做精英運動員的先決條件,淨係講丙組(一皮嘢資助)已經要係全國賽頭3,或者世大/亞錦賽8強,呢個已經要求本身難度已經好高;要做到甲+級得2個可能性,一係奧運一係世錦攞牌,香港呢兩屆只係得嗰幾個,點解會覺得做精英運動員好好pay
。
一個運動員入到亞洲頭8,無論放係邊個國家都唔會係容易,無全力練返十年八載都唔會做到。
香港政府無嘢多,錢最多,資源充足,點解唔可以好好咁培養自己的體育產業?比賽出香港區旗,擔住香港隊個朵,上到台仲要播國歌,要政府科水有咩問題?
做音樂/演藝,都至少有唱片公司/電視台簽你,課水比你拍mv、錄音、裝身。再者,音樂不受年紀體格限制,而且壽命極長,胡楓都可以開con。
奧運好多項目都無公司合約制,而運動員最當fit一定係30歲打前,有時限,又競爭緊世界席位,性質、難度都完全唔同層次。
香港人之所以覺得運動無經濟效益,係根本香港從來無認真發展過運動。唔好講睇NBA頭排可以成皮嘢一張飛呢啲極端,Grand Slam/Grand Prix/World Champ/League,你做得起令啲人肯買飛,邊樣唔賺錢,邊樣唔係提升緊你個地區的吸引力,唔係boost緊經濟。
追夢係個人,如果單純覺得運動員成就只係屬於一個人,成功失敗同社會毫無關係,培養運動員無意思,未免將運動睇得太低,可能就係因為咁香港運動發展咁差。既然有成績又要比你香港政府打晒飛機,咁唔好輸打贏要。一邊想你做世界top3,一邊投放雞碎咁多嘅資源,而門檻又極高,本末倒置。