知你鍾唔鍾意，而且我backpack又冇乜位放唔到幾多野，淨係買俾d唔俾d又好似唔公平，所以最後我就索性唔買手信，改為寫postcard。我d postcard好用心寫架，每張都寫到滿，因為今次印度比較特別，所以要求要postcard嘅friends都比較多，印象中我繼繼續續寫咗幾日先寫完‥

去同寫兩回事,一陣去完又唔寫打撚死你

當然新德里之中本身都有d比較舊同埋髒亂嘅地方，而呢d地方喺新里德入面就好似被打上spotlight咁，顯得格外顯眼。我覺得新德里嘅人比起我之前去嘅城市更加冇人情味，更加想劏到你一頸血。好在我有咗2星期嘅經驗，黎到都足夠應付有餘，但如果第一次黎就踏足德里，可能會被嚇親都唔定，因為印度最奸詐嘅人，你都可以喺度搵到。







都係嗰句，自己一定要醒水，無論係人太多或者人太少嘅地方都係。就好似新德里其中一個都幾熱門嘅景點「印度門」呢度。印度門其實就係印度版嘅凱旋門囉，無論大小造型都好相似，不過最鍾意湊熱鬧嘅印度人當然好鍾意呢度啦，由早到晚都人山人海，我見過有小偷想趁亂偷野、又有阿叔想乘機抽水，嗰刻我唔知哪來的勇氣好大聲講咗句：「What are you doing?」嚇到阿叔即刻跑走咗，事後諗返如果當時佢係想衝過黎打我咁點算？不過好彩我都證實咗一樣野，壞人多數都係心虛架。













去印度門之前，其實都有個地方幾值得去，就係Birla Mandir。比爾拉廟係一坐印度教嘅廟，入面記錄咗財富女神吉祥天女同佢丈夫那羅延的故事，亦都有好多印度信眾去供奉同參拜。呢度除咗佢本身個建築好靚好值得睇之外，仲可以睇到印度教信徒嗰種虔誠同尊敬之心。不過廟入面唔可以影相，相機要收喺出面locker，所以就只可以用記憶去記錄了。

由一開po追到就完有d莫名其妙既感動 加油樓主

繼續等完

推

多謝

有nados食咁好

有d 唔捨得，呢個遊記寫得好深入，唔係單純飲飲食食

〝Is Hong Kong a country?〞原來佢地成日都聽人講係黎自hk，所以好多人都以為香港係一個國家，當然我只係答咗一句：「Of course.」

#818

不過上到最高我先發現原來有個位可以偷竊！！又係呢d窗仔！如果你鍾意偷竊嘅，Jaipur真係一個不二之選啊！！！！！！！！！！！！

已cut quote
樓主你係鍾意偷窺定真係鍾意偷竊 ？

已cut quote
樓主你係鍾意偷窺定真係鍾意偷竊 ？

頂係wor
你唔覺我真係唔覺
自

首都漫遊－色彩更豐富嘅舊德里

如果你問作為首都嘅德里有咩咁留得住我，我相信就係新與舊之間嗰個對比。比起新德里，舊城區嘅色彩顯得更奪目耀眼，雖然呢度冇好靚嘅裝潢、亦缺少咗比較整潔嘅街道，但舊德里周圍都充斥住一股濃厚嘅印度味。





舊城區最吸睛嘅相信就係遠處嘅紅牆城堡，一行過去都未入城已經見到滿滿嘅人潮，有印度人，亦有黎自世界各地嘅遊客。但老實講，我絕對唔建議大家晒500rs入去睇，除咗因為佢周圍都整緊搞到搭晒鐵架之外，最大嘅原因就係相比起其他city嘅城堡，呢個Red Fort真係不值一提，不過我都係喺羊群效應之下死蠢咁入咗去。











成個城堡我認為最特別嘅，就係城門通道呢度有個市集，不過因為全部都係扼遊客嘅價錢，所以我都係求其影咗張相就走，不過好死唔死嘅就係，因為有人趁我影緊呢張相個陣，偷走咗我張門票，到我去到檢票口嗰陣先發現。個刻真係好唔甘心，竟然最尾一日先老貓燒鬚俾人偷野，另一方面又唔係好想再晒錢買過張飛，於是我就博一舖咁將件事同個guard講，點知個guard竟然話ok然後俾我入去，證明印度人對遊客都係有一定重視的，之前我都聽聞過印度政府會嚴打嗰d向遊客犯罪嘅人，相信都不無根據。









行咗都冇一個鐘就行完呢度，好彩我冇俾多次錢買多張飛，如果唔係真係後悔死！入黎最開心嘅就係同呢個勁得意嘅靚仔玩咗陣。











其實黎印度真係唔需要特別去搵景點行，因為黎咗咁耐我發覺有時亂咁行反而仲多野睇到仲多故事聽到，景點係死物唔識郁，你下次黎佢都仲會喺度俾你影，但係有d人有d故事就得一次遇上嘅機會，錯過咗就係錯過咗，而我去旅行呢，最期待就係遇上呢d故事。