［是咁的］ 我喺加拿大住咗十幾年, 識到一個女仔叫Z...（3）

剛剛見到你嗰邊覆我

等我而家試下先.

btw, 頭先認真咁同泰國妹交流咗一陣, 作為一個員工, 感覺還好？

期待你哋嘅深入交流

暫時都仲係好表面

好彩追呢個post 既人都唔想樓主死
出面d post 貼左呢d 應該比人啫死左

btw 等出文

快樂嘅日子過得特別快, 尤其係當你同一時間有一位正屋加三位sp、再加一位我自己都唔知想點處置佢嘅Z嗰陣...

到最後, 我唔想再因為Ri嘅關係煩撚到A&R,所以當同叮噹、冬菇頭和平分手之後, 我就決定無視Ri（簡稱鴕鳥政策）, 選擇留職係間我哋剛剛幫佢開張嘅餐廳.

一間同Jimmy哥正仆街同一條行、係正麗花三姐妹隔離、First Markham plaza 嘅越南泰國餐廳-檸檬樹.

當時我選擇檸檬主要原因係除咗貪佢間餐廳夠細、人事應該唔會太複雜之外, 成公司入面唯一一位女員工, 係一個四十幾歲嘅阿嬋..

自從係 genius 做咗成年時間管理大師, 終於明白自己已經年紀大, 有啲嘢真係力不從心, 一拖四五六呢啲嘢真係唔好再搞我, 簡簡單單一條女已經足夠..

所以如果對方係物理上我食唔落嘅年紀, 斷估我都唔會亂咁嚟..

正所謂如果改變唔到自己, 唯有改變對方或者附近嘅環境去遷就自己, 係邊到仆街、就爬去第二到先企返起身.

當然之後遇上MM, 只係我爬起身嗰陣,唔小心爬咗入另一個窿..

Anyway, 檸檬樹當時嘅老細有兩位, 最搞笑係佢哋嘅英文名配搭仍然係A&R.

不過似A&R不同彼A&R, 為咗方便起見, 開多一隻字變成Ax&Ro.

佢兩位本身移民去加拿大之前,係香港都有幾間餐廳, 不過Ax係由低做起、捱到做咗四間茶餐廳老闆. 而Ro只係靠住老婆嘅關係, 做咗幾間越南餐廳老細.

所以雖然佢兩個都識煮嘢食, 但明顯Ax做廚嗰陣客人係會比較多, 而且對員工亦都非常之好, 喺食女故MM嗰part Ax亦有出場.

而Ro係屬於一忙嗰陣就會亂咁嚟、但一得閒又會諗埋啲屎忽鬼嘢搞員工嘅老闆.

而Ro第一件引進嘅屎忽鬼嘢就係：我哋由原先十點鐘閂門, 改開到凌晨兩點鐘！

Ax當時聽到嘅煩第一個反應, 除咗o嘴之外, 亦都一棍撲落去：嘩Ro哥, 你同老婆離咗婚冇人冇物就話啫, 我仔細老婆嫩, 你要玩到咁夜你自己玩埋佢唔使預我, 最多呢段時間你有幾多生意你自己袋,唔使分畀我！

Ro：唔使咁講嘢嘅..你諗下附近得我哋開到咁夜,出面凍冰冰過嚟食碗越南粉幾撚爽..

我聽見就心諗, 我都係金牛苑做咗成年, 以Jimmy哥咁仆街嘅性格, 如果有得賺佢點會唔賺？佢寧願準時收檔之後同附近幾間餐廳個老細非法聚賭、都唔願意開門, 就知根本冇可能有肉食..不過好似暫時都唔關我事, 就唔出聲.

Ax：咁撚爽, 你自己有冇出去試過？

Ro：屌！梗係冇啦！

Ax：屌！冇你又講！？

Ro：屌, 咁冇一間開到咁夜呀嘛..

Ax：屌！冇一間開到咁夜, 咪證明唔撚work囉！

Ro見自己呢個咁偉大嘅構想, 連續畀Ax屌咗兩野就擰過嚟望住我：靚仔, 你點睇？

我本身事不關己咁, 望住佢兩個屌嚟屌去、企喺隔離食煙,見無啦啦燒到自己, 就隨口答咗佢：你自己諗掂佢呀.

Ro即刻啤住我講：靚仔, 我請你返嚟唔使做呀？

我諗都唔諗就答佢：屌,我可以即刻唔做㗎.

Ro：咁又唔好..何必呢...

我：係囉, 無啦啦搞啲屎忽鬼嘢, 何必呢...

Ro：試下啫冇壞㗎..

我：你自己試飽佢囉.

Ro：我驚忙起上嚟, 我一個人搞唔掂..

我：忙住拍烏蠅呀？放心喎, 凍到咁, 唔好話人丫,肯定烏蠅都冇隻..

Ax可能喺隔離忍笑忍得實在太辛苦, 就拎起咗兩袋垃圾：我去掉垃圾, 總之呢壇嘢唔使預我,你哋自己諗掂佢.

我望住借啲意閃咗去嘅Ax：屌丫..你條仆街....

Ro可能見到Ax走咗, 就突然細細聲同我講：靚仔, 一係咁...十點鐘之後到兩點鐘嗰四個鐘, 我私底下加你一倍人工..

我聽見有錢收, 心諗咁又唔同講法..：嘩老細,你攞錢大我呀..

Ro：係呀, 我冇嘢多、就係錢多.

我猶豫咗幾秒之後, 就決定應承佢：既然你咁樣講, 我都冇辦法..

Ro：信我啦, 到時忙撚死你呀..

我：係係...你記得準時出糧就得...

Ro：得啦, 試幾個禮拜咋嘛, 我畀得起..

我：丫屌...

然後...果然不出我同Ax所料, 嗰四個鐘基本上就係全程瞓覺..真係瞓住喺度就有錢收, 好撚過去做鴨.

雖然我嘅日子過得極度休閒, 仲問朋友T借咗部Gameboy advance返去玩, 但望住Ro塊面一日黑過一日、然後又一日白過一日, 我知道再過多個零星期, 呢件咁撚戇鳩嘅事就會完結.

到過埋聖誕節, 終於連Ro自己都頂唔順, 有晚我喺後門出面、挨住自己架車食緊煙嗰陣, 佢行出嚟同我講：喂靚仔呀, 你覺得而家收夜咩情況呀？

我用支煙指一指空蕩蕩嘅停車場：屌..收夜定守夜呀？我想搵個家屬謝吓禮都冇呀老細！

Ro：屌...咁不如...過埋新年收返正常時間囉？

樓主食Z 波餅呢個情節間唔中都出現架啦

我本來想忍住笑、扮曬驚訝咁答佢：吓？你...
但忍咗唔夠幾秒, 我就笑出聲：鍾意捨得講啦？屌丫...

Ro：我晨早就想講啦！不過諗住畀機會你賺多啲錢啫..

我：嘩！多撚謝喎..

Ro：睇下我對你幾好...

我：一定係啦....

然後去到最後一晚收夜, 正正就係12月31號.

守夜守到大約十一點幾嗰陣, 喺後面睇緊報紙嘅Ro無啦啦同我講：喂靚仔呀, 你一陣有冇嘢搞呀？

我連部Gameboy advance都冇放低, 直接答佢：冇呀.

Ro：你唔係有女㗎咩？你唔使過去陪佢倒數咩？

聽到呢句, 我就有少少火黎：倒數條毛呀你老母！？你係咪而家放我走呀？

Ro被我爆咗嘢, 就有啲扭扭擰擰咁答我：唔係....我想講....如果你唔使嘅話...我要呀...

我：我屌！

Ro：你知啦...我前排先剛剛溝咗條女,話曬第一年倒數...

我：你都係怕自己一個人喺到無聊, 擺多隻吉祥物喺隔離啫, 不如你叫你條女過嚟陪你倒數, 我落去陪我條女倒數丫？

Ro：咁又唔好...一陣情到濃時,唔通拍埋幾張枱咩..

我：係呀快呀, 我call定人過嚟睇收入場費, 我包你以後好生意.

Ro：屌....幫手啦, 你坐多陣, 到夠鐘就幫我鎖門就走人...

我左手繼續打Gameboy advance, 右手舉起隻中指對住佢：仆街丫你.

Ro：最多我....
拎住個銀包行過嚟, 之後打開個銀包望住我講：umm..你收唔收卡？我現金得兩舊水, 頂一頂丫？

我：屌丫, 你又攞錢大我呀！

Ro：係呀, 咁得唔得丫！？

我：實得㗎,有邊次唔得？

Ro：屌..咁你自己搞掂呀, 我走先..

我：快d去仆街死啦...

Ro擺低咗兩舊水之後, 隻腳雞咁腳咁衝出後門,揸住佢自己架車閃人.

袋住兩嚿水喺身...呢刻, 我決定...煮返個越南粉食, 戇鳩鳩等夠鐘收工.

煮煮下越南粉, 突然聽到好似有人敲前門塊玻璃, 心諗唔撚係咁邪吓話..邊個夜媽媽屍變呀...

諗諗下, 我決定扮聽唔到,繼續煮自己個越南粉..等咗一陣, 敲門聲慢慢敲靜咗落嚟, 正當我以為甩難嘅時候, 變成公司電話響.

屌你老母咩...午夜凶鈴呀！？咪以為我未撚睇過原著呀, 明明就科幻小說嚟, 嚇我唔撚到嘅....

當公司電話響咗幾聲收咗線之後, 正當又以為一切安全嗰陣, 今次到我自己個電話響..

屌呀！？

乜撚嘢事呀而家！？？

Ghost call都識 redirect 呀？？？

因為檸檬樹正門係落地大玻璃, 我自己個電話又手多放咗喺前台, 即係我要出去聽電話,就會見到頭先敲門嚟嗰條“友”...

除非...

除非...我跪喺地下爬出去....

因為廚房出面就係個前枱, 兩者闊度一樣, 而且仲大半個我咁高.

當然, 我自問行得正企得正, 正所謂平生不作虧心事、夜半敲門也不驚, 我亦可以選擇光明正大咁樣行出去聽自己個電話, 反正道正門鎖咗, 就算喪屍圍城我都唔撚驚.

所以, 當首 simple and clean剛剛響完第三次嗰陣, 我決定爬出去.

爬到出去、匿喺前台下面, 鬼鬼鼠鼠咁伸隻手上去枱面, 一拎起自己個電話嗰吓...

仆你個街, 又再響..

嚇撚到我電話都爭啲跌埋..心諗屎唔屎使咁撚準呀..屌...

不過都係唔理得咁多, 即刻拎個電話落枱底望一望個來電顯示.

屌...

戇鳩鳩踎係前枱下面, 聽咗個電話：點呀小姐,咁錯蕩呀....

Z：有幾錯蕩呀！？特登過嚟搵你倒數㗎！

我：吓！？

Z：你唔好同我講你唔係餐廳呀！？我企咗喺門口喇！！！

我：er......我係到..

Z：咁仲唔嚟開門！？小..

我：得得得, 即到.
Z一收線, 我拿拿聲爬返入廚房、再扮曬冇嘢咁行返出嚟, 一路同佢打招呼, 一路急急腳行過去幫佢解鎖到門.

一開門, 拎住個袋嘅Z就即刻閃入嚟、一邊喺度講：嘩..凍到飛起呀出面...搞咩呀你？去到邊呀？敲咗勁耐門都冇人應...

我諗都唔諗就一氣呵成、出口成文：冇呀頭先去咗掉垃圾之後口痕就想煮個麵食廚房開咗抽氣扇嘈得滯聽唔到..

Z聽完呆咗望住我：先生,你玩開急口令呀？

我拿拿聲反鎖返道門之後答佢：err...... 你理得我丫, 你過嚟之前單聲丫嘛..

Z：冇呀, 諗住你今晚都係一個人, 咪畀個surprise你囉！

我：我要返工, 一個人有幾出奇？你好人好姐今晚得一個人先叫surprise...

Z懶得戚咁望住我：超..我特登推曬所有人, 過嚟陪你㗎！快啲感謝我啦！

我：係..感謝.

Z無再理我, 只係將佢揸住嗰個膠袋擺咗係枱面, 然後好似想喺入面拎啲嘢出嚟咁樣：喂, 夠鐘未呀？

我：咩夠鐘未呀？

Z：倒數呀！
講完四圍望左眼：撞鬼呀？冇鐘嘅呢度？！

我一次佢頭頂：係呀, 前排冇啦啦跌撚咗落嚟,爭啲扑死咗件...呢..就你企緊呢個位咋嘛..

Z啤咗我一眼：喂！

我：講笑啫....你冇戴錶咩？

Z：就係冇先問你..

我：我都冇呀,而家得返微波爐有個鐘咋,我過去睇吓囉...
講完我就行咗過去個微波爐到望一望：仲有5分鐘..

Z：準唔準㗎？

我：好過冇咁囉...

Z：妖...不過好彩仲趕得切, 唔係自己一個喺你餐廳門口倒數, 真係慘到極致..
講完就喺個膠袋拎咗個紅色嘅盒仔出嚟.

我：sorry 囉...咦？乜嚟㗎？

Z捧住個迷理芒果蛋糕、擰過嚟對住我笑住講：登登！

我：屌, 你又生日呀！？

Z：妖！倒數更係要有蛋糕先啱架！你都唔識嘅..

我：係係...咁我拎定啲架餐先...
講完就入廚房攞咗兩隻碟同把刀出去, 放喺個蛋糕隔離.

Z：不過冇咗個鐘..好似梗係爭緊啲嘢咁..都唔知幾時先開始倒數..

我聽完諗一諗, 就答佢：唔....咁好易啫..
之後我就行咗去裝咗杯凍水,然後放入微波爐, 望一望下時間再撳咗3分10秒, 之後大大聲Z：搞撚掂！仲響鬧添！

Z當時望住我嘅表情,好似想撼頭埋牆咁...

然後我哋兩個戇鳩鳩咁, 搬咗張凳坐咗喺面向正門嘅落地玻璃前面, 望住個空蕩蕩嘢停車場, 等微波爐響就開始倒數.

等等吓, Z突然用手踭撞一撞我, 之後話：我哋似唔似嗰啲畀人綁架咗嘅人質, 後面放咗個唔知幾時會爆嘅炸彈...

我聽見佢咁講就即刻笑出聲：咁我哋兩個都係人質？ 定其中一個係綁匪？

Z沉默咗一陣之後答我：我哋係人質..同時亦都係綁匪.

我一聽見佢咁講, 即時諗起當年火機同支煙嘅比喻, 就忍唔住串佢：丫屌...你集集講嘢都咁..
正當我想再問落去嘅時候, 突然聽都波爐嘅聲響, 即刻拉佢起身：喂屌！夠鐘啦夠鐘啦！！十、九、八..

Z企起身之後翹住我隻手：八、七...

我同Z同時望住對方, 笑住一齊數：六、五、四、三、二..

一...

零！

一數到零, 我就擰過去同Z講：Happy new years！！

Z亦都擰過黎對住我, 同時大大力咁攬住我：Happy new years！！！姐姐抱抱！

我：係係...

然後, 突然聽到背後不斷傳嚟嘭嘭聲.

我：嘩屌？新年流流撞車呀？

Z：你就撞車, 煙花呀！

我：吓！？邊個放煙花咁有型？

Z：咪你個商場囉.

我：吓！？唔係農曆新年先放㗎咩？

Z：點知你呀, 仲放緊喎！

我：係？
正當我準備擰轉頭去睇嘅時候, 發現自己被Z攬實咗嘅關係, 完全旭唔到.

我：小姐, 放一放手好喎.

Z：唔放.

我：但我想睇煙花嗰個..話曬個煙花我哋都有份夾..

Z：竟然？夾咗幾多呀？

我：唔知呀,管理費度扣..

Z：妖...

我：快啲放手啦！呢度個管理處出咗名快槍手,成棚人交足成年管理費, 佢十秒唔夠就射撚完㗎喇！

Z：唔放！

我：丫屌...

我再掙扎多幾下就決定放棄, 淨係聽住後面嗰啲嘭嘭聲開始越嚟越無力, 間隔亦都越嚟越疏落, 連我背住佢哋都feel到管理處班友開始陽痿..

Z：oh... 射完lu...

我：係囉係囉..乜柒都冇lu....

Z：你有我攬住你呀！

我：咁你係咪射篤煙花出嚟畀我睇？

Z：你又知我唔得！？

我：丫屌...有畫面, 當我冇講過...

Z：我而家就射出嚟, 燒死添你呀！
講完之後, 就用塊面喺我心口大力捽咗幾下, 跟住終於放開攬住我對手：食蛋糕啦！

我feel到自己心口有啲濕濕哋, 就順住佢意答佢：係係...食蛋糕啦...

食緊蛋糕嗰陣, 我突然間醒起一件事, 就忍唔住同Z講：丫屌！

Z：吓做咩呀？

我喺褲袋拎咗個電話出嚟：呢到咪有個鐘囉..做乜撚野用微波爐..

Z：丫.......係喎..屌..





印像中, 嗰一年係我同Z第一次兩個人、單獨咁倒數新年.

亦係最後一次.

我真係錯手post錯㗎咋

係囉, 剛剛又有啦

諗起完故當日會好唔習慣
無得睇樓主點做痴線選擇

幾時拍埋幾張枱呀