被delay
飛機6點半準時起飛,印度嘅內陸機好細架,所以起飛嘅時候都搖晃得幾厲害,不過我由於太攰,所以上咗機之後就即刻抱頭大睡,諗住坐過靚鐘就到目的地,點知係我半朦朧中聽到機長廣播,不過由於佢係講印度文,我根本聽唔明佢up乜,雖然佢之後都有用英文再講多次,但係佢d口音真係好難聽,坐我身邊個印度人又唔識英文,真係雞同鴨講,所以係呢個時候我做左個好重要嘅決定‥就係咩都唔理,訓多陣先,直至我一醒發現點解成2個幾鐘都未到,就知出事。
問返空姐咩事,先知道原來因為Varanasi機場太大霧所以降落唔到,當時架機已經開始降落緊再東面d嘅加爾各答機場,呢個亦都係我本身plan咗飛返香港嘅地方,但因為我太遲先申請open jaw所以趕唔切,估唔到因為呢次陰差陽錯而黎咗呢度。空姐話要作短暫停留,等嗰邊d霧散咗先可以再起飛,結果呢個短暫一下子就停留咗兩個幾鐘,機上嘅人開始鼓躁,而空姐就要不斷派水派零食黎震壓住d人群,至於我呢‥都係訓多陣先。
最後等到十一點幾,飛機終於可以重新起飛,最後順利降落Varanasi機場,而原本8點就可以到達嘅我,最後搞到差唔多一點先出到機場。但係抱住樂觀精神嘅我喺個刻覺得真係好,我唔駛搵地方挨眼訓hae住等hostel check-in,於是我馬上就去搵prepaid taxi個counter搵的士去hostel,殊不知又做咗水魚‥