雪唔大,但偏偏兩個轆剷上黎既碎冰封實左我個brake同轉波,轉波真係冇乜所謂,橫掂我雙腿好似摩打,上斜重腳冇有怕,但剎唔到車既話認真會淆底,大佬呢d性命攸關架!
嚇得我拿拿聲停車將d冰撩晒出黎,確定無礙之後先繼續上路。
越諗越心驚,如果係我落緊斜既時候先發現剎唔到掣,後果真係不堪設想。
六點幾食完個早餐,一路上上落落,捱到十一點我已經餓到決定見到乜就食乜,點知勉力踩到十二點幾,仍然見唔到有任何野食,就算經過油站,呢間見鬼既油站都罕見地冇野食賣,實情係上帝要我滅亡。靈光一閃,醒起行李入面有係伊朗Tabirz時Maisam媽媽包好既兩袋糖,唔係糖果個「糖」,係真係一粒粒、佢地飲茶果d方糖,之但係蔗糖,清甜d,果陣俾我地係因為佢話算係特產咁話。
你冇估錯,我餓到拎左兩包糖出黎逐粒隊,一放入口就咬碎吞。唔好講笑,我未食過咁好食既糖,食左成半包,呢半包可以話無論係心理抑或生理,都拯救左我,等我可以捱多兩公里,搵到間餐廳。
係果下,我徹徹底底咁明白,舊時d人飢荒果陣點解會食樹皮,仲會易子而食,換轉係我,莫講話樹皮,包皮我都食呀!
入個油又關你米奇老鼠咩事呀?
起伏拖慢進度,踩到天黑,竟然距離Ankara尚有成四十公里,更慘既係,我條前呔又漏氣!踩下泵下,煩過我老母。因為首都既關係,沿途有唔少市鎮,除左幾公里,其餘時間都有街燈,減去左唔少不便同危險,而果冇街燈既幾公里,因為有個大油站同前面d光實在太勁,我連頭燈都唔使開。
入到Ankara,經過佢既市中心時,我竟然有種去到金鐘既感覺。講明先,我九龍仔黎,如非必要都唔會過港島,一直都覺得港島同九龍係兩個世界,所以d感覺可能唔準。高樓大廈、寬闊馬路,商業味好濃,不過電話冇電,冇影到相。
影埋呢張電話就收左皮
七點半入城,因為盪失路同呔漏氣,我竟然搞到九點有多先搵到小明係Couchsurfing搵個host屋企。好死唔死,電話因為太凍,舊電唔夠照係咁熄機,要放係我個肚仔度暖勁耐先開到機打俾小明,等佢落樓接我。
Host Muzzafer係一個公務員,本身係Istanbul人,因為工作關係先過黎Ankara。據佢所講,Ankara好悶,由多姿多釆既Istanbul過黎,係慘過食兩舊屎,認真狗也不屌。
聽完佢咁講,我亦暗暗期待Istanbul究竟有咩咁吸引。