有日屎忽痕一條友去印度食左半個月咖哩

連登server死左？
d圖show唔到tim…食完飯返黎再試下

lm

死哂圖

喺城堡住tuktuk出返黎個時經過呢舊野，原來就係水之宮殿，故名思義就係水內面嘅宮殿囉，好似可以入去，但聽聞同風之宮殿差唔多，出面好睇過入面，所以我就叫司機開慢少少俾我影張相就算。出返舊城區都差唔多5點幾，又未肚餓於是就行下風之宮附近個市集。呢個市集分咗好多唔同嘅區，由衫褲鞋襪到家品電器都一應俱全。





其間都有好多人走過黎想拉我去睇野買野，其實印度係幾好嘅，唯一唔好嘅就係行親街總係一直俾人纏住有時會覺得有d煩，而且開場白仲係千篇一律，除咗之前講嘅「my friend」同「which contry」之外，從佢地嘅開場白都可以大概得知佢地係賣咩，例如：

〝Hi my friend, your shirt is beautiful, where did you buy it?〞放心，佢絕對唔係真係覺得你件衫靚，因為當你答〝Thank you.〞之後，佢就會打蛇隨棍上問你〝How much did you buy it? We have more and with cheaper price.〞所以之後我應對嘅方法就係講一個好平好平甚至係冇可能做到嘅價，但估唔到有一次我講完之後佢話仲有得平d，結果我最後真係跟咗佢去睇，因為真係平到如果唔買好似做錯事咁。



〝Oh sir your shoes are dirty.〞呢個係想幫你擦鞋補鞋嘅，不過我著對舊鞋黎就係為咗掉，所以你做唔到我生意。

〝Hello, my friend how are you?〞然後伸出手同你握手，當你一握佢就會摙你隻手之後叫你〝massage, massage.〞

總之幾乎所有主動行埋黎嘅都係想做你生意架啦，所以唔識拒絕嘅人係有d蝕底。而第一日飛機上坐我隔離個印度人叫我要狠心d我大概明係咩意思，因為印度人真係欺善怕惡架，佢見你越唔識say no就會越蝦你，反而後期我扮下野兇下佢地佢地又真係會驚我，所以喺印度想買野冇問題架，惡d就得架啦！同埋有時候真係會麻木到直情無視佢地就算。不過有時候如果有散紙我都會主辦俾d細路或者乞衣嘅。



呢個係印度人結婚新郎哥嘅造型，見到之後我又諗起其實我一直想買頂清真個d帽仔戴黎玩下，於是就隨街問咗個穆斯林，佢叫咗我去唔知邊度買，之後又諗一諗話我應該唔識去，不如賣佢自己個頂俾我算啦，我問佢幾錢，佢身邊個frd話400rs，然後佢話痴線邊駛咁貴，叫我俾200rs就得，其實我覺得ok靚嘅，個價都合理就買咗了。好在我隨身有帶消毒酒精，噴幾下再戴黎玩下先。





冇錯，我夜晚都係屎忽痕忍唔住搭車過去水之宮殿個邊影下夜景。其實就真係隨咗呢舊野就冇野睇，不過又俾幾個印度佬走過黎r水吹咗陣。佢地好鍾意問〝Is Hong Kong a country?〞原來佢地成日都聽人講係黎自hk，所以好多人都以為香港係一個國家，當然我只係答咗一句：「Of course.」






水之宮附近好多人賣呢d雜豆，而我就覺得係因為呢度實在太無聊，唔食下花生都唔知有咩做‥

live左

正
俾心機打埋佢

樓主點幫自己影相㗎
放心俾部機叫人幫手影咩

宣揚港獨

終於追到最新
樓主文筆好正 又好有意義

有d位可set腳架會set腳架（細八爪魚）
景點位會叫人幫手
其實唔明點解咁驚d人會拎走你部機
通常景點人多過乜咁
同埋真正嘅賊仔唔會係企喺度等你隨機叫去幫手影相個d

冇呀
我歷史考得差姐

thanks thanks
應該仲有幾篇就完架啦

好正啊!
想下年 Holi 果陣去下

猴子之城

返hostel之前，去咗間印度roommate推薦嘅餐廳食咗個full thali。Thali係印度好出名嘅菜式，亦都算係餐廳入面價值比較貴嘅食物，因為佢主打就係咩都有d。除咗有沙律做前菜，主菜有豆有咖哩有飯有yogurt，仲有一個好難食嘅蛋糕添，而有需要嘅仲可以另行添加薄餅。味道其實唔錯嘅，不過就唔係樣樣野都岩我胃口。



喺Jaipur嘅最後一日，返去德里呢個無聊之城之前，我決定要去一趟猴廟！原因呢？純粹係我喺城入面見到太多馬騮，然後我就問當地人點解呢個城咁多馬騮嘅，後來佢地先話我知原來Jaipur舊城區有個Monkey Temple。




有時我會諗，人如果同猴真係同根，佢地會唔會有朝一日真係會進化到好似人類咁呢？

去猴廟可以搭tuktuk，大約10分鐘車程，收你100rs；而另一個方法就係好似我咁選擇用30分鐘行過去，我去旅行好鍾意行路，並唔係因為想慳車費，而係我覺得比起搭車，行路更加能夠睇得多四周嘅野。無論係正趕住返學嘅學生，仍然不忘回頭對你微笑；抑或係家姐喺路邊耍手擰頭，為咗氹返扭緊計嘅細佬；定還是坐喺路中心嘅婦女，唔知為咗咩事露出猙獰嘅表情，每一個畫面、每一幅定格，都各自講緊唔同嘅故事。







企喺高處搭橋嘅工人即使冇任何安全設備，都仲可以談笑風生，反而我會為佢地擔心；經過一間間烤緊薄餅嘅小店，即使冇客人，佢地仍然繼續烤，於是我走過去買咗塊，因為我想試下傳統嘅味道。





一路行、一路睇、一路影，不知不覺，我已經黎到Monkey Temple。

見到樓主去得咁開心又激發左我單拖去埃及呢個念頭

一入到猴廟，最先見到嘅唔係馬騮，而係一檔檔嘅花生檔同埋無數細路仔嘅雙眼，想要得到遊客們嘅施捨。有個男仔走過黎話要做我嘅導遊，話我如果冇人帶住好易俾馬騮咬，初頭我都猶豫咗一下，但當我見到不斷有遊客自己從山上落黎嘅時候，我就知道其實唔難行，我微笑拒絕佢，請佢食咗幾粒糖，同佢講我自己可以應付。





除咗馬騮之外，喺度仲可以見到野豬、山羊、水牛、狗等等嘅動物，佢地不斷搜尋遊客留低嘅食物、花生殼之類黎飽肚，有人話你可以從一個國家嘅野生動物黎推測嗰個國家嘅經濟狀況，其實都幾有道理。







從高處望落去舊城區，沒有很pink，反而變成一間間彩色小屋，都幾棧鬼。





猴廟本身只係一個普通嘅神廟，因為佢有幾個大細不一嘅水池，所以養活咗附近村莊嘅人，不過慢慢地打理廟宇嘅人越來越少，而且因為水源所以吸引咗一大群馬騮喺度繁殖同生活，於是漸漸呢度就變成咗以馬騮聞名嘅猴廟。









入猴廟唔需要入場費，不過有人會問你收100rs相機費，作為猴廟嘅「保養」，雖然知道唔係官方，但睇黎冇得避，12蚊港紙豪比佢啦！











你可以當呢度係印度版嘅城門水塘，不過佢真係好好影，而且遊客又唔多，係一個好好hae嘅地方。









臨走時見到有一大群女人喺最大嘅水池沖涼，而且佢地仲將d衫就咁掛喺訪邊嘅鐵絲網上面，不過由於唔禮貌，我就冇影佢地啦。







不過上到最高我先發現原來有個位可以偷竊！！又係呢d窗仔！如果你鍾意偷竊嘅，Jaipur真係一個不二之選啊！！！！！！！！！！！！

走嗰陣見到一隻有6隻腳嘅牛，聽當地嘅村民講佢地認為呢隻牛嘅出現係幸運嘅象徵，所以一直綁住佢喺度驚佢走咗，好慘啊隻牛牛！

去啦，埃及我都好想去啊！

山羊同馬騮係高處獨照嘅相好有feel
好似擺pose

又live左

啲相有無執過架？ 好靚好利
好想買部相機

啲相好靚 用咩相機