［是咁的］ 我喺加拿大住咗十幾年, 識到一個女仔叫Z...（3）

過咗馬路之後, 行緊去韓國餐廳嗰陣我就四圍望, 行行下就見到間已經閂咗門嘅餐廳, 透過玻璃望入去見到啲裝修幾靚, 心諗反正今年聖誕都仲未決定同D去邊到食飯....不如試下呢間？

一直翹住我隻手行嘅Z, 見我突然企定定唔喐, 就擰過嚟問：搞咩呀？

我：冇呀, 呢間嘢睇落ok喎..

Z：唔？閂咗喇喎！食咩㗎？

我：唔知呀, 見啲裝修幾靚咋....

Z：早講吖！下次生日姐姐同你去ikea食自助餐！

我：吓？ikea自助餐？熱狗同肉丸呀？

Z笑得勁仆街咁講：傢俬呀, 你食裝修㗎嘛..

我：丫屌.....

Z笑住拉我行過去玻璃到, 用隻手遮住啲反光裝入去望咗陣....：喂, 我隱約見到牆上面個餐牌, 好似意大利嘢喎...

我：咦？咁都ok喎..

Z：做咩呀？你想食咩？

我：冇呀, 諗住今年聖誕同D過嚟食咋..

Z扁曬嘴咁講：超~仲以為你想約我㖭~

我笑住問佢：丫屌..咁你有冇興趣丫？

Z：實有㗎.....
然後好古惑咁望住我加多句：你請嘅話...

我：ok啦, 咁搵日過嚟試囉..

Z：好野...喂唔得啦...真心肚餓, 行快兩步...
講完即刻拉住我,向住韓國餐廳個方向行過去...

避開咗門口嗰班大陸人同韓國仔之後, 我哋就推門入行入去餐廳, 果然的坐到爆曬..

Z見到咁多人, 即刻擰過黎啤住我, 之後講：oh no~有人要請食飯、請食飯、請食飯....

我扮曬睇唔到咁, 抱著一絲希望同門口個收銀大媽講：唔該, 2位丫.

大媽望一望就話：兩個？你哋好彩, 最裡面丫.

Z聽見就好驚訝咁話：竟然有！？

我忍住笑咁話：呵呵, 有人今餐食自己、食自己、食自己....

Z：超...行啦...
之後拉住我迫咗一大輪, 先入到去出餐位門口嗰張窄到仆街嘅枱坐低.

我坐低就問佢：食咩呀？

Z：凍冰冰, 梗係豬骨湯啦, 又平, 你要咩？
講完就揮手叫過姐姐過嚟.

我其實唔太肚餓, 只不過諗住落嚟陪下Z, 所以無拎起個餐牌, 就話：一樣丫咁.

Z聽完就同個姐姐落單：Ok...唔該我哋要兩個豬骨湯,同埋前菜我想要多啲泡菜.

聽見Z咁落單, 我就好奇問佢：乜你好鍾意食泡菜㗎咩？我以前都唔知嘅？

Z尷尷尬尬咁講：唔係呀..

可能自己做咗咁多年餐館, 下意識有啲驚浪費嘢食, 就話：反正呢到前菜又唔使錢嘅,食完唔夠再攞囉, 而且我都唔好泡菜呢家嘢, 你食埋我嗰份啦！

Z我打咗個眼色叫我收聲,之後就同姐姐講：係咁多, 唔該.

到個姐姐走咗, 我就開始斟水同順便同Z講：搞咩呀你...

明明成間鋪勁多人、嘈到仆街,但係Z都要特登細細聲,鬼鬼鼠鼠咁同我講：唔好問啦......一陣你咪知囉...

見到Z個死樣, 我有預感一陣間一定會奶嘢...

只希望唔好太柒就好...

到上菜開始食咗冇耐, 我就feel到枱底有啲硬硬哋嘅野, 不斷係到亨我隻腳.

我抬高頭一望, 見到Z半個人趴咗喺張枱度, 塊面紅曬, 就忍唔住問佢：搞乜呀你又...格劍咩..

Z：唔好..問住, 接咗先啦, 我唔夠手長呀..

見係咁我唯有話：唉...係係...你又畀啲咩我嘆呀...
講完就伸隻手落去"接應佢", 一揸上手就發現係一個盒狀物體.

當我以為Z會喺枱底塞啲咩危險物品畀我嗰陣, 到拎上手一望即刻o咗嘴：吓！？保鮮盒咋！？屌！你使唔使咁撚鬼鼠呀！？

Z用筷子指一指檯面個兜泡菜：幫幫我啦...

我望住檯底手上面嗰個保鮮盒, 再望吓檯面個兜泡菜....

Z好緊張咁四圍望, 壓到把聲好低咁講：快啲啦！..我幫你睇水..

我：好柒喎老細...

Z：柒得過我食埋呢餐, 嚟緊成個月食白飯？而且就算真係柒, 姐姐因陣間同你齊齊柒.

喺我仲未明Z咩意思嘅時候,我已經見到佢係佢件褸入面抆多個盒出嚟.

我：吓！？我屌？？你使唔使咁搏命呀..

Z：快啦快啦,你攞完我要再嗌多碟...

我：Err.... 唉....
聽見佢咁慘,無奈之下我唯有鬼鬼鼠鼠, 幫佢將兜泡菜撥落個保鮮盒到.

心諗, 比起頭先Z大大聲讀我寫嗰篇文, 而家玩N咁多人嘅目前, 先羞恥play係精髓..

Z完全冇理過我感受, 一見我成功收返埋個盒入我自己件褸到之後,就即刻舉手叫姐姐：唔該？
之後指一指幾秒前, 仲有一大嚿泡菜嘅空碟...

雖然Z話自己窮到食白飯, 但既然佢講得係AA, 佢就肯定會畀錢, 所以到食完碗豬骨湯, 準備起身係畀錢嗰陣, Z自動自覺拎咗現金出嚟俾我.

因為雖然Z好少用到, 但我知佢仲記得每個月佢有一餐飯, 係我應承咗負責埋單, 如果佢係想屈我請食飯, 佢會直接講、根本唔會兜咁大個圈.

用件褸夾住盒泡菜係cashier畀錢嗰陣, 梗係覺得成間餐廳啲留學生都指撚住我嚟笑...

只能夠希望冇人認得出係我...

嗚嗚嗚...

畀完錢一行出餐廳, 我同Z都凍到即刻黐埋一齊, 但又唔可以著返件褸, 因為盒泡菜包咗喺入面..

唯有急急腳衝過對面馬路,肯定冇人見到先拎返盒泡菜出嚟著番件褸..

Z一著返件褸即刻包到自己實一實：凍到呢..

我著返件褸之後點著支煙, 順便將我件褸包住個盒泡菜抵返畀佢：係囉係囉, 多謝邊撚個呢..

Z接咗盒泡菜之後即刻哼鳩我：Hmm哼哼！

我：係係....
我吸咗一啖之後就遞過去畀Z.

Z吸咗啖、呼返出嚟之後講：真係冬天先會食咁多煙..夏天熱到食都唔想食..

我：吓, 你呢排食好多咩？

Z啤咗我一眼：見得你多囉.

我：丫屌..
諗咗諗, 好似自從上次生日撞返到而家, 我同Z真係每個禮拜最少都見一次咁..

Z突然間又用屎忽撞咗我一下, 笑住咁話：係咪呢, 你都覺呢..

我：吓？你又知我諗咩？

Z笑住講：因為我都諗緊囉！

我：啤...

Z：行啦...凍冰冰返屋企啦..

明明我哋係行緊去Z住嗰棟apartment, 但唔知點解呢一刻, 我順口問咗句：返我到定你到？

Z諗咗咗幾秒之後答我：諗諗下你嗰到有三隻貓..好似暖過我嗰到...

我：ok呀, 咁上去擺低啲泡菜之後, 返過我到囉.

Z：都好喎..但你聽日唔使返工咩？

我：聽朝返工前車你返嚟咪得囉.

Z：不如我返去執埋啲嘢,你聽朝直接車我返學？

我：都得.

Z：Okok...咁你去warm車先啦, 我好快返嚟.

我：係係...

上返車撻匙大約五六分鐘之後, 就見到Z孭住佢個大袋行緊過嚟, 當我伸隻手過去幫佢開車門嗰陣就諗, 我同Z一齊嘅時間真係仲多過自己條女D..

淨係記得間韓國菜之前仲送咗個海鮮炒蛋俾樓主

唔係呢間

嗰間係finch station 附近.

呢一間係on young st

你啲女永遠都唔會懷疑Z既存在

除咗散餐嗰啲wfc之外, 每一個正餐我都講到明有Z呢個人存在

K其實點睇佢

冇問, 佢性伴侶嘅前度？

其實D點解唔發現你咁多女
定廢時理

plz call me時間管理大師

仲要有人幫你cover

得肥J幫我 cover K, 之後冇啦

我覺得以前手機只係可以打電話個陣係容易d

新年快樂呀Chris巴
我是來追收我封利是(文)的

D真係好好人
仲未計樓主同D拍過兩次拖

都係，消失左搵唔到人都大條道理

夠鐘上水啦Chris

琴日of Australia day成班出咗去玩之後去咗燒嘢食.

剛剛先起身,喉嚨痛到仆街、仲開始有啲鼻塞

又中？

又中