Levent建議我地可以試下搭船穿過凡湖(Lake Van),慳返d時間,不過固執既我依然決定沿住個湖黎踩,寧願花多幾日時間。
整裝待發,有埋電話卡,真係萬事俱備,於是係Van留左一日,我同小明就出發向西進發。
Lake Van
積雪依舊厚,可幸既係我地循住大路踩,經過車輛既洗禮,馬路上半點雪跡都冇,可以話同平時冇乜分別。唔知幾耐冇見過一望無際既「水」,即係海呀湖呀咁,你知啦,湖都可以好撚大,咩太湖、西湖咁,Lake Van都係一樣,根本望唔柒到對岸。
話係海都有人信啦
Lake Van有幾大呢?我地由湖既東南邊既Van,踩去西南邊既Tatvan,超過一百五十公里,當時唔想咁辛苦,分左兩日踩,始終有上有落,chur到咁盡好無謂。
呢一頭有唔少露營營地,相信Lake Van沿岸都係一個渡假勝地。望住大湖,路況又好,心情難免輕鬆左,我仲不斷同沿途見到既路人打招呼,我呢d平時鞋口鞋面唔出聲個個人都怕左我既人會笑笑口主動同人say hi,真係心情好撚好先會做。
而係一段村同村中間比較荒蕪既路上,有檔魚檔開係路邊,有兩個男人坐左係度,見到我地,佢地主動邀請我地過去飲熱茶。出於提防,我問清楚係咪唔使錢,得到清楚答案係唔使我地先走埋去,嘿嘿!
魚檔就係前面
原來檔主係兩兄弟,係湖入面捕完魚就會係度賣,見有d車經過都會特登停低黎買魚,睇黎生意唔錯。就咁睇樣,呢兩兄弟都起碼三十歲,大概係經常日曬雨淋既關係,而其實佢地分別只有廿一同廿二歲,仲後生過我!
又或者因為有鬚掛?
隔住個mon都聞到浸腥味
快快樂樂咁踩,不知不覺就到下晝,我地遇到係土耳其第一個挑戰──搵住宿。