我在恆河看眾生相
經過咗第一晚嘅恆河夜祭,其實感覺都幾震撼,無論係場面止或者見到印度人對宗教嗰一份熱情上,不過由於經歷咗一晚凌晨機+訓機場+反覆轉折嘅內陸機+個幾鐘車程到hostel,我9點幾已經身心俱疲,要宣佈正式收皮。返到hostel個陣,見到間四人房都仲係得我一個,我諗今晚我可以獨佔間房。於是我就鎖咗門除晒衫,以勝利者嘅姿態走去沖涼,點知頂丫!冇熱水嘅?任憑我點扭點開關d制,花灑噴出黎嘅都係凍水,而且仲要係弱弱的水流。雖然一月份印度嘅天氣係幾好,日頭大部分時間都二十幾度,不過一早一晚就會跌到得返十度左右,衰在我尋晚坐咗晚飛機已經冇沖涼,所以我決定豁出去洗頭,不通知親友,於是我經歷咗第一日,就成功令到自己開始流鼻水‥
第二朝早本來好想好似d台灣blog講到好瀟洒咁晨早六點起身走去恆河睇成班印度人晨浴,但我唔知係因為朝早太凍定我唔覺得整熄咗個鬧鐘,當我起身嗰陣已經係8點半。我即刻起身刷牙洗面換衫,再用我嘅奶力盡力喺避開晒d地雷之下盡快黎到河邊,不過我見好多人已經開始抹緊身著緊衫了‥雖然係咁,係間中仍有唔小人喺唔到嘅台階準備落河沖涼,大概係好似我呢d唔知醒嘅人吧。
講到佢地沖涼嘅習慣都幾得意,男嘅通常會就咁著住底褲或者包塊布就落水,而女嘅如果係後生通常都會包晒成身咁落水,而老d嘅就可能會淨係帶個bra加底褲就落水,所以喺思想都算封閉嘅印度黎講其實又幾開放。仲有佢地沖涼基本上係唔會用任何洗頭水沖涼液嘅物體,只係會落水浸下再用d水洗下頭,咦但係我記得明明尋日hostel個人同我講呢度每間hostel都係同恆行相接架wor,咁咪即係‥不過對Varanasi嘅人黎講呢個係出生至今嘅習慣,可能佢地又真係習慣晒掛。
不過最令我覺得唔舒服嘅係佢地會用恆河水黎刷牙,我見到都不禁心中大叫WTF,雖然hostel嘅水喉水都可能係來自恆河,但起碼我見到嘅係透明而唔係泥黃色,我仲可以安慰到自己,但親眼睇住佢地咁做又真係另一個層次嘅視覺享受‥