【租金受壓】一城老街坊:租金唔會大跌,升就未必!
一手買入沙田第一城,卜居30多年的劉生表示,租金唔會大跌,升就未必,因為樓價仲係咁貴。
雖然有兩房單位月租跌穿1萬元,但他認為:「話跌啫,我諗好少部份囉。一兩間或者會有,但大部份都過1萬元。其實睇業主實力,實力夠,咪平啲租,唔等咪擺係度,好似我個女(同住第一城)隔籬個單位買咗幾年,無人住,擺係度吽,佢或者買咗唔等錢使,又唔想租俾人,呢啲好難講。問題係樓市會唔會大跌,跌到啲人驚,但暫時睇唔到。」
他續稱:「好似幾年前,朋友話樓市會跌,結果佢賣樓,又話賣嘅價係最高,點知原來一浪接一浪,越推越高。早幾年個女買第一城細單位200幾萬,我都覺得貴,但而家講緊400幾萬,呢啲邊度得有得講,完全摸不著頭腦。」
對於有意見指租金落,回報收窄,業主會賣樓?老街坊就話:「我自己唔係咁睇,賣咗樓,都要買嘢㗎,股票外匯又難搞,買咗樓擺係度,最緊要租金冚到條數,平啲租冚到,收支平衡出OKAY。如果冚唔返條數,月月要俾錢嘅,乾手淨腳賣咗佢,斬纜啦!」
另外,沙田第一城租客蕭女士因為湊孫,阿女6年多前開始租住屋苑兩房單位俾她住,月租由8,000元,加到目前1.1萬元,「未跌過,覺得好慘囉!年年加租,住40座住咗2年,原本10,800元,一加2,000元至12,800元,惟有搬去16座,都是10,800元……而家月租11,000,好淒涼!」點解唔買樓,她稱,因為女婿幾年前話樓價跌啲先至買,但其實無得跌嘅!她都好坦白咁話,如果租金跌,梗係好,唔使租咁貴。
http://hkm.appledaily.com/detail.php?guid=56300481&category_guid=7015342&category=instant&issue=20170213
女婿