春泥
2020-12-29 23:50:32
「之前讀書嗰陣,佢已經做好多出人意表嘅野,好似之前我地一齊合作買賣史露比公仔咁,佢有好多驚人嘅諗法,都唔似一個普通中學生會做嘅野,佢嗰陣好活躍,好積極參與課外活動,讀書成績又好,會考成二十九分,啲老師同學都以為佢會繼續升學,但點估到佢入娛樂圈,由歌手演員到玄學家,再到娛樂公司老闆。」
「哦!原來之前傳妳就係嗰個史露比少女係真嘅,係呢!成皇志,你寫首合唱歌畀你同宛琳珊合唱,係咪有啲咩特別意思?」
「宛琳珊係我地公司嘅一姐,我當然將最好嘅作品俾佢啦!希望依首歌大家會鍾意啦!」
「宛琳珊,妳之前喺雜誌上面公開講過妳嘅擇偶條件,話要聰明、有上進心、有才華,咁成皇志算唔算妳嘅理想對象?」
宛琳珊噗嗤一笑,道:「佢依家係我老細嚟架!你叫我點答喎?佢喺各方面都咁成功,大把女仔排住隊做佢女朋友啦!點輪到我喎?」
「咁成皇志呢?宛琳珊咁靚,讀書嗰陣你地又一齊合作,其實你有無對宛琳珊有情愫呢?佢符唔符合作為你女朋友嘅條件呢?」
「講真宛琳珊條件咁好,我話對佢無任何遐想就呃你嘅,不過就係佢條件太好,我配唔上佢嘛。」
「你地咁講,其實雙方嘅條件都符合你地心目中嘅理想對象喎!」
「咁啦!我地依家就做螢幕情侶一齊工作搵銀,歡迎各大電影老細、廣告商嚟搵我地兩個一齊演出。」
宛琳珊笑道:「係囉!依家事業為重,其他野遲啲再講。」
「咁你地即係唔排除你地有發展嘅可能?」
我和宛琳珊異口同聲道:「未來嘅事邊個會知啊?」
記者訝道:「你地兩個果然有默契啊?」