簡介基本古代思想概念：道家、農家、墨家
兼談荀子非十二子篇（一）ep.15
今次要講嘅非十二子篇
同上次非相篇，同樣都強調「非」字
一個思想家，否定嘅重要性唔會比肯定低
因為否定一樣嘢，係肯定緊自己諗法
否定嘅肯定，反對別人以成就自己，係一體兩面
荀子生於春秋戰國末年
可以話已經見證各種思想流行嘅盛況
呢邊佢特別針對六種學說、十二個人去批評
係荀子眼中，真係在座各位都係垃圾
荀子 非相篇第六
假今之世，飾邪說，文姦言，以𣻏亂天下，欺惑愚眾，矞宇嵬瑣使天下混然不知是非治亂之所存者，有人矣。
𣻏亂：擾亂
矞宇嵬瑣：「矞」字同「譎」，指詭詐；「宇」指放蕩恢大，空耀眼；
「嵬」指狂險賣弄，「瑣」則是姦細碎雜；形容當時嘅讀書人
荀子開筆立論，一開波就講
今時今日呢個世界，太多人妖言惑眾啦！
暴君率眾妖害人，人間積怨何容忍
就係你地呢班膠學者，搞到呢個世界咁亂
請注意：荀子係用儒家本位去批評其他學說嘅
縱情性，安恣睢，禽獸行，不足以合文通治；然而其持之有故，其言之成理，足以欺惑愚眾；是它囂魏牟也。
它囂、魏牟：荀子眼中嘅道家人物
道家各派說法不一，但都有共同點
呢到荀子一針見血咁就道家嘅特色批評：
1.縱情性，安恣睢，禽獸行
道家講求個人嘅自由解放，順從自己嘅本性
係荀子眼中，呢種人同禽獸係無分別嘅
因為同儒家講嘅人禽之別有衝突
2.不足以合文通治
道家對儒家講嘅禮義法度，係唔認同嘅
「聖人不死，大盜不止」
所謂嘅倫理關係，係違反人嘅自然天性
荀子當然覺得道家咁樣搞，搞到世界好亂呀！
忍情性，綦谿利跂，苟以分異人為高，不足以合大眾，明大分，然而其持之有故，其言之成理，足以欺惑愚眾：是陳仲史鰌也。
陳仲、史鰌：農家代表人物
我地今時今日好少會聽到「農家」呢兩個字
因為呢派思想係秦朝受到壓制
後尾幾乎係已經唔存在啦
但影響力好大，中國各朝代都係重視農業嘅
農家嘅思想係春秋戰國係重要嘅
同儒家、法家、墨家互有關連影響
荀子係呢到批評農家：
1.忍情性，綦谿利跂，苟以分異人為高
農家最強調嘅思想係「食」
叫哂大家返鄉下耕田，農業好國家好
但荀子認為，咁樣係壓制人性嘅
有更多其他都重要嘅事，咁樣係偏離大道
以為與眾不同就好架咩
2.不足以合大眾，明大分
荀子最唔能夠認同農家嘅地方
「欲使君臣並耕，悖上下之序」
係因為農家希望上至天子，下至百姓
大家一齊平等咁耕田，咁樣嘅諗法
點樣係現實真正令大眾團結呢？
因為現實係有階級，要各施其事
農家根本唔明禮義「大分」嘅道理
不知壹天下建國家之權稱，上功用，大儉約，而僈差等，曾不足以容辨異，縣君臣；然而其持之有故，其言之成理，足以欺惑愚眾：是墨翟宋鈃也。
墨翟、宋鈃：墨家代表人物
儒家嘅人係好唔鍾意墨家嘅
荀子針對墨家有以下兩點批評：
1.不知壹天下建國家之權稱，上功用，大儉約
呢到主要係墨家反對禮樂
儒家認為佢地根本唔知點樣治國平天下
只係識功利咁去思考
一味要求節省，「節用」、「節葬」
唔明白所謂「隆禮」嘅重要
2.而僈差等，曾不足以容辨異，縣君臣
墨家講「兼愛」，係一種宗教式嘅大愛
愛係無分彼此，當大家都愛大家，天下太平
儒家嘅愛係有「等差」，有層次嘅
愛父母比較多，愛朋友比較少
一步一步咁推廣出去，去發揚自己嘅愛
荀子批評墨家唔識尊重個體，無君臣倫理之分
完全唔理解呢樣嘢嘅重要
多謝巴打支持
慢慢睇呀絲打
