![](https://cdn.lihkg.com/assets/faces/normal/surprise.gif)
近排係跑步Group睇到有跑步新手問問題,大概話自己好耐無跑,想用zone 2 training練心肺,但係一跑就好易過zone 2,點部署?
然後好多網友俾唔同意見。有啲叫佢跑慢啲keep zone 2,有啲教佢練點,有啲話佢隻錶唔準,大概都係圍繞點練Zone 2。
我覺得好多新手跑者好易過份解讀訓練方法,睇到網上好多人話練zone 2係最有效嘅訓練方法就直接套用係自己身上,或者諗好多先跑,跑嘅時候好在意自己係咪係zone 2,一過左就好緊張,覺得嘥左訓練,所以寧願了解清楚先跑,或者質疑自己訓練有冇用。
而我覺得新手,最影響訓練效果大問題唔係點練,而係有練同無練。
我覺得跑步新手,唔需要諗得太複雜,想跑就跑,心率過左就過左,與其諗得太複雜,不如簡簡單單跑左個步先,唔洗諗訓練效果,跑左,出左身汗先算。
其實跑步好簡單,有人可能係因為想健康,可能係想挑戰自己,可能係唔開心,可能好簡單因為一套電視節目而跑。
誰人話必須要讀過書先可以為你寫詩。
而跑步,都唔一定要好專業先可以跑。
可以只係一個好簡單嘅原因或者毫無原因,想跑,就跑。
只要有跑,你都可以係將軍澳大迫傑,天水圍Kipchoge,銅鑼灣黃尹雋。
無野比離開屋企跑步來得更實際。