出發前
阿根廷選左新總統後好似不太平,智利二月頭又有嚴重山火。因為行程緊湊,是旦一班機取消我都幾頭痕。但呢啲控制唔到嘅因素擔心嚟都冇用,唔好彩遇到再算。
每次獨遊前一排都會開始淆底(就算去日本呢啲都會緊張)
話就話準備左好耐,但好耐冇去啲咁有挑戰性嘅地方所以好淆,總覺得會遇到沮滯
希望一切順利,最壞打算咪買機票返香港囉 ~
廢話少講,出發啦
Hong Kong > Istanbul > Buenos Aires
唔計伊斯坦堡轉機落地4個鐘,加埋成30個鐘,希望撘完唔會冇左半條命
去伊斯坦堡班機都幾爆,好多旅行團。坐我隔離係兩個婆婆(頭髮未白曬,行得走得幾健康,食飯飲紅酒啤酒
,我喺隔離飲蘋果汁
),佢地8個 fd 一齊跟團玩土耳其11日。如果有咁長命的話,希望我老左都可以好似佢地咁樣仲有能力同健康周圍去。
第一次搭土耳其航空,啲空姐又幾靚女同幾好態度。張櫈算坐得舒服,我半程機都瞓得着。
原來而家仲會送呢啲飛機旅遊包,呢幾年淨係撘廉航好耐冇見過。
話咁快食兩餐,瞓下覺就到左伊斯坦堡。轉機個過程幾快,土耳其機場嘅工作人員都幾友善。
搵個位等下班飛機。伊斯坦堡機場得一個鐘免費 wifi,用幾用就夠鐘
4個鐘後又撘下班機,架機先停一停巴西,落啲乘客又上返啲乘客再去阿根廷。呢程打大佬18個鐘
但真心唔算辛苦,土耳其航空啲位係幾唔錯。
阿根廷 - Buenos Aires
終於落機,當時急急腳一幅機場相都冇影
排隊等入境見啲人攞曬文件比佢 check 以為自己都要搞好耐
到我嘅時候個工作人員係咁咦問兩句,睇我住宿個地址就放我走,臨走仲同我講 nice to meet you
攞完行李 Call uber 去 hostel ,30分鐘就到。好快梳洗完就休息,聽日要搵地方唱錢。