話說…….今日有幾次突然feel 倒卡拉有嘢想講, 好心急嗰隻, 奈何我全日都出咗去, 頭先返到嚟先有機會同佢連結
之後佢講咗堆我一路打返出嚟而又再睇咗幾次都覺得好一頭霧水嘅說話, 佢臨尾仲同我講” 請你將呢番說話廣泛咁傳出去, 有心人、有緣人自會明白。”
於是就有以下呢堆千字文
卡拉: 因為我知道有啲嘢要發生, 所以我好希望可以同你嘅朋友講一席話, 將我嘅光同愛帶俾佢哋, 等佢哋知道, 佢哋唔係孤單嘅。
我希望你哋相信自己, 相信自己嘅能力, 你哋係有創造呢個世界嘅能力, 你哋嘅創造力係好強。我急不及待想話俾你哋知你哋係有呢個能力, 因為有好多人都唔相信。我知道你哋有好多人都唔相信, 所以我喺度重申一次, 你哋嘅創造力係十分強大。你哋要相信嘅唔係我, 係你哋自己, 你哋最內在嘅自己, 你哋本質嘅自己。
你哋有啲人關心”高我”, 呢個係一個十分好嘅行為, 都係一個好好嘅開始。高我其實都係你哋自己, 佢係你哋嘅一部份。高我擁有你哋所唔知道嘅能力, 你哋所唔相信嘅能力, 但係呢個係你哋嘅一部份。
(之後佢叫我都相信自己, 仲話佢都係同緊我講, 同埋同所有地球嘅人類眾生、地球嘅朋友講。)
我嘅朋友們, 請你哋相信自己。我知道有啲人覺得好孤單, 覺得好似被遺忘一樣。”點解我冇呢個能力呢?”、”點解我好似係被忽略嘅一群呢?”、”點解佢哋每個人都做得到, 而我就做唔到呢?”、”我唔相信, 冇可能嘅, 我一定會做得到, 我要去證明自己, 我係有咁樣嘅能力嘅。” 你哋有啲人會咁樣諗。但係, 請你哋明白, 呢個能力唔係俾你哋去證明自己, 而係你哋本身就已經有。你哋唔需要努力去”獲得”呢個能力去證明自己, 而係要去搵返呢個能力。從你嘅內在去搵返呢個能力, 因為呢個係你哋與生俱來嘅。
就好似[三色豆] 一樣, 佢本身都唔知道自己有呢個能力, 係喺我嘅引導之下, 亦都喺佢嘅靈魂帶領之下發挖返佢呢個能力, 係佢與生俱來嘅內在嘅寶藏。呢個係佢本來就有嘅能力, 而你哋都係一樣, 你哋每個人都有呢個能力, 所以我希望你哋相信自己。唔需要相信任何神靈, 唔需要去聽從任何神靈嘅說話 ------ 聽你哋內在嘅說話、內在嘅指引。你哋最好嘅指引喺你哋每一個人嘅內在, 我希望你哋去搵返佢。