睇完d細路打波,個心情都舒暢咗,雖然只係黎咗第二日,但感覺上已經適應咗呢度係節奏,雖然有時會覺得佢地真係好慢,例如order完野食可能要等20分鐘先黎到,但諗深一層,其實我地嘅生活節奏係咪真係有必要咁快呢?
再繼續行,沿路一路又見到好多牛,呢度d牛隻隻都唔同大細唔同顏色,印度人視牛為神聖,但又唔係隻隻牛佢地都會視為聖牛架喎。聽聞係如果隻牛條頸有一駝突出黎嘅肉先至係聖牛,而印度人見到佢地嘅時候通常都會拍拍佢地個頭或者摸下佢地條頸,但通常之後隻牛就會即刻走開,笑死我。
除左牛之外,仲會成日見到有好多狗同山羊喺條街度行黎行去或者攤喺度訓覺,呢d對印度人黎講習以為常嘅野,喺遊客眼中就會變得新奇有趣,所以我喺香港都唔會歧視嗰d影招牌或者雙層巴士嘅人,不過每次我去到外地影食物個陣都好驚會受到旁人白眼。
忽然間見到前面好大煙,我以為唔知邊度燒著咗火燭,呢個時候忽然有個印度人走過黎:「Hello my friend, which country?」一聽到呢句開場白,都已經估到咩事。「No photo, no photo here, funeral.」佢勉強咁將一堆單字砌埋咗一齊,不過好彩我都估到佢想講咩。前面咁大煙應該就係恆河其中一個火葬場,出發前我都聽聞過火葬場係唔俾影相,不過有d印度人會走埋黎同你講只要你俾錢佢,佢就可以帶你去一d可以影相嘅位。我冇應到佢,繼續向住火葬場嘅方向行。「Hey! No photo no photo!」我忍唔住同佢講咗句:「OK I will put my camera in my bag and I won't take any picture ok?」然後佢見我唔落搭就同我講:「Ok my friend, I work here in the funeral. You should give some donation.」然後佢就好似想攔住我唔俾我入去,ok fine,我就陪你玩下,於是我就頭也不回咁轉身走,佢想追過黎,不過呢個時候有對白人夫婦行過,然後佢可能見我冇機會,就即刻走咗過去對夫婦度:「 Hello my friends, you know no photo here?」我見佢唔再煩住我,就喺遠處影咗幾張相,然後就收埋相機去睇下呢個生死共融嘅地方‥