個晚其實大部分人都知我地三個既事,我放低個酒杯,慢慢行去洗手間。
「我地三個始終都係唔可以去返以前咁。」
我諗起高登仔同Ricky一齊上嚟個晚,我想返去個陣時,我同Ricky一齊攬住高登仔個陣時。
唔係,應該要返到我同高登仔第一次見面個時。
所有野都係我既出現先搞成宜家咁。
我耷低頭拉開門,轉左去女廁,點知門口面企左個人:
「呀,Sorry。」我講完先知,撞到既原來係Chloe,佢扶住我。
「唔緊要。」Chloe講完就行左入去,佢行過既時候好似有陣風吹過咁。
去完廁所入返去,就見到Ricky自己一個坐左係側邊無再玩,我過去坐低咩都未問佢就自己就話:
「玩極都輸,唔玩啦。」(其實只係輸左幾舊水)
「好~ 咁我地坐多陣就走啦。」
「喂你兩個坐埋嚟一齊玩啦,掛住咬耳仔。」Louis班朋友拎住個骰盅yap我地埋去。
「好,照舊高手組呀嘛可~」我坐左過去單手搖左幾下骰盅,啪一聲手起骰落。
高手組即係每Round輸個個最少要飲一杯,咁玩大話骰既話你仲可以同你要開佢個條友輸賭,最少都要用一杯做賭注;而且唔可以提人或者重複返頭先叫過啲咩,有份附和開既人開錯左都要一齊飲。
唔記得講,玩親骰盅我都係會輸到仆街,Ricky都係。
個時既我都算幾飲得,反而Ricky輸既時候我就幫佢頂左幾杯,佢個樣好似唔係幾掂咁。
「唉屌無煙tim,喂Ricky有無。」高登仔問坐左係到隻眼就嚟變到得返條線既Ricky,佢揮揮手繼續攤係梳化。
「你繼續玩我落去買啦,照舊黑冰?」Chloe行過嚟好溫柔咁問高登仔,佢點點頭,Chloe拎銀包就走左。
「喂,呀嫂好鍚你喎,恨死隔離啦。」班男人醉醉地咩都笑一餐。
「喂一齊出露台,食住我個包先啦。」Louis過嚟比左包紅萬高登仔,成班男人都跟左出去,佢地仲拉埋Ricky走。
成間吧得返歌神Kyle係到唱緊歌,我走過去同佢一齊唱,佢點左蕭敬騰既夢一場。
「時常想起過去的溫存 它讓我在夜里不會冷
你說一個人的美麗是認真
兩個人能在一起是緣份」
「唱得幾好喎,妍。」Kyle笑住摸我個頭,繼續唱落去。
等佢唱完之後,我先開口問佢:
「做咩你唔出去既,佢地好似傾緊我既事。」
「無興趣,同你唱下歌仲好啦
。」
好彩有Kyle陪我咋,佢就好似個大哥哥咁,無記錯佢應該岩岩好大我十二年,我地都係屬豬;佢啲style次次都係裇衫貼身西褲,個頭gel到打風都打唔甩。
Kyle同我坐左係波枱邊,下一首係林宥嘉版本既,我愛的人。
「我愛的人 她已有了愛人
從他們的眼神 說明了我不可能」