好多時我地係d舖頭出面坐低咬個包，休息下，都會俾舖頭d人邀請我地入面飲茶。我懷疑飲茶係土耳其既國技既，曾經有研究指出，土耳其係全世界消耗茶葉最多既國家（一時間諗唔起Consume點譯，用住「消耗」先，sorly鬼仔性格），人人得閒無事就煲水沖茶，d茶又澀到痴筋，唔含方糖都飲唔落，加上鍾意食甜品，我幾可肯定佢地糖尿都幾嚴重。
落完雪，個天終於靚返
Okay離左題，係喇，仲有幾好客呢？借宿好普遍啦！而佢地亦同伊朗人一樣，會執我地返屋企，第一次仲幾得意既添。
山區小村
坐低食個麵包姐，咁望我會怕醜架（事實係周圍勁多人望，唔敢明目張膽影）
好sweet！
上天下地，唯我獨尊
又俾人拉左入去飲茶
話說我地見天色尚早，係一個小鎮稍作休息後就繼續上路。丫講到就講埋，我同小明好少會並肩踩，通常都係各有各踩，諗到有野想傾先會會合返，所以係路上有唔少時間我都係自己一個。大約四點半既時候，我俾山邊一個老伯叫停，佢好心提醒我前面已經冇可以借宿既地方，但見仲有時間，我就冇厚起面皮問佢可唔可以收留我。
笑一笑，多謝過佢既提醒之後，我再若無其事咁上路。冇幾耐，見前面有個羊群，趕羊既係兩大一小、總共三個牧羊人，我不以為意咁繼續踩，經過佢地身邊時，其中一個似老豆既截停左我，不停同我講土耳其文，一輪溝通過後，原來佢係想邀請我去佢地屋企留宿。
既然冇試過係土耳其俾人執屍，仲要係牧羊人，諗下都覺得有趣，於是我欣然答應，同佢地講我仲有個朋友係後面，佢地笑得好樂意咁話冇問題，我就跟住佢地返前方不遠、建於馬路邊山坡上既屋企。
係佢地屋企放低忍者龜，老豆就揸架車，陪我出去接小明。係車上望住小明係後面跟，丫屌你，個feel又幾正架喎！踩快d啦傻仔！
五歲牧羊仔好可愛
牧羊人一家七口，全部都係仔，嘩阿老豆你都好撚好腰力……雖然我地言語不通，但靠住Google Translate，依然傾得好開心，俾佢地試用個語言翻譯，佢地仲玩得不亦樂乎，好難得既純樸。
佢地有個仔係唐氏綜合症，大概出於愚昧或者自覺羞愧，佢地冇叫佢影相，但之前食飯係見佢地好錫個仔。
冇錯，土耳其人係冇伊朗人咁主動執人返屋企，正因為咁，能夠有幸體驗，住係呢一家可愛既牧羊人屋企，我覺得份外難得，尤其係佢地真係好得意。
希望你地一切安好。
