266 Like
9 Dislike
Bottas(已硬)
2021-12-24 17:32:07
平安夜快樂!To冇街出嘅大家
馬連奴六世本馬
2021-12-24 18:43:35
喂而家即係點
表白!扑野!
Bottas(已硬)
2021-12-24 23:21:16
寫緊呢個故嘅最後一章,希望12點前出到
一條小抹香鯨
2021-12-24 23:52:26
Lm
Bottas(已硬)
2021-12-25 00:05:45
4.
冇人出聲,巴士引擎運作嘅「轟隆轟隆」聲喺呢個時候變得異常響亮。我最怕就係咁尷尬嘅沉默,連呼吸都要好小心,唔可以太重。
但始終要有人打破沉默,如果唔係我哋就真係會咁樣坐到總站。
「你喺邊度落?」我都未諗到要講乜,對方就開口。
我第一次聽到佢把聲,竟然同我想像嘅一樣,低沉溫柔但又保留住幾分爽朗。
我擰轉頭望佢,唔小心撞上佢嘅眼神。佢好專注咁望緊我,清澈嘅眼晴帶着些少笑意。
我覺得自己hang咗機。
你唔好再咁望住我喇,我真係會撲上嚟㗎!
但為咗保全自己嘅顏面,我強忍住內心嘅獸慾,艱難咁開口:
「吓?」
然後我就知道我呢一刻個樣一定蠢到仆街,因為佢開始喺度笑。
頂,我其實知道佢問乜,但望住佢對眼,我真係緊張到唔識講嘢。
「我問你喺邊個站落車呀,我已經陪你坐過咗好多個站喇。」佢又笑。可唔可以咪再勾引我……
等等先,咩叫「陪你坐過咗好多個站」???
我唔係有心表現得咁蠢,但我而家個腦入面好似打晒kick咁,令我完全理解唔到佢講嘅嘢,唯有呆滯咁望住佢。
「你總站落?」佢換咗個問法。我搖頭。
「咁你住邊?」佢又問。
「XX站……」我哋架巴士已經過咗呢個站好耐,所以我講出嚟都有啲唔好意思。
果然佢聽完之後就一臉意味深長咁望住我。
好羞恥呀。
呢個時候,下個站到咗。
「行啦。」佢冇再多講,直接拉住我落車。
夜晚嘅溫度低過日頭好多,我一落車就感受到一陣涼意。但意識到隔離呢個人嘅身份,一股熱氣又悄悄染上臉頰。
我哋兩個並肩而行,真係希望呢段時間過得慢啲。
「你本身諗住等我落咗車先落?」一邊行,佢又延續頭先嘅話題,仲問得好直接。我點頭,事到如今,否認都冇意思。
「你真係好痴漢,」佢嘅反應竟然係笑。「但你真係好冇膽。」
我好疑惑咁望住佢,唔明佢咩意思。
「其實我本身係揸車返工同放工。只係前排架車拎咗去整,我先搭巴士。」佢開始解釋。「不過嗰日聽到你個錄音之後覺得你又幾搞笑幾可愛,所以之後就算整返好架車我都keep住搭巴士,諗住某一日你會嚟問我攞contact。」佢望咗我一眼,好似嘲笑緊我嘅有賊心冇賊膽。
雖然佢笑緊我,但我個心臟都係噗噗噗噗咁跳得超快,唔通我唔係單戀?!
早知係咁我就應該一早撲上去!
「今日放工撞到你係意料之外嘅,我唔落車都係諗住等你,點知你都係咁冇用。」佢睄咗我一眼,「等你主動都係靠唔住㗎喇。」佢語氣帶點嫌棄,但我又從中聞到一點甜蜜嘅味道。
「我唔知吖嘛……」哎呀好怕醜><
我成個人都沉浸喺好似中獎嘅興奮當中。本身以為自己只可以繼續喺遠處偷望,點知佢一直等緊我行前。
未等我開心完,佢又開口。
「互相偷望嘅遊戲大家都玩夠喇,我覺得我哋係時候正式認識一下。」佢語氣突然變得嚴肅,但我有少少想笑。
好可愛呀。
然後佢停下腳步,我又跟著佢停,好彩條街冇乜人。
「我叫陳愷豐,你叫咩名?」佢認真咁凝視住我,等待我嘅回應。
原來佢唔係馮唔係鋒唔係風,係豐。
「我叫孫泳如!」我笑住直視佢。
Bottas(已硬)
2021-12-25 00:06:01
完
Bottas(已硬)
2021-12-25 00:12:12
25號喇,聖誕節快樂
Bottas(已硬)
2021-12-25 00:23:13
臨瞓一推
Chicharito_14
2021-12-25 00:39:26
好睇,樓主聖誕快樂
Bottas(已硬)
2021-12-25 00:39:57
聖誕快樂
微風吹過是答話
2021-12-25 01:55:22
祝樓豬都咁sweet
Bottas(已硬)
2021-12-25 02:02:09
中學男班長
2021-12-25 02:07:05
上得gay登多 以為兩個都係男人
Btw好似由頭到尾都冇話過另一個係女
Bottas(已硬)
2021-12-25 02:13:16
屌 女人嚟
我要食甜蝦!
2021-12-25 02:33:01
完得好突然
但又好sweet
Bottas(已硬)
2021-12-26 20:46:58
《呢排成日發春夢,每次都夢見同一個男人》
1.
深夜,我緩緩由沉睡中醒過嚟。眼前嘅漆黑被打破,映入眼簾嘅係身上嘅男人。
陌生嘅酒店房間內,暖黃嘅燈光被調較得昏暗,但又未至於完全睇唔到嘢。男人嘅輪廓模糊,唯一清晰嘅係佢染上慾望嘅雙眼。
我從佢眸中見到自己嘅倒影。佢嘅視線鎖定住我,我無處可逃。
我唔知佢係邊個,但身下一陣陣快感傳嚟,令我無法思考,只可以反手捉緊身下嘅床單,仰頭喘息。
陌生男人俯下身,輕輕吮咬住我嘅頸側。
我倒抽一口氣,喺自己張床上驚醒。
環顧四周,深夜嘅房間好寧靜,整個空間都被蒙上一層晦暗嘅色彩。我只聽到自己嘅喘氣聲,後背、額角亦有薄汗。
除此之外,房間內一切如常。
我嘆一口氣,又迷迷糊糊咁瞓着返。
第二日,我將前一晚嘅夢同我best friend講。呢啲事我只敢同佢分享。
「都叫你快啲搵男朋友㗎啦,就係因為你A0太飢渴先會成日發埋啲咁嘅夢。」因為我呢排已經發過唔止一次春夢,所以佢覺得係我日有所思夜有所夢。
我都諗唔到自己會渴望男人渴望到成日發夢。
「其實你都係時候識吓人喇,聖誕節join我哋啦!唔好又匿喺屋企做毒撚。」我best friend呢個時候又再開口,睇嚟佢真係好驚我慾求不滿冇地方發洩。明明我之前已經推咗佢一次,而家佢又慫恿我join佢。
其實我唔join係有原因,因為佢聖誕節約嘅係一班我唔識嘅人,聽講係friend搭friend再搭friend咁約出嚟。但由於我真係唔太擅於同陌生人打交道,所以佢第一次叫我join嘅時候我就拒絕咗。
但而家聽完佢講,我真係開始懷疑自己係咪太毒太過飢渴,所以呢排先發埋咁多春夢。
可能真係臨近聖誕,個人特別空虛寂寞掛。
「好啦。」我最後都係屈服。
識多啲人都冇壞嘅。我唯有咁樣同自己講。
「Good!!! Ada佢哋仲話搵咗啲靚仔過嚟呀!到時你慢慢揀吓有邊個啱心水啦!」我哋究竟係出去玩定係叫鴨……
我best friend下一秒就加咗我入一個group。我望一望個group名:Christmas鴨仔團
應該就係聖誕節一齊玩嗰班人喇。我㩒入去group info,原來計埋我已經有11個人喺度。
「新加嗰個係我個女仔friend嚟~」我best friend喺group 打咗句。
「hello我係Emma」既然佢提到我,我唯有自我介紹下。大家都幾熱情覆返我,應該都social開。
然後我私底下又再搵我best friend:「點解咁多人嘅?!」
我以為到時只會有幾個人喺度,冇諗過有咁多人,早知就唔應承啦。
「係呀,個個都會搵一兩個friend join」佢答,隔幾秒又加咗句:「唔緊要啦人多熱鬧啲吖嘛🤩」
「你鍾意多仔咋掛。」我冇佢咁好氣。
當晚,我又發咗個夢。
今次嘅場景唔再係酒店,而係一間屬於某個人嘅房。我瞓咗喺張床度,身上依然壓住一個男人。我感覺佢同我之前夢見嘅係同一個人嚟。
夢入面嘅男人好熱烈咁錫落嚟,我亦下意識咁回應佢。
錫錫吓佢將頭埋喺我頸邊,聲音模糊不清:「不如我哋一齊啦好唔好。」我個心一跳,竟然有啲心動,下意識想開口答佢「好」。
但我控制唔到自己開口,夢中嘅我只係唔在乎咁笑咗笑,然後攬住佢嚟錫,堵住佢所有話語。
對視嘅時候,我見到個男人嘅眼神明顯帶住濃濃嘅失望,隨後佢就用力合埋眼,好似發洩咁狠狠啃咬我嘅嘴唇。
到佢再擘大眼,眼中就充滿慾望,好似想將我成個人吞落肚咁。
我眼前一黑。
再有意識時,我仍然喺夢入面。我自己一個瞓喺床,男人已經從我身上離開,企咗喺床邊。
「你沖完涼就走啦。我之後應該都唔係咁得閒,你有需要嘅話可能要搵過第二個。」佢語氣淡漠。我望住佢,但佢低垂住眼,我睇唔透佢嘅情緒。
然後我又一次驚醒。
今次,我成晚望住塊天花板,過咗好耐都瞓唔返。
Bottas(已硬)
2021-12-26 20:58:32
推
蒜頭蒜尾
2021-12-26 21:21:29
Pish
Bottas(已硬)
2021-12-26 23:58:01
臨瞓再推
主撚救主撚鳩
2021-12-29 01:33:57
嘩哈哈
2021-12-29 13:23:38
Push
Bottas(已硬)
2021-12-31 01:40:04
2.
其實真係好奇怪,明明個男人望落會係我鐘意嗰type,點解夢入面嘅我會捨得拒絕佢呢?一醒返,我就為自己夢中嘅行為感到懊惱。
之後嘅日子,我冇再夢見佢。
好快,我終於迎來聖誕節呢一日。
其實活動冇乜新意,只係落bar,但我好耐都冇同咁多人約出去玩,所以都有期待嘅,前一日已經諗定要着乜。
去到間bar,我發現約出嚟呢堆人嘅樣都唔差。可能今晚真係食…識到個ok嘅都未定。
齊人之後,有人提議打亂嚟坐,唔好痴住自己熟嘅friend,所以我同其中一個男仔坐埋一齊,同我個best friend分開。
大家一齊玩咗陣酒game之後,有啲人話要去廁所,於是淨低嘅人開始蠢蠢欲動,會撩吓隔離啲人吹水。
隔離個男仔都開始撩我講嘢,我見齋坐又冇乜嘢做,就回應下佢。不過同佢傾咗幾句都冇乜feel,我已經諗住擰轉面join其他人。
但佢繼續講。
「...係呢咁你一陣完咗有冇嘢做?我哋兩個去食宵夜?」
我即刻話老豆老母要我早返屋企(其實我自己住)。
點知佢仲繼續chur。
「咪玩啦咁大個仲要理屋企人?難得聖誕節,梗係玩夜啲啦。」我唔知點答,淨係尷尬笑。
好彩去廁所啲人陸陸續續返咗嚟,大家又起哄話要繼續玩,佢就冇繼續話題。
我趁機signal我best friend:點算隔離條仔係咁chur我一陣同佢食宵夜⋯⋯
但呢個時候我不遠處嘅best friend同佢隔離嘅男仔傾得火熱,完全冇睇電話。
我唯有收返埋電話。
其實我真係好唔擅長玩酒game,之後玩咗幾round我已經幾杯酒落肚。玩到後來大家都知我玩得廢,仲開始針對我。
玩得越渣越飲得多,飲得越多玩得越渣。我已經開始頂唔順。
然後又到咗佢哋去廁所嘅時候。個男仔又擰過嚟同我講嘢,今次隻手仲開始搭我膊頭。
但我已經唔想再應付佢,咁啱飲得太多酒有啲急尿,就借尿偱。
我望一望我best friend,佢都算清醒,而且在場都有佢識嘅人。於是我帶埋我個袋出去。
還掂我哋嗰檯喺最入面,佢哋都唔會留意我去咗邊。
我唔想再浪費時間喺度喇。
去完個廁所,我開始有少少頭暈。我一邊搖搖晃晃咁行出廁所,一邊低頭打字同我best friend講我要走。
跟著就唔小心撞到由隔離男廁行出嚟嘅人。
我未反應得切,對方已經講咗句「Sorry」。佢把聲好熟,於是我抬頭望佢,但佢身後天花板有盞燈,燈光刺痛我對眼,我唯有瞇住眼望佢,但我望唔清佢個樣。
可能因為我望得太唔含蓄,佢好似呆咗呆。
雖然望唔到對方個樣,但望住佢,我有一股越嚟越強嘅熟悉感。
我就咁樣一直望住面前呢個男人,喺度諗佢係邊個,唔知點解佢又唔避開。
皺住眉頭諗咗陣,我終於知道佢係邊個。
佢就係夢入面個男人。
即係……
我而家發緊夢!
得到呢個結論,我開始興奮,因為我已經好耐冇「見」過佢。
我望一望周圍,雖然間bar好多人,但一諗到呢個只係夢,我就決定直接無視呢啲人,隨心所欲。
於是我用力攬住佢條頸,令佢不得不彎腰。
然後錫咗上去。
Bottas(已硬)
2021-12-31 01:55:22
推
不得鳥了怎樣了
2021-12-31 01:57:15
推
迷你老味
2021-12-31 03:27:30
推