容我張狂，由香港踩單車去英國幫曼聯洗廁所 ( 拾 )

「喂今晚食飯咯？」

「咦？你唔係走咗咩？」

「See you soon嘛，咪返咗嚟。」

等Seval放工之後，約咗喺Besiktas會合，然後求其食啲嘢，鳩up咗一陣，喺送佢返屋企嘅時候，佢話一切好似Déjà vu。

「其實我哋應該今日睇戲。」Seval話。

「哦，咁聽日睇囉！」

第二日，又再見Seval，佢話肚餓，於是諗住食埋嘢先睇戲，點知返到嚟戲院話已經冇晒場，隔離商場嗰間又話要搞首映禮而暫停開放。本身仲有間戲院，但因為Seval話有嘢做，同佢同事講要準時收工，而依家佢同事就喺嗰個商場度食緊飯，為怕畀人撞破，最後我哋都係冇睇到戲。

可能個天都唔想畀我哋睇戲啩？

求其行咗陣，送佢返到屋企樓下嗰陣，大家都知道今次真係最後一次見面，我冇可能再繼續留喺度磨蝕心智，始終各人有各人嘅路要行。

「喺香港，你哋道別嗰陣會唔會kiss？」

雖然知道只係錫面，但我第一個反應都係誠實地答佢唔會。輕輕咁攬咗一吓，我就頭也不回咁離開。

喺旅程中有陣時有呢啲經驗，其實都幾開心嘅。