[獨遊] 終於踏足南美洲

百貨應百客，有d錢唔怕比人賺，賺過安心

好好天

都多雲但好好彩冇落雨
馬丘比丘真係好正
雖然睇相已經睇過幾萬次
但親眼見到係完全兩回事

有d地方係睇相靚好多，有d現場睇先靚

所以成日覺得去過先有資格講靚定唔靚

好得意呀, 繼續支持！

Huayna picchu 行到懷疑人生

啱既，不過我純粹冇興趣行Inca trail姐
同埋當年啱啱畢業窮撚一個慳得就慳

Sorry 想問下樓豬機票幾錢？同埋點飛先最平？
Thankssss

個人覺得去馬丘比丘，唔係窮遊的話真心應該整返個guide係度，你會了解多好多馬丘比丘同印加呢個文明，否則上到去可能只會覺得係一堆石頭石屋

Inca Rail有個all inclusive 既套票，包哂所有交通、入場劵同埋個guide，基本上除左馬丘比丘有個guide帶住之外其他時間都係自由活動

馬丘比丘以秘魯物價計
真係好貴

其實都唔係貴，只不過係外國人收另一個價咁解

Day 25-26 - La Paz

La paz 係玻利維亞另一個首度，除左搭纜車同女巫市場之外，好多人都話 La Paz 係一個冇乜野做嘅城市，但我其實幾鐘意

我住女巫市場隔離，所以一到步就去睇到底女巫市場有乜咁特別，結論係冇

咪好似中藥鋪咁樣有啲草嘅物體，唔吸引



行下行去左一個街市叫 Mercado Rodríguez，啲食物又幾新鮮，可惜我一個人食唔到咁多生果就冇買




玻利維亞同秘魯好多炸雞店，其中一個常見嘅食物叫 chicharron，我經過就試試，都唔錯。


之前以為 La Paz 會好雜，但其實還好，本地人個個都攞個電話出黎，啲遊客都係就咁掛住部大機行黎行去

市中心有個市場叫 Mercado Lanza，基本上我一日兩餐都嗰度解決

有好多好似格仔鋪嘅餐廳，一間坐 4-6 個人，間間嘅餸都差不多




玻利維亞嘅野食真係一般般，我去完個幾禮拜覺得自己瘦左。可能我係咁食平野（10-15 bob 一餐），有啲似香港嘅常餐，有包+湯+主菜，但唔好食的。明明啲野唔係特別好食，點解好多當地人都咁肥

最鐘意都係佢地週圍都好多果汁鋪，5-10 bob 一杯鮮榨果汁，可以溝水或者奶，10蚊嗰間勁大杯可以當正餐。


La Paz 嘅主要行程當然係搭纜車啦，本身我打算搭曬咁多條線但嗰日落雨，最後只係搭左一半





搭纜車要續程續程買飛，佢唔比我一次過買幾張，每換一條線就要買一次飛，麻鬼煩



La Paz 山上面其中一個區（定算另一個城市？）叫 El Alto，逢星期四同日會有市集，聽聞係玻利維亞最大嘅市集總長5公里。咁啱我星期四喺 La Paz 就去望望

El Alto 個站叫 16 de Julio （我係好唔明白點解玻利維亞啲巴士公司同地方名係一個日期，即係如果金鐘站叫 7月16會好奇怪）




未到站就已經見到下面全部攤檔，但佢地賣嘅都好生活類，行左陣就冇繼續行





16 de Julio 好似係最高嘅站有4千米高，所以可以一眼望曬成個城市

落纜車後個境係會比啲建築物遮著曬，所以要搵個開陽嘅位。通常叫 Mirador xxx 就類似一個觀景台，喺 Google Map 打 Mirador 就搵到。

搵到個觀景台前，我行行下見到有個窿好似望到出面就八下，居然真係比我搵到個開陽位，好靚





出左個窿隔離有一排檔位，完全唔知係咩嚟但我估係同巫術有關，乜呢行咁多生意


出返去終於比我搵到條橋過對面馬路，過左馬路行一陣就搵到個觀景台，一個人都冇！

雖然日光日白，但我都驚比人打劫所以影左幾張相就走走嗰陣開始落雨又陰天，咁我就落返山腳無所事事

接近黃昏嘅時候停左雨加有少少太陽，咁我‘就搭去另外一條線睇夜景。本身打算去 Mirador Killi Killi，但原來佢唔近纜車站就廢是，來回搭左一次橙色線就算




夜晚食左個 Choripan





玻利維亞驗眼郵票



喜洋洋香港炸雞店



下一站 Titicaca

秘魯留左嗰咁多日我都未開始寫，呢幾日更埋個玻利維亞篇就努力打秘魯遊記

我同你差不多
不過我果時係 秘魯入 巴西出
去埋 Patagonia 烏斯懷亞 伊瓜蘇
呢啲時光 真係過咗左就不會再遇上

所以盡情玩！ 之後既事 之後既你會解決到

旅行幾個月 梗係辭職再搵工啦

La paz的纜車幾好坐，又平。諗到用纜車做交通工具真係幾聰明。
我嗰時去可以一次過買幾條線喎，同一張飛出。

可能溝通唔到 我啲西班牙文始終太廢

我都打算玩盡先開始搵工
雖然回程機票已買
但返香港後再去多幾個旅行先
返返工就冇機會無憂無慮地玩

我果陣無買回程
本來諗住返到香港
再去西藏玩到尼泊爾
可惜計劃趕不上變化

Day 27 - 30 - Lake Titicaca

Copacabana

Titicaca 湖砍開左兩忽，屬於玻利維亞嘅部分叫 Copacabana，屬於秘魯嘅部分叫 Puno，我今次先去玻利維亞嗰邊再陸路過境去秘魯。

La Paz 去 Copacabana 首先要搭一程巴士，今次要去一個遠啲嘅站搭車，hostel 行過去要上山八個字，3千幾米海拔孭住40磅行斜路好想死



今次終於唔係水魚，一程 20 bob



中間會經過一個地方叫 San Pablo de Tiquina， 要落車搭一程好短嘅船過對岸，之後再上返架巴士



搭船要另外畀 2 bob



一架船大概坐10到12個人左右，架船坐咗個目測300磅嘅肥婆。雖然路程好短，但梗係覺得隻船唔太平衡，好似就要沉咁樣




順利過到對岸



上返巴士等左陣差幾個人未上車，車上面啲人係咁叫個司機開車，係咁 vamos vamos不過最尾都有等埋嗰幾個人

到達 Copacabana，天氣麻麻地，有啲西貢嘅影子



第二日超級藍天打算 Isla del Sol 一日遊，坐船去北邊 Challapampa，然後行去南邊Yumani，大概三個鐘


架船朝早9點出發（但唔好預佢會幾凖時，最後遲左半個鐘先出發）



唔使兩個鐘到，比想像中快



我以為會有其他人行去南邊，但得我一條友（我覺得我要吸取教訓，以後冇伴都係唔好一條友行，因為今次我迷左路，就算太陽島幾靚都平伏唔到我嘅心靈創傷）

咁到岸後向左行，向南方向沿住岸邊走



一開始條路都好明顯，都算平坦行得幾輕鬆






大概九個字後到一個小村，啲水勁清勁藍





繼續出發，到達第二個村，就係呢度開始行錯路（其實都唔算行錯，因為方向係啱，只係偏離左主路）。


我其實意識到條路好似錯錯地，但我唔想上斜就繼續行我沿途見到當地人有問路，所以證實左我嘅方向係啱只係偏離左主路

呢個所謂嘅徑係完全冇指示牌，村同村之間得一條路，但入到村裏面條路四通八達

行上山唔係好辛苦，但我就冇氣



繼續行，其實我好接近我要去嘅地方，但就係搵唔返條主路。我見到啲屋，而屋一定喺主路隔離，但我人喺啲田度，啲植物又生到好高我真係毫無頭緒點走返出去

突然，我迷路期間有兩隻狗跑左出黎吠我
嗰刻真係好撚驚，跑住走仆左幾次



但係我錯，因為係我闖入人地地方先好彩嗰兩隻係細狗，如果唔係我應該要去打狂犬疫苗
我快快離開佢地地盤就冇再追我

之後我又行左入人地個後院，比我見到個婆婆，好開心終於有人比我問路

我一黎就道左歉先，之後就問點出返去。個婆婆係我救命恩人，佢帶我行返出主路，我同佢講左十次多謝

我覺得遇到嘅玻利維亞人都好友善，雖然我地有語言隔膜但好多時啲人見我好迷茫都會主動幫我，或者我問路呀問野都會禮貌答我。


搵返條路就冇咁怯，慢慢行去目的地。雖然迷路擾攘左好一陣，但行到碼頭都係兩個鐘多啲




本來 Yumani 行多一陣仲有啲印加遺蹟，但我身心疲累就坐喺碼頭等船開




之前講過呢度係冇準時呢樣野，架船又係遲左半個鐘先開，但我要搭6點車走（仲要未買飛）

好彩一個鐘就返到 copacabana，一落船我衝去巴士公司個鋪位，斷氣咁濟但個職員又唔話比我知有冇位要我等，咁我衝返 hostel 攞行李再返去。返去之後佢帶我同另外幾個都係啱啱落船嘅人行左去另一間公司個鋪位。

去到得最後一個位，雖然好貴（80 bob，前一日問好似半價）但冇辦法一定要比。即場搞埋報關嘅表，成功上車去 Puno


巴士到 Khansani，即係玻利維亞同秘魯邊境就要落車過關，跟住人行就得，好快搞掂



排緊隊嗰時，前面兩個人喺度吹緊水，聽到其中一個人話佢 Uyuni 去 Sucre 程車死左，我衝出黎話我地好似搭同一架車

雖然我喺玻利維亞嘅時間唔長，但呢個國家消費真係好低，然後遇到嘅當地人都好友善

雖然我對森林同熱帶雨林完全冇興趣，但聽聞玻利維亞嘅亞馬遜最平同好玩啲，有興趣可以自己研究下。

之後秘魯篇要等我慢慢打，實在做左太多野

睇返你既相，諗返起好多自己去既事
例如由La Paz 去Copacabana，架大巴都係好簡陋，似大陸車
同Copacabana 大教堂金碧輝煌，點估到呢個高原地方都有咁靚既教堂

巴打當時玩左幾耐，去左邊？

樓主有冇玩死藤水