［長文慎入］練大隻！全部同我練大隻！

易事健身 2019-07-03 12:56:44

大家好，我地係易事健身 Easy Fitness。
我地係一班業餘健身愛好者，有男有女，都發過夢。
有感好多一齊發夢嘅，無論係學生定係大人，好多一睇就知冇做開運動，一係好瘦，一係偏肥。大佬呀！每次講到ENDGAME咁，但係你平時唔好好鍛鍊自己，點保護自己同埋身邊嘅人呢?

我地覺得香港健身風氣真係太差！我地想試下實行一個全民健身計劃！我地要你地一齊練。大。隻！

Q. 點解要練大隻? 女仔都要?
A. 有力先發夢搬得郁物資架嘛；
有力先carry到啲裝備架
遇到正面衝突，至少有個勢，即使唔夠揪，走佬都要跑得快啦。
所以，養成運動健身習慣非常重要！
香港冇軍訓，先天上已經蝕底啲。
女仔都會一齊發夢，就算你唔敢企最前，而69, 612係好多女仔的)，後勤都需要你撐住。
我地想各位會發夢嘅易事強身健體，鍛鍊體能，增強自信，比狗咬都唔怕！

Q. 咩人適合參加呢個健身計劃？
A. 我地目標係幫新手培養健身習慣，講緊完全冇接觸過健身，而平時又極少運動嘅人。
如果你係已經接觸健身一段時間但停濟不前，或者想操fit體能入紀律部隊（考狗免問，屌你老母），我地都會盡量幫你，但係優先次序會俾新手先。

Q. 駛唔駛收錢？
A. 唔收。完全免費。你想支持我地，可以加入我地幫手，或者課金去義士基金或傳媒。

Q. 俗語都有話免費嘅野最貴，點解你地唔收錢為其他人付出？
A. 如果你真係想問呢個問題，不如去問義士，不如去問一直默默付出嘅學生。
我地相信每個人喺各自嘅崗位努力，我地想有心人知道其實佢地並不孤單。

Q. 我乜都唔識，你地準備點教我？
A. 易事健身推廣健身風氣暫定有兩種方式
⠀⠀⠀⠀⠀⠀⠀⠀⠀
1. 推廣適合新手嘅健身資訊。
我地知道健身一大堆資訊新手好難消化，所以我地會預備由淺入深同埋有趣方式將有用嘅資訊講出黎。
⠀⠀⠀⠀⠀⠀⠀⠀
2. 一對一Remote Mentorship Programme
我地覺得健身冇一套必定正確嘅方法，每個人適合唔同方法同埋計劃。我地目標係一個Mentee配一個Mentor，幫你度身設計個人化嘅健身目標同計劃, 幫你由零開始慢慢學習同進步。萬事起頭難，我地覺得有個人一開始帶住你，可以走少好多冤枉路，洗少好多冤枉錢。

Q. 我係女仔，但係覺得問男mentor會怕醜。
A. 我地男仔教男仔，女仔教女仔。我地絕對唔會問你拎個人資料，除咗身高體重同職業等。你亦都絕對唔好向我地提供任何個人資料。我地希望Mentor同Mentee保持一個平等同互相尊重嘅關係。

Q. 如果我想參加你地嘅健身計劃，有乜野需要預備？
A. 刻苦，決心，毅力，意志，時間，精神同埋紀律。
你可以揀買啞鈴喺屋企練，喺街練，去康文，physical，或者clubhouse etc，點都好過你乜都唔做成碌木企喺度。

Q. 有巴絲問，熱狗以前都號召過人做類似野，你地同佢地有乜分別？
A. 我地只係一班小市民，連組織甚至團體都講唔上。我地只係想大家練大隻，保護自己同保護身邊嘅人，就係咁簡單。聽落好似微不足道，不過我地相信，每個人都係一個小齒輪，如果每粒小齒輪都可以更健康、更強壯，先可以推得郁大齒輪。

Q. 想幫手可以點？
A. 加入文宣組或者加入成為mentor。文宣組識普通製圖就可以；Mentor我地希望有健身經驗、知識同熱誠就得，唔需要好叻或者好專業，最重要係教到新手健身果陣點樣盡量避免受傷。如果你係健身老手，又想幫手一齊帶起健身風氣，歡迎留個TG傾傾。
（屌你班大隻佬淨係識嗌交，又唔出黎幫手，抵你俾人笑，係咪？想洗脫柒名就黎幫手操FIT各位巴絲）

最後，先小人後君子，希望你至少為自己定立一個目標。如果你就咁留低一句「我想減肥」或者「想練腹肌，食少啲有冇用？」我地好難幫你。
記住記住，我地只能從旁協助，你有疑問歡迎提出，我哋一定會盡所能去解答，但如果你期望我地比啲一式一樣嘅餐單你去跟，比幾個動作你去做，然後你本人唔經思考盲目咁跟，唔使點附出就冇啦啦變到好fit，sorry，你可以撳返上一頁，我哋幫唔到你。

任何嘅改變都係由你自己開始，堅持堅持再堅持，先會有結果。

我地依家啱啱開始冇耐，已經幫緊幾位巴絲設計咗Programme。原諒我地人手真係不足，暫不考慮落區健身。

如果你有決心作出改變，但又無從入手；或者你都覺得我地個概念好，想幫下手，不妨留低TG試下搵我地傾下，或者喺下面個IG DM我地，的起心肝去試下行出第一步。

https://www.instagram.com/easyfitness.easyfitness/

最後最後，天佑香港，共勉之。

易事健身 2019-07-03 13:00:11

唔收錢架喎？
不過都多謝你推Post

JS3351後悔一生 2019-07-03 13:01:55

邊間呀？有冇8折