[獨遊] 終於踏足南美洲

秘魯消費係好平（雖然玻利維亞仲平）
跟團超級抵玩

最貴應該都係庫斯科？

Cusco 其實都平，平均一個團60 sol
食常餐(menu del día) 或 chifa 都係 8-15 sol
馬丘比丘行程最貴，但你一定要比佢搶

真係幾搶下，快d更新

Day 34 - 42 Cusco

Cusco 係我今次旅程留得第二長嘅城市，呢度附近真係好多野做，今次留左9日我都覺得唔夠，Sacred Valley 附近嘅小鎮值得留更長時間






除左去馬丘比丘好熱門嘅 Inca 同Salkantay，Cusco 附近比較冷門嘅徑例如 Ausangante 同 Choquequirao 我本身都好有興趣。

但係自從行完 W 之後我深深感受到自己冇想像中咁鐘意行山所以取消曬之後大部分行山計劃



呢個朋友都算唔好彩，香港飛 Cusco 第一班機 delay 搞到搭唔到之後兩班機。雖然航空公司幫佢改機票，但落機冇左行李，最後雖然攞得返但都搞左一輪。返香港班機又被無故取消，LATAM 正幾垃圾公司

因為要去機場攞返個行李，我終於體驗到呢度嘅公共交通工具，colectivo 1 sol 炸




最特別嘅係架車有個司機，同有個負責收錢嘅員工。因為架 colectivo 前後都有門可以上落車，收錢嘅人喺架車未停定就會衝落車同人收錢除左收錢，佢仲會叫街上嘅人上車，仲見過佢幫呀婆攞行李落車，超級盡責

Mercado Central den San Pedro
通常我解決三餐嘅地方，但呢度嘅中央市場同其他城市最大分秘魯別就係呢度好多紀念品賣（根據我嘅資料收集，買紀念品最平嘅地方係 Ollantaytambo，可惜我喺 Ollantaytambo 時間太短冇行街）。但同其他城市一樣嘅係，呢度嘅檔主都好熱情但又唔會太 hard sell。



我嘅草泥馬一家人全部呢度買，買手信我覺得呢度最平最多款


呢度嘅咖啡好得意，唔係比一杯咖啡 + 少少奶你，而係一大杯奶 + 一小樽咖啡，我覺得都幾好飲


非常推薦呢度嘅果汁，全部都好好飲有平


有幾檔賣乳豬都好好食


仲有好多好多賣其他野嘅檔，我去左呢個街市起碼8次




Mercado San Blas
稍微離武器廣場遠少少嘅一個街市，比較本地化少好多遊客，如果有時間可以都過嚟睇睇




Mirador de Plaza San Cristobal
行上少少有個可以望曬成個 Cusco 嘅觀景台好值得去




Traditional Textile Centre of Cusco
同之前去嘅 Alpaca Mundo 有啲似，又係一間賣好貴草泥馬產品但有個免費展覽嘅鋪頭

但呢個展覽豐富好多，有好多真係傳統印加人平時用草泥馬毛做嘅日常用品，同埋少少佢地唔同階段編織嘅衣物






節日慶典著嘅特別服飾

印加喜服


URPI Pizzeria Restaurante
呢間餐廳係無意中發掘到，食完一次覺得唔錯，所以行完馬丘比丘再幫襯多次


一開始係見到有草泥馬食，所以入左去。但坐低發現啲人多數嗌 pizza 或 pasta，所以之後先黎多次

免費包都好好食


草泥馬肉還好，口感有啲似豬膶


Lasagna 好好食，勁多芝士


Pizza 都好正



非常推薦呢間餐廳，印象中兩個人都係二百幾三百港紙，唔貴

Pachapapa
大家都話要試天竺鼠肉就去左呢間出名少少嘅餐廳。但好似叫錯左，變左煎唔係燒乳豬嘅做法。還好啦，試一次就夠

有冇罵交

冇啦，我諗主要係我唔慣有人不停同我講野，同埋佢行路行得太慢我唔可以行太快

Mercado Central 好懷念，個度食過常餐，當時大膽到連Ceviche 都敢
另一類經常幫襯就係Chifa，但唔知幾多個月後先講到秘魯了我

Cusco 嘅 Mercado Central 啲嘢真係幾好食同好多選擇，秘魯其他城市都一般般
慢慢 update 啦
過左咁耐要諗返咁多細節真係好花時間

去秘魯竟然唔去埋阿馬遜

巴打我都睇緊呢架船
你4800真係好抵！
想問你last min ticket 係用咩方法知道

見到我個名
好彩你鍾意個浮島

Local tour
除左馬丘比丘係一早 book 定之外，其他團都係到步後先隨便搵。 Cusco 週街都旅行社，你行喺條街度都會有人走過黎 sell 你。隨便搵嘅好處就係價錢比較平，我平均一個團 60 sol，全部包午餐。

唔好處就係可能會中伏，我報嗰間旅行社 Google 勁低分，啲人 comment 佢個團突然取消，好彩我自己冇嚟個情況。

報名嘅時候個職員會話你知架車幾點黎接你，參考下就好，架車要兜曬成個 Cusco，如果係最後一個站的話可以遲成個鐘。總之，耐心等候架車就會到

Boleto Turistico
Cusco 附近嘅景點全部都要錢，之前上網見到好似可以一個一個買，但而家好似一定要買套票。

呢個套票有幾款，視乎自己需要。如果有好多時間的話買10日嗰款係最抵，自己慢慢玩。

但如果對一啲冇咁出名嘅景點或博物館冇興趣，或好似我咁淨係夠時間參加個走馬看花團去 Sacred Valley ，買 Boleto Parcio 會比較適合。


可以喺 Cusco 嘅旅遊中心買，亦都可以到左景點先買，冇分別的

Day 36 - Sacred Valley
上面講過黎接你嘅車可能會準時可能會遲，耐心等候就得，就係呢一日等左一個鐘。由於係我朋友今次第一個行程，佢好緊張一直走嚟走去問唔同嘅車又 whatsapp 又盛，我就話呢度係咁架等下啦

唔知係咪間間旅行社都咁，但呢個 Sacred Valley 一日遊係有購物行程。唔好做水魚唔洗幫襯，佢放得團友喺一個地方越耐就代表導遊有佣收（呢個係之後有一日喺 Cusco 其中一間草泥馬衫鋪個老闆講的）

水魚篇
進入 Chinchero 遺址前，我地被帶左去睇一個小小嘅表演，講解下草泥馬毛點處理呀染色呀，跟住就帶我地去隔離劏。



雖然好齊好多野買，但唔好喺呢站買任何野，呢度比 Cusco 貴三倍價錢（真真假假草泥馬毛都係咁貴）

真嘅 baby alpaca 係有牌寫住，喺街見到 幾十蚊 Alpaca 嗰啲好多都呃人，聚酯纖維混羊毛或草泥馬毛，都唔知有幾成堅野

嗰日接收左太多資訊其實嗰頭導遊講完我已經忘記左佢講左咩，所以我就唔續個介紹啦。

Chinchero
比人劏完後終於到第一個景點，Chinchero
被稱為“彩虹之地”，除左一大片田地之外，仲包括印加神殿同宮殿（但我而家點望都望唔出邊忽係一個殿，同我想像中嘅殿有好大分別）






Moray
圓形梯田，印加時期農業蓬勃，差不多所有印加遺址都有梯田




Salineras de Maras
Maras 鹽田嘅存在比印加時期更要早好多，到今時今日都仲運作緊。除左作為旅遊景點之外，導遊話秘魯最 Top 嘅餐廳包括 Central 都有用鹽田裡面嘅鹽煮飯






Urubamba
食飯嘅地方，但其實幾靚，餐飯都好食




Ollantaytambo
呢個鎮除左搭火車去馬丘比丘之外，Ollantaytambo 遺址仲係印加帝國嘅一座皇家莊園。據聞上面好多舊超級大石頭係嚟自隔離嗰座山，啲石頭唔知幾多噸，到底以前嘅印加人係點樣搬過黎。








去完咁多個印加遺址後，我覺得印加帝國真係好屈機，喺冇任何大型工具或機器之下只係短短100年內就起咁多大型建築，仲要全部喺山上面。呢個咁厲害嘅文明消失左真係好可惜

Pisaq
因為行程延誤，到 Pisaq 嘅時候人地已經要關門，但唔知點解仲可以比我地入。Pisaq 屬於一個多功能遺址，有城堡，天文台，寺廟，居住地，埋藏地，梯田。




睇左咁多個景點開始唔記得邊個打邊個，同埋呢啲走馬看花團都幾攰，我覺得有時間慢慢睇會更合適自己。

以為終於可以返 Cusco 休息，點知架車車左我地去另一個購物行程，格硬留左9個字先比我地走間鋪賣銀嘅飾物，完全冇興趣，啲員工係咁過嚟 sell 我，我淨係想瞓覺

雖然呢日個行程好豐富，導遊都講得好仔細，但唔鐘意景點就比好少時間，購物行程就逗留好耐。所以如果有時間的話，可以將 Sacred Valley 砍開幾日玩（唔係個個團都一日踩曬所有景點），或者自己搭車去 Pisaq 或 Ollantaytambo 留一兩日，到步後再請導遊會好啲

係呀，就係睇左你遊記咁推薦先加左入我個行程度，真係唔錯

樓主去到邊

仲喺 Antigua 讀緊書
呢兩個星期好得閒我日日都努力打遊記
希望離開危地馬拉前可以寫完秘魯

原來Sacred Valley 一日遊可以踩到咁多地方
Ollantaytambo 同Pisaq 當時2揀1，最後揀Pisaq，個城比較細但遺址好似完整好多
呢度都買左件斗篷，其實香港無著過
當年亦有去 Moray 同 Maras

覺得教得好唔好

我都冇諗過一日可以去咁多度
但每個地方留好少時間，想睇耐啲都唔得
我冇買斗篷淨係買左冷衫
著得返都幾好，香港真係冇機會

視乎你同個老師夾唔夾
我個老師鐘意同我吹水多過拎住本書黎教
我覺得咁樣 hea 下 hea 下 幾好
有啲老師就 chur 啲，成日做練習
睇你鐘意點樣嘅教學方式
但因為個環境逼我聽同講
所以就算好 hea 都會有進步

加油

樓主係提早左幾耐買票同火車飛？

Day 37 - Laguna Humantay
今日自己一個跟團，因為朋友仲適應緊海拔體能太廢唔適宜行山

與其話呢個係一個團，不如話佢更似一個交通工具。秘魯大部分平嘅行山 tour 都係咁，大部份時間只係搭車，導遊唔會講太多野，佢主要職責就係帶住啲人上山，幫手影下相。

我諗我係唯一一個唔講西文嘅人，所以個導遊除左一開始翻譯左幾句比我之外，之後都只講西文（當訓練下我嘅聆聽能力）。

我印象中 5 點出發，兩個鐘後就去食早餐，食完早餐再搭個幾鐘就到起點

起點行去山腳大概一個鐘，全部平路好易行





另一條去馬丘比丘嘅徑 Salkantay Trail 都會經過 Laguna Humantay，因為唔洗早半年就訂比較有彈性，又冇人數限制所以好受歡迎


行 Salkantay Trail 可以住呢種玻璃屋


上山前比你去一下廁所


到左山腳之後就係一條直路上山


就咁睇唔似好斜，但海拔3900米行上斜勁喘氣


攰就唔係好攰，但我冇試過行山每 5-10分鐘都要抖下回下氣

大部分呢啲要行好多路嘅景點都考慮周全，若果好想呢個地方但行唔到上去可以比錢騎馬，都幾多當地人騎



我咁 fit 就當然唔需要啦

咁樣行下抖下大概一個鐘就上左去


人山人海，猶如疫情期間嘅香港各大行山徑




天氣一般，遮住左個山，不過都係靚。





可能之前喺 Patagonia 見太多，咪又係嗰啲山嗰啲湖，加上咁多人減左好多分（我覺得大部分雪山 + 湖都係咁嘅樣，睇得多會審美疲勞，反而香港山上面睇到嘅高樓大廈境我百看不厭）

坐左大概個幾鐘就落返山。尷尬嘅時間，再行上少少又擔心唔夠時間，齋坐又好無聊最後坐到導遊叫走就走

落山嗰陣落雨


落到山腳就停左

而家秘魯好興嘅吸印仔，我吸曬咁多款（反而喺馬丘比丘冇見到）




特登帶左本簿嚟吸，之前喺日本買但成日都唔見印仔喺邊


落山快好多，同團有個秘魯女仔同我嘅步伐差唔多就一路行一路用我好廢嘅西文傾左陣。好開心終於可以同本地人對話，而唔係平時嗌野食嗰幾句

同團有團友龜速咁，上返車等左成個鐘先齊人


行完返去頭先早餐間餐廳食飯，天氣好邊度都靚

你指咩飛？
馬丘比丘所有交通門票都係旅行社安排
Inca Trail 個行程包曬所有費用
但我有遇到其他 backpacker 到 Cusco 先買飛