神級Omakase店「Mamoru」被屌服務差到無人有！「Fine Dine級數竟然晚市做兩轉枱？」

《非一般的「神店」體驗，非一般的Mamoru》

長文慎入，不適宜Mamoru死忠愛好者，小心閱讀。

以下事情完全真實，沒有半點抹黑或誇張，若有任何失實描述，本人願意終身只吃鮨見。

一切要由大約半年前講起… Mamoru作為「神店」，而且價錢昂貴，再加上預約困難，本人一向興趣都唔算好大，但某日喺群組中有谷友問我有冇食過Mamoru，我就走去問吓老虎有冇興趣試吓，老虎竟然話有，而且老虎知道我嗰排忙，老虎仲話佢負責安排。

當時12月左右，一訂已經係三月嘅事，但撞着疫情一改再改，終於改咗去五月中。

當日我哋預約咗晚餐第二輪8:00pm，老實講作為一間收2980+10%嘅餐廳，晚市竟然得兩個鐘我實在唔太鍾意，不過或者真係好好食，我響唔鍾意之中都唯有妥協。

由於餐廳位置本身已經比較格攝，我哋都搵咗陣，最後都係7:55pm準時到達。有去過嘅朋友都會知道佢愛群道嘅入口有一道門，推開之後有一個非常細小嘅等候空間，大約係3尺×7尺左右，道門一入去正面有一張非常狹窄可以坐到兩個人嘅長櫈，櫈既右手邊有道趟門入餐廳，入餐廳道門正對面有另一道趟門就係廁所。成個故事就係呢個3尺×7尺嘅空間發生。

滿有期待嘅我哋7:55pm準時到達，一去到已經有一對男女坐咗係張長凳度等候，我哋冇位坐唯有企正喺個廁所門口度等，等咗一陣樓面女仔走出嚟好有禮貌咁同我哋講：「唔好意思，今日啲貨返遲咗少少，所以上一輪未食完，麻煩你哋等一等」咁我同老虎都冇乜所謂，飛機貨遲佢哋都唔想，咁我哋就安安靜靜咁喺個廁所門口度等。

等到8:10左右，有其中一對食客離開，原先坐喺長凳嗰對情侶就被安排入座，咁我同老虎就坐低喺長凳度，廢事阻住個廁所，諗住好快到我哋入座

等到8:20，有個類似經理既男人（好似叫Elvis Lo）出咗黎，同我哋講：「上一輪啲食客都仲未食完，麻煩我哋等多陣，為表歉意，會送返一支香檳俾我哋」其實我當日有揸車，不過我覺得佢都係一番誠意，都循例講咗聲多謝

我哋繼續坐喺張長凳度呆呆咁等，開始有啲肚餓，呢段期間有幾個客出出入入去下廁所但係都未走，樓面亦見唔到有明顯想催促佢哋埋單嘅狀態，等到8:30，老虎開始忍唔住話要問下經理仲要等幾耐，我同老虎講：「等多陣啦，唔通推開道門叫經理出嚟咩，等佢哋出嚟嘅時候問佢哋啦」

8:35一開始嗰個女仔樓面再次推開道門，唔係送客啊，都係推開道門送個客去對面廁所

老虎忍唔住同個女仔講：「你哋頭先好似有個經理出過嚟，我想搵一搵佢」個女仔叫我哋等等。轉頭開返道門，個女仔話：「經理而家喺裏面俾個客捉住咗，要轉頭先出嚟」

我同老虎已經開始有d㷫，大佬，你啲乜嘢服務水平呀？我哋食你一餐$3300/人既飯，你遲咗35分鐘，理論上我哋仲要10點還枱，我搵得你就擺明係唔滿意，你仲叫我等？老虎開始黑晒口面。

8:40，Lo經理終於走番出嚟

老虎都盡量抑壓住情緒同佢講：「我想問我哋仲要等幾耐？我哋已經等咗40分鐘… 你哋頭先幾點知道飛機貨會遲？知道嘅時候點解唔打俾我哋通知我哋今日會遲d？等我哋唔使趕頭趕命走過嚟，其實我哋係擺低咗啲嘢專登準時過嚟，若果你早少少話到俾我知你哋會遲的話，我哋唔使趕頭趕命」

Lo經理非常不可一世咁答：「其實啲貨遲我哋都控制唔到喎🤷🏻‍♂️，而且食omakase就係師父控制啲食物上既節奏，我哋都控制唔到食到幾時」

我一聽完，火都嚟，我話：「你啲貨遲，你咪打個電話俾我哋唔好咁早過嚟囉，你好多個客咩？打個電話好難咩？仲有，咩叫控制唔到食到幾時？你哋一晚做兩節，每節兩個鐘，你由上菜開始就要控制兩個鐘食完，你同我講話唔知食到幾時？」

當時已經8:45，老虎問佢：「其實而家都已經近9點，你諗住點安排？我哋坐低咁耐水都冇一杯」

經理回答：「唔好意思，所以我哋頭先話送返一支香檳俾你」

我呢個時候講：「其實我揸咗車，唔飲得酒」

經理好似施捨咁話：「咁我俾你拎走啦」佢再話：「若果你哋想安排退款的話，我哋可以安排，同埋如果你哋肚餓的話後面有間拉麵店」

我完全冇諗過佢會咁樣去回應一個投訴，我即刻扯火話：「WTH? You are so rude(當我地乜嘢？）！你哋作為一間收緊三千幾蚊一個人頭嘅高級日本料理，要個客等45分鐘（等到近九點都未開得飯）你最後係同個客講我哋可以取消同埋去食拉麵？我食過咁多間omakase、未試過一次咁差嘅體驗（仲要係所謂「神店」，我心裏面DKLM)」

老虎忍唔住再講：「我哋而家好唔滿意你哋嘅安排，如果你唔話得事嘅，叫過話得事嘅出嚟同我哋講」8:45終於有另一對客人離開，亦即係若果安排入座，我哋呢刻先可以正式入得。

Lo經理叫我哋等等，然後走返入餐廳，轉頭出返嚟就話：「都知道你哋好唔開心，若果你哋入去食，而家都可以安排到座位，但真係取消嘅話，公司請返（free)你哋一次嚟食飯。不過而家暫時冇期🤡」

我問咁安排到幾時，你俾返個期我先可以考慮，佢好串咁答：「今年去到12月底都全部full晒，你一定要我俾個期你的話2023年啦，我哋未開booking」

我即刻同佢講：「得，你同我取消咗今晚個booking佢，呢刻就算你安排我入座我都食唔落（一肚氣，唔想委屈自己）你出電郵俾個確實日子我2023年邊一日，早到嘅你話俾我知！」

正當我哋準備走嘅時候，經理問：「使唔使日本師傅出嚟？」

我同老虎都話：「唔使，我話都未必關日本師傅事，喺你哋樓面嘅態度同安排嘅問題」

點知個經理話：「我驚日本師傅唔開心喎，少咗兩個人」(exact wordings🤯）

我屌🤬🤬🤬，我即刻發火問：「係咪要我向佢道歉？」

佢就嘗試去兜話：「唔係，我意思係若果你哋走咗日本人冇機會道歉的話佢會唔開心」（我真係信你都戇鳩）我話唔使，頭也不回咁離開。

或者會有花生友會話：對方都話free一餐俾你啦，仲想點？Sorry，由頭到尾我唔係黎R野，亦都唔使你free乜嘢俾我，我係黎俾錢食一餐訂咗五個月既$3000人頭fine dining級數嘅飯，從來出街食飯我唔會攞人着數，調返轉貼士就次次都有俾，我要嘅係配得起你哋餐廳收費嘅態度、尊重同埋誠意。自問，我同老虎都屬於好脾氣嘅人，就算你哋遲咗，只要你早少少打個電話嚟話聲我哋知，我哋都冇所謂；甚至乎我哋嚟到，你比到個合理嘅時間我，有誠意啲咁安排，包括送上兩杯熱茶，搵個人定期安撫下我哋，唔好一副「我係咁滿嫁啦，你唔滿意就取消嘅態度」我哋都冇咁嬲！樓面經理絕對火上加油嘅高手，由頭到尾一啲歉意都感受唔到，咩叫做omakase就係師父控制上菜節奏，我哋都冇辦法？？明明就係你哋自己要做兩輪，搞到每輪得兩個鐘，然後你話控制唔到師傅嘅上菜時間要個客等咗45分鐘，仲要覺得自己冇錯！？咩叫做我哋可以幫你先取消，但係暫時唔知安排到幾時？其實，就算你間餐廳係好full，面對呢啲自己做錯嘅情況，你死都死兩個位出嚟，我打死都唔信去到12月底兩個位都冇，你哋冇留位俾熟客嘅，唔該講小陣大話啦！

我唔理你師傅手勢有幾好，食材有幾矜貴，你收得咁嘅價錢（其實茶餐廳都唔會）提供咁樣嘅服務體驗。有睇開我食評嘅朋友都知無論幾伏嘅店，我都係一笑置之，唯獨呢間「神店」，我永世都唔會再幫襯，呢種倚仗自己有d名氣不可一世，好似需要你去乞求佢去食飯嘅餐廳，大家鍾意的話，繼續幫襯，我祝佢生意興隆，老闆請多幾個呢啲夥記。

後記：9:10我同老虎行返出電車路附近既某間茶餐廳，一入門口，老細已經熱情招待，又介紹宵夜套餐又有二人套餐叫我哋慢慢睇，（其實只可以食到10點），上飯嘅時候，仲好細心咁男士裝大碗啲，女士細碗少少，埋單嘅時候仲有九折，兩個人夾埋食咗$170幾蚊（人均$90唔使），走嗰陣時老闆娘仲多謝前多謝後。我同老虎話：「百零蚊晚市嘅生意都咁好服務態度，反觀所謂「神店」，三千幾蚊一位好似要去乞食咁。希望香港人唔好俾人睇死，攞啲骨氣出嚟，令呢啲既所謂「神店」唔好覺得自己不可一世，香港仲有好多有heart嘅餐廳等緊我哋去支持！」

book左枱仲要等已經on9啦
不過呢d都係佢有佢屌
其他人繼續食

做兩輪不了！已經唔係享受，趕頭趕命隊晒落口就要走。

俾錢買難受

高級餐廳Book好晒差咁遠時間真係有d離譜
想安排好d好想兩段時間格遠少少
有意外都易攪d 依家咁得罪客人都好正常
不過佢咁full都要等多d人屌佢先有用
個個排住去食咁

開兩輪已經食得屎啦，食放題呀而家

食貴價餐廳除左野食，服務同環境都好重要，食到一肚氣真係唔可以接受

放寬到12點可能開埋宵夜都仲得

臨尾搵茶記比咪又係多餘

係滿足食人情味嘅邊會嘥錢食Omakase
試下搵間舖茶記收$3000一位但係服務頂級 唔通佢又會食咩

好合理，等45分鐘仲咁串真係唔駛再比機會佢

3000蚊人頭都咁撚差services

留名睇經理version

是但啦,Omakase就係比間店老點嫁啦
師傅要你食屎都要食嫁啦

TLDR

得罪講句 弱智先會比幾千食哦媽卡些

得罪講句你真係弱智

哦，原來你就係果啲弱智

大把閑錢既話
洗幾千蚊食餐飯諗左諗右托柒咩
唔通下下上連登問吓邊度CP最高

戇鳩先係香港食
香港人咁撚閪 貼錢買難受

做兩輪我一定係食頭輪

應該仲有其他人係第二輪？

仲等成個鐘已經on9

除非真實版本係故事主人遲大到，唔係等左40分鐘都無得食，好難兜

樓主都幾好脾氣

食Prestigious

連登仔fg50k

應該booking搞錯左俾人打尖
3000蚊咁既服務一定接受唔到