原來第3話重複po咗兩次同一段，導致加更上半部失蹤咗
即刻補返加更上半段畀大家
為方便大家睇，會成篇加更一次過重po
__________________________
什麼？
芊柔又從某處端來新的雪糕筒：「你喺今朝，借用咗今日11:39至11:44喺272A巴士站附近嘅『未來記憶』。你搭巴士期間，12號帶你體驗咗自己原定會經歷嘅記憶。」
「妳講乜……我邊度有借咩記憶呀……咦？」我恍然大悟，「我發咗個夢，睇到未來嗰個雪櫃跌落嚟嘅片段，砸斷咗我隻左腳。」
「嗰個唔係夢，而係你睡夢期間，12號使用司憶者權限，帶咗你入『憶界』。」
「乜界話……」
芊柔咬著雪糕筒邊：「咳咳……係一個存放人類唔同時空嘅記憶嘅空間。你不妨想象成一個另一維度嘅異世界。『憶界』入面物理狀態同現實世界相符，只係一切事物嘅色調類近人類理解嘅藍色。」
我想起了，由各種藍色組成的夢境。
「即係我喺巴士訓覺期間，入咗嗰個咩『憶界』，睇到自己俾雪櫃砸斷隻左腳嘅『未來記憶』……但係點解我喺現實中，冇俾雪櫃砸中？」
芊柔娓娓道來：「因為你體驗嘅係『未來記憶』，而『未來記憶』係無法計算『人類進行記憶借貸』嘅因素，原定未來嘅你根本冇進行過『記憶借貸』，自然唔知道會俾雪櫃砸中。」
「所以我體驗咗『未來記憶』之後，改變咗未來？」
芊柔把雪糕筒從口拔出，一臉訝異：「原來閣下有腦。」
到底哪裏得罪妳了？
12號把玩著鑰匙：「改變未來——嗝——就係『記憶借貸』最大嘅價值。預知原版嘅未來，從而改編出另一個自己更想要嘅。」
若他們所言屬實，這間公司正在提供非常不得了的服務，簡直超乎人類想象！
我盯著12號：「你今日之所以跟住我，就係要提供『記憶借貸』服務畀我？你哋有咩能力做到？」
芊柔豎起右手食指：「司憶者係進入『憶界』嘅鎖匙。12號係『高層司憶者』，只需要以右手食指觸碰客戶胸口心臟位置，就能夠帶客戶去『憶界』，體驗借取嘅『未來記憶』。」
我瞄了眼12號的右拳，巴士的濃妝OL說男孩曾用拳頭觸碰我胸口，難道是因為他沒有食指的關係？
我問12號：「咁你喺我上堂期間出現做乜？」
「觀察你付出『利息』嘅情況。」芊柔代12號回答，「根據【借還】規條，公司會收回與客戶高度相關嘅特定『過去記憶』。」
「吓，我付出咗咩利息？」
「公司將上星期一10月4日，8:30至9:00喺李煘徐樓Lecture Hall 1課堂嘅『過去記憶』，從人類世界『收回』咗。」芊柔不假思索，「『收回』嘅意思，即係從人類世界攞走嗰段記憶。」
「但係，我宜家仲記得嗰時嘅嘢喎。佛地摩推跌咗道門，哈士奇試圖說服我同Wiki比賽踩單車，輸咗罰食嗰個亞洲汁飯……」
「因為根據【觀察】規條，『公司』收回利息之後，全世界唯獨客戶可以保留嗰段記憶7日，呢段時間我哋稱之為『觀察期』。」
「即係呢一刻，全世界得返我一個記得嗰半個鐘，班房內發生嘅事？」
「冇錯。7日後，你嘅呢段記憶都會被『公司』收回，交易就會完成。」
「呢段記憶會喪失幾耐？」
12號打了個呵欠，回答斬釘截鐵。
「永遠。」
「唔……都有例外情況嘅。」芊柔道，「根據公司紀錄，記憶狀態反常嘅人類，例如記憶錯亂、失憶痴呆者，被收回記憶後可能會出現『記憶殘留』嘅現象，佢哋仲會短暫記得原版嘅記憶，但記憶會出現碎片化。」
「……記憶殘留……」
「同埋，被收回記憶嘅只限人類，其他動物仲會保留到原版記憶。」
由於他倆的解說非常清晰，我很快就明白所謂『記憶借貸』的運作模式了，同時亦壓抑不住鬱悶。
「你哋憑咩擅自奪走我嘅記憶？」
12號的回答出乎意料。
「交易得到你嘅批准——嗝——當時你回答話『好』。」12號以拳頭揉眼。
當時，12號真的問了我一兩句話，我以為他是賣旗的小學生，想也沒想就回答了「好」，想不到竟是這樣一回事……我太大意了！
「你咪當交『智商稅』囉。都話隻狗醒目過你。1305倍。」芊柔對我扮鬼臉，早知讓她墮地好了！
不過，一切謎團總算迎刃而解。儘管他們的說法荒誕，卻合理解釋了當下的謎團。等等，倘若是這樣的話……
我目瞪口呆：「所以，程雨奈佢……」
芊柔笑道：「程雨奈，喺原定未來會死呀。」
「……冇可能㗎，佢今日上堂仲好哋哋……佢係幾時……死？」
「2021年12月31日，23:59，即係除夕前一刻。距離今日尚餘51日。」12號的回答乾脆俐落。
「……死因係？」
「你冇權知。」
這怎可能發生？
芊柔盯著我：「你只要使用『記憶借貸』，借取程雨奈死亡之前喺案發現場嘅『未來記憶』，你就有更大機率搵出佢嘅死因，從而改變未來——」
「拯救程雨奈，阻止佢死。」我陷入苦思，「但如果我接受交易，需要付出乜嘢代價？」
芊柔認真起來：「咳咳……根據【價值】規條，你要付出嘅『過去記憶』價值唔能夠低於借取嘅『未來記憶』。『公司』會為閣下嘅『過去記憶』進行估值，計算出你要付出邊一段作為利息。」
「連記憶都有價值之分？咁點判斷？」
「計算方法複雜，你即管粗略理解為，客戶對於嗰段記憶嘅重視程度。」
「咁今次，我要付出邊一段『過去記憶』作為利息？」
芊柔回答後，我內心一直往下沉。
我要付出的利息，是與那個女孩相關的記憶。
我沉默半分鐘，然後搖頭。
「我拒絕交易。」
芊柔皺一皺眉，12號停止把玩鑰匙圈。
我站起身，手拿筆記本步向大門。
「點解唔願意付出呢段利息？」身後傳來芊柔的質問。
我停下腳步：「我唔可以忘記嗰個女仔。」
「就算要睇住程雨奈死，你都無動於衷？」
「嗰個女仔係我最重要嘅人。」
「哈，人類真係搞笑。」芊柔冷笑道，「公司資料顯示，嗰條女已經同你斷絕來往，你仲保留段記憶做乜？」
我捏緊拳頭，因為她說的多少是事實。
芊柔的語氣輕佻：「既然呢段記憶只會令你痛苦，你接受交易嘅話唔單只救到程雨奈，仲可以消除埋你嘅痛苦，咁樣唔係一舉兩得？」
我拉開店門，店外的光線刺眼。
「人類，已逝去嘅，真係重要得過眼前？」
12號漠不關己的語氣，使我無名火起，轉身瞪著他。
「正太，你憑咩咁講？你經歷過啲乜？」
12號挪來新一杯橙樂，死氣沉沉的雙眸泛起異采。
「人類——嗝——有趣。
我哋好快再會。
你一定會後悔，當下所作嘅決定。」
他啜喝一口橙樂，笑得十分燦爛。
[/quote]
超多文！
