[獨遊] 終於踏足南美洲

巴打幾時出發，等睇你遊記

15號，不過南美就3個後

絲打自己一個去Mexico要小心啊！！！

我都搵唔到旅伴 諗住下年一個女仔 去南美一個月

諗住去秘魯、玻利維亞、阿根廷、巴西

一個人會唔會好危險？

怕危險既話大城市唔好留咁耐
基本上大部分小鎮都好安全
同埋揀日照長既月份去
夜晚出街都仲未天黑就冇咁危

Day 56 - 69 Antigua

讀書篇
幾年前去墨西哥已經聽其他 backpacker 講，危地馬拉係個好適合讀遊西班牙文嘅地方，所以今次特登黎讀書順便旅行

雖然我嘅西班牙文去旅行可以簡單溝通，但我想逼我自己努力少少，唔好淨係識用現在式（返黎搵工可以同 HR 講去左進修）

英文喺南美洲冇乜用，反而中美洲多啲人講英文。聆聽方便我覺得自己係進步左，但生字同文法靠平時好難學到

我讀嘅學校係 Antigueña Spanish Academy，應該係 Antigua 最大嘅西班牙文學校，一個星期 $115 USD。讀書期間住呢度嘅 homestay，包住宿同三餐（星期日要自己搵野食）一星期 $145 USD，除返港紙的話加埋大概 $300 一日，算非常抵。

住宿篇
我嘅 homestay 加埋我有4-5個學生，大家食飯會用西文吹水，一開始大部分都聽唔明，黎左幾日算勉強加入到對話。

同啲嚟左一段時間嘅同學仔講開，佢地之前有啲 homestay 屋企有昆蟲問題，或者啲嘢好難食所以之後轉左另一間。啲昆蟲問題好似幾嚴重，聽聞有人試過半夜逃走去搵酒店。

好好彩比我一野就撞中個好乾淨冇昆蟲飯又煮得好食嘅屋企，我覺得自己喺嚟方面係有少少運氣。

我住嘅單人房有自己洗手間，有私人空間實在太好



好天嘅時候一打開門就見到火山 Volcan Agua


間屋仲種左好多植物




早午晚餐，真係差不多日日唔同款





最後一晚我買左個檸檬麵包比大家（呢間麵包鋪好多年歷史，叫 Doña Luisa，有興趣可以試試）

同學仔喺隔離間 Doña Maria 買左危地馬拉糖果


上堂篇
學校有兩個分校，一朝早去 office 報到比完錢後，老師就帶我去學校個花園。大部份學生都喺度上堂，忙嘅時候一朝有成80個人


我老師叫 Erbin，通常每日同我傾偈傾兩個鐘，我地咩話題都講，好少先會睇本書，我覺得 hea hea地幾好

我上堂個位


Erbin 有無限耐性，有時我要諗好耐或者要查字典都比好多時間我

我冇諗住讀完會好大分別，對我黎講呢個係一個體驗多過學習，順其自然就好。冇壓力讀書係最開心，為左考試死記爛背嘅記憶通常都好短暫

一日4個鐘，朝早有免費咖啡飲
中間有30分鐘休息，我通常鐘意上學校個天台坐，好天嘅時候可以見到火山


每個老師嘅教學方式都好唔同，學校有派 notes 但唔係個個老師都會用，好多有自己嘅練習書。如果覺得唔夾下星期可以轉老師。

如果唔想坐喺度半日，可以問下老師想唔想去行下或出去飲咖啡，不過學校外嘅所有費用都要幫老師出埋

因為我喺度嘅時間唔長，我只係出左去兩次（主要最後嗰兩日係我唔想學新野）

尾二嗰日放完 break 就出左去飲咖啡，我同 Erbin 就喺間 cafe 講下我之後嘅行程，佢又講啲危地馬拉常識比我知

最後一日唔知做咩好，Erbin 就帶左我去參觀佢地嘅墳場，一路行佢就講解下呢度嘅葬禮習俗，好似一個迷你 field trip 咁。原來呢度有啲位係租架，租約期滿冇交錢就會比人攞返出黎掉去第度，無人認領就會處理左條屍

我地仲見到一個中式嘅牌位，都幾神奇。

我同 Erbin 講過危地馬拉華人嘅話題，我就問佢點解呢度冇華人，明明隔離墨西哥同伯利茲都唔少。佢話其實有好多，佢細個嗰陣啲便利店老闆都係華人，只不過後代都同當地人結婚完全融入左，所以而家 Antigua 睇落好似冇華人咁解

我覺得 Erbin 真係一個好好嘅老師，所以 last day 我送左個小蛋糕比佢

學左兩個星期我覺得自己有明顯進步，終於可以一句表達到，唔係幾粒字斷斷續續咁同人溝通比起一班人坐喺課室聽書，呢個學習方式對我黎講有用好多

課外活動篇
每個星期都有免費嘅課外活動，一個星期有4堂 Salsa 堂，逢星期四晏晝有文化活動，講解下危地馬拉嘅食物呀節日呀，我覺得好得意

有次係講瑪雅婚禮，即場搵左兩個同學仔扮結婚好搞笑


最重要係文化活動有好多野食，為左免費食物點都要出席

感想篇
可能呢度嘅生活太寫意，兩個星期話咁快就完

每一日起身落樓下就有早餐食，食完行去學校都係幾分鐘，同老師吹下水，放半個鐘 break，再上多個半鐘就落堂

返到屋企坐陣又有飯食，晏晝做下功課溫習下，去附近 cafe 買杯咖啡 hea 下或者逛下，返屋企 hea 多陣又食飯，夜晚玩下電話就一日

星期六日鐘意可以去行火山，或者去附近玩，我諗我理想嘅退休生活都差唔多開始明白點解有同學會留幾個禮拜甚至幾個月，亦有同學會不停返黎讀書。

如果有多啲時間我都會想留耐啲，兩個星期學到嘅嘢好有限，但我覺得自己嘅西文明顯進步左

我覺得若果冇任何西班牙文底子，就咁嚟讀應該會有啲辛苦，因為老師都唔太講英文。但都有好多同學黎之前完全唔識，留左2-3月後已經可以同本地人正常溝通我諗呢間學校真係好好，美國嘅學生離開後有部份會再返黎上堂

八卦篇
同啲同學混熟左之後八左好多學校嘅是非，全部都係學校嘅管理同安排混亂呀，仲有老闆抽好多水

老師人工幾錢就唔知啦，但原來 homestay 家庭只係收 6-7成，學校個老闆淨係負責安排就有四十幾美金。之前有講過啲 homestay 好參差，但學校係唔會理架窩，佢只會幫你轉另一間

Usd 同 Quetzales 匯率大概7.5，學校唔收美金但學費標價係美金，定左個匯率係8，即係話雖然學費寫115但實際一定比多過115

我都明白做生意係要賺錢，唔係搞手求打個和，雖則老闆賺好多錢，但佢地做野都幾哪西

老闆同個仔做曬 admin 嘅工作，兩個共用個 email 但兩個好似知啲唔知啲咁。之前係咁搞錯我第一堂個日子，明明我星期五開始，係咁叫我星期一去 office 搵佢。仲有其他同學啲安排又係比較亂，有時啲態度亦都麻麻地

飲食篇
Antigua 係危地馬拉其中一個咖啡盛產地，可能係咁呢度充斥住大大小小嘅咖啡店。我唔識分咩係好咖啡，總之飲落唔酸我就鐘意



呢度好多餐廳/ cafe 有個花園或者天台，例如好出名嘅麥當勞同星巴克，可以就咁坐半日










可能因為太多遊客，呢度食野唔平，一杯咖啡要廿幾蚊港紙，一餐飯大概60-90港紙，所以我好少出街食飯

我鐘意危地馬拉嘅 ceviche 唔太酸


買左兩包咖啡，聞左好耐先決定買邊款


觀光篇
除左讀書外Antigua 都係一個好多遊客嘅地方，好適合隨便逛，印象中啲博物館都係免費。其中一個 MUNAG - Museo Nacional de Arte 有唔同時代甚至幾千年歷史嘅文物睇









另外一個 Cooperación Española







附近有個觀景台叫 Cerro de la cruz






匯豐雪糕車



其他 Antigua 街拍

期待新遊記

去完啦好安全

睇下你去邊，巴西聽聞比較危險但我冇去
其他國家就睇城市，暫時我去過嘅地方都感覺安全，大城市會比較雜但小心啲就得
絲打打算去邊啲城市呀？

有冇叫雞

我見好多評價都係吊飲食差

你睇落已經好好

有冇諗住玩完再學西班牙文？

Lm

飲食真係唔錯
有呀，返香港都想繼續學西班牙文

Antigua 好似主題樂園咁夢幻，但一出城就返到人間咁，貧窮、罪案充斥成個國家

$300 港紙一日包食宿同學費好抵，值得考慮

希望樓主繼續學西班牙文，咁就可以再去南美

就算大城市搶既都好少，所以都係自己做足安全措施先，例如安全腰包、夜晚靠Uber 或者的士出入

細城市就治安比較好

我覺得危地馬拉呢個國家好迷
物價唔低但人工唔高，大部分人都窮
有勁多美國快餐店但冇乜交通工具
明明有好多天然資源但冇乜環保意識
啲公路側邊全部都係垃圾
旅遊業係主要收入但完全輸比隔離墨西哥
我諗貪污毒梟黑幫對呢度應該仲好大影響

我會繼續練習西班牙文
希望有朝一日可以正常溝通到

留名睇live

危地馬拉讀西班牙文嗰part好吸引喎
照咁樣計，即係一個月都可能係8000幾港幣搞掂學費同住宿心動了！
但想問Homestay嗰啲有冇得事前揀？定係佢派咩俾你就要住？有冇得自願比貴少少住好啲既homestay

你係google map搵果個地方既西班牙學校就有一堆睇

喺香港會自學定上堂

Day 64 - 65 Volcan de Acatenango

Volcan de Fuego係一個好頻密爆發嘅火山，大概15-30分鐘就會爆一次

Volcan Acatenango 係觀賞 Fuego 最合適嘅位置，所以通常係行上 Acatenango 個頂再近距離睇 Fuego

黎左幾日危地馬拉都好大霧，1516到底好唔好爬火山，上到去睇霧咪好 on9但啲同學都話好值得去，所以最後都係決定去左先，祝我好運


雖然已經過左旺季，但呢個團好受歡迎所以最好都係越早報越好，遲報的話比較好嘅團會滿額

今次跟嘅旅行社叫 Soy Tours，價錢平但網上評價唔錯，所以就報左佢。500 GTQ 一個人，包食包住包入場費，冇裝備的話可以借或租。平團唔好嘅就係太多人，我地成40人一路行一路講野好嘈，同埋成日都唔知停係度等人

出發嗰朝有車黎接，接曬啲人之後就會去佢山腳下嘅辦公室比錢租裝備，因為人多嘅關係搞左一大輪


呢兩日嘅行程


擾攘左成個鐘後出發


印象中頭嗰段路係最辛苦，因為全部火山灰


回頭一望大霧到，明明出門口嗰陣好好天，點解會咁


中途啲風吹走左少少霧


好撚多人


午餐飯盒要自己孭，個飯盒第日落返山要還比佢但我完全忘記左


可以另外比錢請 porter 我記得好似 200 GTQ，呢間公司嘅 porter 係會跟住你行，有需要可以隨時喺個袋攞野。我大概知道自己可以負重幾多就冇請

今次同行有個英國女仔男朋友係香港混血兒，咁啱佢之前嘅行程同我差不多，我地幾好傾就一齊行，佢 porter Alex 喺隔離有時會同我地講幾句，就把握機會練習下我嘅西班牙文

Alex 原來好細個得17歲，但已經做左年幾挑夫，即係15-16歲就開始。我都見識過唔同國家嘅挑夫但咁細個都係第一次見，再一次感嘆自己生喺香港真係好幸運

雖然有工作但 Alex 都仲有返學，佢一星期都上山好幾次。我諗 200 蚊一日對呢度人嚟講應該都算多錢，除返時薪同香港最低工資差不多，但體力勞動辛苦好多

一秒好天一秒多雲



5個幾鐘後終於到



有個地方比我地坐



上到 basecamp 後可以選擇行唔行去 Volcan Fuego，來回大概5個鐘，每人要比多 200 GTQ （有啲團會要求出發前決定去唔去要先比錢，有啲可以上到 basecamp 再決定，出發前記得問清楚）

我自己今日就行夠所以冇去到。行去 Fuego 條路聽其他去左嘅人講雖然值得但應該係好辛苦

我地今晚瞓嘅地方，逼到



就算唔去 Fuego 都可以望到火山爆發。真實睇可以見到啲岩漿噴出嚟，但我每次都錯過左影唔到



據聞 Soy Tour 係唯二望住西邊嘅 basecamp，可惜多雲只睇到丁點日落




是日晚餐



日落後就開始凍，有熱朱古力飲


日夜溫差都幾大，一定要帶夠衫

差不多瞓着嗰陣同房終於行完 Fuego 返黎

雖然個山得3千幾米，但聽聞有啲人會有高山反應，最好都係帶定啲藥

第二日要睇日出四點三就出發


上山頂條路比起第一日唔算難行，但成日停左喺度唔知 jm9

經過一個鐘嘅努力後我地到達一片白濛濛嘅山頂


好 sad



不過天氣呢啲控制唔到嘅因素係咁架啦，起碼我登左危地馬拉最出名嘅火山山頂

行返落 basecamp 等食早餐。可能因為前一晚落左成晚雨今日又冇太陽嘅關係，感覺上朝早仲凍過夜晚

食完早餐碌返落山，落山大概3個鐘，之後有車接返我地去 Antigua

我都覺得喺嗰度學西班牙文真係唔錯
冇得預先揀，同埋你唔去到你都唔知邊個好
唯一可以做嘅就係唔啱轉到啱
我有遇到其他人住 hostel 或 airbnb
但住 homestay 包三餐一定最抵

應該會上堂，但未決定喺香港學定網上課程
想用埋持續進修啲錢但一讀就要年幾

好sad 好似去咗大帽山