[獨遊] 終於踏足南美洲

半年前喺瑞士玩咗3個禮拜，截順風車同 Couchsurfing，2個人平均每日使費 €30。

其實唔怕截順風車嘅話，可以慳咗瑞士最貴嘅交通費，嗰度截車算幾容易同安全。瑞士真係好靚

火車錢都未算天價
上山啲纜車 火車先係天價

因為有好多中年/ 退休人士落咗船唔係好行到

真係要襯後生去

2個人好d，1個人真係唔想

社恐

建議去非洲！

LM支持

做咩幾日冇見呢度變左南極討論區

留名睇分享

你去到同走中間既時間啲物價貴左幾多

lm

絲打 如果我淨係行Base of the towers day hike 你覺得夠唔夠？
因為假期有限想行埋el chalten

除非你好熱愛行山，如果唔係 Base Las Torres day hike 我覺得夠。但即日行山嘅人出發時間早極有限，你預上山時會塞車，同埋上到去會好多人

一樣 Fitz roy靚太多

Day 6 - Puerto Natales

今日要離開阿根廷進入智利，6個鐘車程。喺巴士站 check-in 前要喺網上填個好簡單嘅入境資料，我當然係完全唔知有呢樣野



去到巴士站聽到隔離啲人講我先知要填表，好彩附近嘅人好心指點左我幾句，幾分鐘搞掂



沿途風景


Puerto Natales 週圍逛下




望住個湖，望住啲山，嗰一刻我覺得辭左份工去睇下個世界呢個決定真係好正確。週圍逛下，行到攰搵個位坐低，放空一下，幾寫意




雖然有份工都可以去南美，但慳慳埋埋最多先得嗰2-3星期假。去個旅行都要將啲時間計到盡，返去仲要做返放假期間堆積嘅工作可能望住個湖，淨係諗放完假公司有幾多野等緊自己

咁有心

Day 7-11 - Torres Del Paine

W Trek 篇我控制唔到自己不停放負，因為真係好辛苦，唔想睇我放負可以 skip 左佢

W Trek - Day 1
Torres Del Paine，今次旅程最大一項洗費，5日洗費同我張來回機票差不多價錢




到達 Torres Del Paine， 天氣不太好呀，希望聽日會轉晴啦。



比成萬蚊住床位真係第一次


第一晚我同房係幾個美國叔叔加兩個仔，幾個叔叔都超級 nice。今次都見到幾多頭髮白曬嘅人行山，好勁我諗自己過左50歲只係會行郊遊徑

晚餐




早啲休息，聽日20k 等緊自己



W Trek - Day 2
今日正式開始 W Trek，由於今晚會住返同一間 hostel 所以輕裝上路。



早餐



一開始根本車路咁款，誤導我以為今日會係簡單。咁諗就大錯特錯，因為今日係攀升最多嘅一日。



沿途經過 Torres Del Paine 好貴一晚嘅酒店


雖然個天都多雲，但好似有放晴嘅跡象


開始上斜，好討厭石春路（上同落都好痛苦）



過左石春路之後開始見到雪山



大概2個鐘後，到達 Chileno sector，另外一個營地。



去到呢度都還好，但之後短時間內瘋狂向上，上到懷疑人生

中間有個廁所位



廁所位之后進入登頂最後階段，總之向上行就啱。難就唔太難，但行到好燥底



開始見到少量雪，即係話我差唔多到。因為上到 Mirador Base Tores 啲霧有啲大，所以都唔意識到我已經到左。上次 Fitz Roy 上唔到頂搞到個人灰灰地，但我終於登頂啦



三個塔長期有陣霧遮住，我唔趕時間就一路食晏，一路等啲霧散。因為我係全包，所以我係有飯盒，裡面其實都幾多野，有啲零食比你中途充飢，我仲帶左好多零食好鬼重


等左大概半個鐘，終於比我等到，仲有人求婚




任務完成，落山

今日個膝頭有啲弱，唔知係未恢復好定點，落山個膝頭負荷好大落石春路嘅時候行到想死，行極都行唔完咁



8個鐘後，終於返到 hostel，冇左半條命

一個人行會唔會好悶

絲打原來由東至西咁行，咁一定第一日最辛苦，因為一開波就要上最高既山
由西至東行會好少少，同最後個日可以上去三塔度睇日出，然後落山搭車返到文明世界
當年我就無咁好彩，大概廁所位個度其實有個營地，個晚就係個度紮營，又大風又凍到幾乎無訓，然後凌晨就上去睇日出，但就有少少似你上到頂影既第一張相咁
繼續留名支持

攰到冇時間諗悶
同埋一路行會撞到另一方向嚟嘅人
一日都唔知講幾次 Hola 同 Gracias

我好興幸我揀左東到西，掉返轉頭的話我最後一日可能唔夠體力完成。西到東就將行程最靚個位留到最後一日，各有各好啦。

Patagonia 天氣真係好睇運氣，巴打當年唔好彩 我好好彩，咁多日都大致天晴又唔太凍，就算落雨都係微微雨

感謝支持

留名
黎緊都想行W，但我又係懶，想比錢人搞全包算

D景好靚

W Trek - Day 3
第三日，一路行一路後悔點解要咁樣折磨自己



因為第3日唔走回頭路，所以呢日要孭住所有行李去下個住宿點。明明已經有咁少帶咁少，但最後都差唔多8kg。醒目如我仲帶埋個腳架打算影星，最後完全冇用過因為晚晚都多雲


8kg 已經行到想喊，啲人係點孭20kg 行6-8個鐘

今日唔係石頭路，泥路，就係會濕腳嘅路，我突然覺得自己患左急性公主病完全唔想整污糟對鞋同整濕對腳




個境幾靚都唔吸引，只想快啲行完快啲休息



話就話今日係難度一般，但我覺得今日仲難挨過尋日。如果唔係冇得放棄嘅話，我應該會掉頭走

後悔左一百次之後，終於到 Cuernos




可惜 Cuernos 唔係我今日要住嘅地方，仲要行多個半鐘



又上又落又上又落之後，終於到今日嘅落腳點 Frances。到 Frances 嘅時候一點半，個人半死狀態，今日行程就到呢度


今日同房都係美國人，有對美國情侶 Meghan 同 Cort，仲有一家5口兩父母帶三個仔女

餐廳望出去


今晚晚餐係咁多日最正


食飯時坐 Cort 同 Meghan 對面就傾左陣。吹水話題離不開你邊度人，跟住去邊。因為我仲會去智利其他地方，講講下就扯左去 Cort 喺智利住左7年，佢可以推薦啲地方比我。

Cort 初初對朝9晚5生活開始厭倦，就參加左一個喺智利嘅義工活動。義工活動完左後，佢又未準備好返美國。喺唔知邊個政府機構申請文件嘅時候，個職員話有份工好適合佢係幫啲報美國 mba 嘅智利準考生睇下份英文 CV 做下 mock interview 咁

佢通過呢份工識左好多人，做左冇耐就搵返本行。如是者喺智利生活左幾年，佢覺得好似又返番去之前嘅生活，所以就離開智利返美國。喺美國後識左 Meghan 就一齊黎 Torres del Paine 玩

我覺得呢啲特別機遇外國特別多，好似好多人都會喺啱嘅時侯遇到啱嘅人，然後遇到適合佢嘅機會。可能同文化有關啦，總之亞洲我好少聽到呢啲經歷。



W Trek - Day 4
今日都係辛苦日，要行8-10個鐘，但好彩休息左一晚終於冇咁攰



首先，要將啲唔需要嘅野放喺 Camp Italiano，然後正式開始今日嘅重點行程




Frances Valley 冇第一日 Las Torres 咁辛苦，但都唔容易。

雖然條徑嘅標誌都幾清晰，但有時行行下完全冇標誌又多一個路口嘅時候，我就會望下地下啲窿窿睇下啲人行邊。



第一個目的地係 Mirador Frances


穿過樹林然後上上上，後面係湖，前面係雪山。



繼續行多一個半左右，終於到今日第二個目的地 Mirador Británico





喺山上面食左個午餐後就落返去。如果上山係辛苦嘅話，落山就係痛苦好幾次都差啲仆街


Camp Italiano 啲背囊堆到


好彩我一早上山，因為走嘅時候勁大風下一站，Paine Grande

去 Paine Grande 條路差不多一半時間都落微微雨，快快行完去 Refugio 休息。





兩個幾鐘後，終於到最後一晚嘅住宿 Refugio Paine Grande


補充一下，Torresl Del Paine 嘅屋仔得兩間公司 Las Torres 同 Vertix，之前幾晚住宿都係 Las Torres 旗下，但今晚係 Vertix。Vertix 感覺差啲，廁所又少，餐廳人流去得慢，因為係自助餐要排四個字拎到食物。



聽日就喺呢度搭船走


可唔可以聽日搭頭班船走，我唔想再行啦。如果唔係比左咁多錢，我係冇動力堅持落去

但係！我比左一萬蚊呀唔係一千呀！一萬夠我玩多一個月啦，死都要死完佢